ಗಾಜಾದಲ್ಲಿ ಇಸ್ರೇಲ್ ನರಮೇಧ ನಡೆಸಿದೆ ಎಂದ ಯುಎನ್ ​​ತನಿಖಾ ಆಯೋಗ: ತಿರುಗೇಟು ನೀಡಿದ ಇಸ್ರೇಲ್​| United Nations

United Nations: ಗಾಜಾದಲ್ಲಿ ಪ್ಯಾಲೆಸ್ಟೀನಿಯನ್ನರ ವಿರುದ್ಧ ಇಸ್ರೇಲ್ ನರಮೇಧ ಮಾಡಿದೆ ಎಂದು ವಿಶ್ವಸಂಸ್ಥೆಯ ತನಿಖಾ ಆಯೋಗ ತನ್ನ ವರದಿಯಲ್ಲಿ ಹೇಳಿದೆ. ಅಂತರರಾಷ್ಟ್ರೀಯ ಕಾನೂನಿನಡಿಯಲ್ಲಿ ವ್ಯಾಖ್ಯಾನಿಸಲಾದ ಐದು ನರಮೇಧ ಕೃತ್ಯಗಳಲ್ಲಿ ನಾಲ್ಕನ್ನು ನಡೆಸಲಾಗಿದೆ ಎಂದು ನಂಬಲು ಆಧಾರಗಳಿವೆ ಎಂದು ಈ ವರದಿ ಹೇಳುತ್ತಿದೆ.

ಈ ವರದಿಯ ಪ್ರಕಾರ ಇಸ್ರೇಲಿ ನಾಯಕರ ಹೇಳಿಕೆಗಳು ಮತ್ತು ಇಸ್ರೇಲಿ ಪಡೆಗಳ ನಡವಳಿಕೆ ಮಾದರಿಯನ್ನು ಆಯೋಗವು ಜನಾಂಗೀಯ ಹತ್ಯೆಯ ಉದ್ದೇಶದ ಪುರಾವೆಯಾಗಿ ಉಲ್ಲೇಖಿಸಿದೆ. ಇಸ್ರೇಲ್ ಈ ಸಂಶೋಧನೆಗಳನ್ನು ಬಲವಾಗಿ ತಿರಸ್ಕರಿಸಿದೆ. ವರದಿಯನ್ನು ವಿಕೃತ ಮತ್ತು ಸುಳ್ಳು ಎಂದು ಕರೆದಿದೆ. ಈ ಆಯೋಗದ ಸದಸ್ಯರು ಹಮಾಸ್ ಪ್ರಾಕ್ಸಿಗಳಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ಇಸ್ರೇಲ್​ ಆರೋಪಿಸಿದೆ.

ಇದನ್ನೂ ಓದಿ: ಭಾರತೀಯ ಕ್ರಿಕೆಟ್‌ನ ಹೊಸ ಭಾಗೀದಾರ: ಅಪೊಲೊ ಟೈರ್ಸ್ ಜೆರ್ಸಿ ಸ್ಪಾನ್ಸರ್ ಆಗಿ ಎಂಟ್ರಿ | Indian cricket

ವರದಿಯಲ್ಲಿ ಏನಿದೆ..?

ಇಸ್ರೇಲ್​ ಆಕ್ರಮಿತ ಪ್ಯಾಲೆಸ್ಟೈನ್ ಪ್ರದೇಶದ ಸ್ವತಂತ್ರ ಅಂತರರಾಷ್ಟ್ರೀಯ ವಿಚಾರಣಾ ಆಯೋಗವು ಸಂಗ್ರಹಿಸಿದ 72 ಪುಟಗಳ ವರದಿಯು, ಇಸ್ರೇಲಿ ಅಧಿಕಾರಿಗಳು ಮತ್ತು ಭದ್ರತಾ ಪಡೆಗಳು 1948ರ ನರಮೇಧ ಅಡಿಯಲ್ಲಿ ನರಮೇಧದ ಕಾನೂನು ವ್ಯಾಖ್ಯಾನವನ್ನು ಪೂರೈಸುವ ಕೃತ್ಯಗಳನ್ನು ಎಸಗಿವೆ ಎಂದು ಆರೋಪಿಸಿದೆ.

ಈ ಕೃತ್ಯಗಳಲ್ಲಿ ಇಸ್ರೇಲ್​​ ನಾಗರಿಕರು ಮತ್ತು ಸಂರಕ್ಷಿತ ಸ್ಥಳಗಳ ಮೇಲಿನ ದಾಳಿಗಳು, ಬಲವಂತದ ಸ್ಥಳಾಂತರ, ಮೂಲಸೌಕರ್ಯಗಳ ನಾಶ, ವೈದ್ಯಕೀಯ ನೆರವು ನಿರಾಕರಣೆ ಮಾಡಿದೆ ಎಂದು ಯುಎನ್ ತನಿಖಾ ವರದಿ ಹೇಳಿದೆ.

ಇಸ್ರೇಲ್​ ಅಧ್ಯಕ್ಷ ಐಸಾಕ್ ಹೆರ್ಜಾಗ್, ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಮತ್ತು ಮಾಜಿ ರಕ್ಷಣಾ ಸಚಿವ ಯೋವ್ ಗ್ಯಾಲಂಟ್ ಸೇರಿದಂತೆ ಇಸ್ರೇಲಿ ನಾಯಕರ ಹೇಳಿಕೆಗಳನ್ನು ಆಯೋಗವು ಪರಿಶೀಲಿಸಿದೆ. ಈ ನಾಯಕರು ಭಾಷೆಗಳ ಮೂಲಕ ನರಮೇಧವನ್ನು ಪ್ರಚೋದಿಸಿದ್ದಾರೆ ಎಂದು ವರದಿ ಹೇಳುತ್ತದೆ. ಆದರೆ, ಹಮಾಸ್ ದಾಳಿಗೆ ಇಡೀ ಪ್ಯಾಲೆಸ್ಟೀನಿಯನ್ ಜನಸಂಖ್ಯೆಯೇ ಕಾರಣ ಎಂದು ಹರ್ಜಾಗ್ ಘೋಷಿಸಿದರು.

ಆಯೋಗದ ಅಧ್ಯಕ್ಷೆ, ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಮಾಜಿ ಮುಖ್ಯಸ್ಥೆ ನವಿ ಪಿಳ್ಳೈ, ಆಯೋಗದ ಸಂಶೋಧನೆಗಳು ಇಲ್ಲಿಯವರೆಗಿನ ಯುದ್ಧದ ಕುರಿತು ವಿಶ್ವಸಂಸ್ಥೆಯ ಪ್ರಬಲ ಹೇಳಿಕೆಯನ್ನು ಪ್ರತಿನಿಧಿಸುತ್ತವೆ ಎಂದು ತಿಳಿಸಿದರು. ಎರಡು ವರ್ಷಗಳಲ್ಲಿ ಸಂಗ್ರಹಿಸಿದ ಪುರಾವೆಗಳ ಆಧಾರದ ಮೇಲೆ ಜನಾಂಗೀಯ ಹತ್ಯೆಯ ಉದ್ದೇಶ ಮಾತ್ರ ಸಮಂಜಸವಾದ ತೀರ್ಮಾನವಾಗಿದೆ ಎಂದು ಹೇಳಿದ್ದಾರೆ.

ವರದಿ ಪಕ್ಷಪಾತದಿಂದ ಕೂಡಿದೆ- ಇಸ್ರೇಲ್ ಆರೋಪ

ಇಸ್ರೇಲ್ ವಿದೇಶಾಂಗ ಸಚಿವಾಲಯವು ವರದಿಯನ್ನು ಸ್ಪಷ್ಟವಾಗಿ ತಿರಸ್ಕರಿಸಿದೆ. ಈ ಆಯೋಗವು ಹಮಾಸ್ ಹರಡುವ ಸುಳ್ಳುಗಳನ್ನು ಮಾತ್ರ ಅವಲಂಬಿಸಿದೆ ಎಂದು ಆರೋಪಿಸಿತು. ಸಚಿವಾಲಯವು 2023ರ ಅಕ್ಟೋಬರ್​ನಲ್ಲಿ ದಕ್ಷಿಣ ಇಸ್ರೇಲ್ ಮೇಲೆ ಹಮಾಸ್ ನಡೆಸಿದ ದಾಳಿಯನ್ನು ಉಲ್ಲೇಖಿಸಿದೆ. ಇದು ಸುಮಾರು 1,200 ಜನರನ್ನು ಕೊಂದು 251 ಜನರನ್ನು ಒತ್ತೆಯಾಳುಗಳನ್ನಾಗಿ ಮಾಡಿತು. ಹಮಾಸ್ ನರಮೇಧಕ್ಕೆ ಪ್ರಯತ್ನಿಸುತ್ತಿರುವ ಪಕ್ಷ ಎಂದು ಇಸ್ರೇಲ್​ ಹೇಳಿದೆ.

ಅಂತರಾಷ್ಟ್ರೀಯ ನ್ಯಾಯಾಲಯವು ಇಸ್ರೇಲ್ ಅನ್ನು ನರಮೇಧದ ಆರೋಪ ಹೊರಿಸಿ ದಕ್ಷಿಣ ಆಫ್ರಿಕಾ ಹೂಡಿರುವ ಪ್ರಕರಣದ ವಿಚಾರಣೆ ನಡೆಸುತ್ತಿದೆ. ಇಸ್ರೇಲ್ ಈ ಪ್ರಕರಣವನ್ನು ಸಂಪೂರ್ಣವಾಗಿ ಆಧಾರರಹಿತ ಮತ್ತು ಪಕ್ಷಪಾತ ಆಧರಿಸಿದೆ ಎಂದು ಆರೋಪಿಸಿದೆ. (ಏಜೆನ್ಸೀಸ್)