ಪೊಲೀಸ್ ಸರ್ಪ ಗಾವಲು, ಬ್ಯಾರಿಕೇಡ್ಗಳನ್ನು ಮುರಿದುಹಾಕಿದ ಪ್ರತಿಭಟನಾಕಾರರು ದಿಲ್ಲಿಯ ಐತಿಹಾಸಿಕ ಕೆಂಪುಕೋಟೆಗೆ ಮುತ್ತಿಗೆ ಹಾಕಿದ್ದಲ್ಲದೆ, ರಾಷ್ಟ್ರಧ್ವಜ ಹಾರಬೇಕಿದ್ದ ಸ್ಥಳದಲ್ಲಿ ಸಿಖ್ ಧ್ವಜ ಹಾರಿಸಿದರು. ಇಡೀ ವಿಶ್ವವೇ ಭಾರತದತ್ತ ತಿರುಗಿ ನೋಡುವ ಗಣರಾಜ್ಯ ದಿನದಂದು ಸಂಭವಿಸಿದ ಆಕ್ಷೇಪಾರ್ಹ ಘಟನೆಗಳು ಜಾಗತಿಕವಾಗಿಯೂ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ. ಹಾಗೆ ನೋಡಿದರೆ, ಇತ್ತೀಚಿನ ವರ್ಷಗಳಲ್ಲಿ ಇಂಥದ್ದೊಂದು ಹೇಯ ಘಟನೆಗೆ ಭಾರತ ಸಾಕ್ಷಿಯಾಗಿರಲಿಲ್ಲ. ಆದರೆ, ಕೆಂಪುಕೋಟೆಗೆ ಮುತ್ತಿಗೆ ಹಾಕಿ, ಸ್ವಾತಂತ್ರ್ಯ ದಿನದಂದು ಪ್ರಧಾನಿ ಭಾಷಣ ಮಾಡುವ ಸ್ಥಳಕ್ಕೆ ಪ್ರವೇಶಿಸಿದ ಪ್ರತಿಭಟನಾಕಾರರು ಪೊಲೀಸರ ಮನವಿ ಧಿಕ್ಕರಿಸಿ ಕೋಟೆಯ ಮೇಲ್ಭಾಗಕ್ಕೆ ಹತ್ತಿ, ತಮ್ಮ ಬಾವುಟ ಹಾರಿಸಿದರು. ಪ್ರತಿಭಟನಾಕಾರರು ಎಲ್ಲ ನಿಯಮಗಳನ್ನು ಉಲ್ಲಂಘಿಸಿದ್ದರಿಂದ ಲಾಠಿ ಚಾರ್ಜ್, ಅಶ್ರುವಾಯು ಸಿಡಿಸುವುದು ಪೊಲೀಸರಿಗೂ ಅನಿವಾರ್ಯವಾಗಿತ್ತು. ಆದರೆ, ಪ್ರತಿಭಟನಾಕಾರರು ಮಾತ್ರ ಆ ಸನ್ನಿವೇಶದಲ್ಲಿ ಯಾರ ಮಾತನ್ನೂ ಕೇಳಲಿಲ್ಲ.
