ಲಖನೌ ಜನತೆಗೆ 500 ರೂ. ನೋಟುಗಳು ತಂದ ಪೇಚು! ಇಡೀ ರಾತ್ರಿ ಅವರು ನಿದ್ದೆಗೆಟ್ಟಿದ್ದು ಈ ಕಾರಣಕ್ಕೆ

ಲಖನೌ: ಇಲ್ಲಿನ ಪೇಪರ್​ ಮಿಲ್​ ಕಾಲನಿಯಲ್ಲಿ ರಸ್ತೆಯಲ್ಲಿ ಅನಾಥವಾಗಿ ಬಿದ್ದಿದ್ದ ಎರಡು 500 ರೂಪಾಯಿ ನೋಟುಗಳು ಬಡಾವಣೆಯ ನಿವಾಸಿಗಳ ನಿದ್ದೆಗೆಡೆಸಿದವು! ಕರೊನಾ ಸೋಂಕು ಹರಡಲು ಯಾರೋ ಅಪರಿಚಿತರು ಆ ನೋಟುಗಳನ್ನು ಉದ್ದೇಶಪೂರ್ವಕವಾಗಿ ಎಸೆದು ಹೋಗಿರಬಹುದು ಎಂಬ ಭೀತಿಯೇ ಇದಕ್ಕೆ ಕಾರಣವಾಗಿತ್ತು.

ಈ ಹಿನ್ನೆಲೆಯಲ್ಲಿ ಗುರುವಾರ ರಾತ್ರಿ ಪೊಲೀಸ್​ ಸಹಾಯವಾಣಿಗೆ ಕರೆ ಮಾಡಿದ ಜನರು, ಆ ನೋಟುಗಳ ಬಗ್ಗೆ ಮಾಹಿತಿ ನೀಡಿದರು. ಇದಕ್ಕೆ ಸ್ಪಂದಿಸಿದ ಪೊಲೀಸರು ಸ್ಥಳಕ್ಕೆ ಬಂದು ಅವುಗಳನ್ನು ವಶಕ್ಕೆ ಪಡೆದುಕೊಂಡರು.

ಬೇರೆ ದಿನಗಳಲ್ಲಿ ಆದರೆ, ರಸ್ತೆಯಲ್ಲಿ ಬಿದ್ದಿರುವ ನೋಟುಗಳನ್ನು ಗಮನಿಸಿದ ಜನರು ಯಾರಿಗೂ ತಿಳಿಯದಂತೆ ತೆಗೆದುಕೊಂಡು ಹೋಗಿರುತ್ತಿದ್ದರು. ಆದರೆ, ದೇಶದೆಲ್ಲೆಡೆ ಕೋವಿಡ್​ 19 ಪಿಡುಗು ಹಬ್ಬಿರುವ ಕಾರಣ, ನೋಟುಗಳ ಮೂಲಕ ಕರೊನಾ ವೈರಸ್​ ಹರಡಲು ಹುನ್ನಾರ ನಡೆಸುತ್ತಿರುವ ಭೀತಿಯಿಂದಾಗಿ, ಜನರು ಆ ನೋಟುಗಳನ್ನು ಪೊಲೀಸರ ವಶಕ್ಕೆ ನೀಡಿದರು!

ಇದಕ್ಕೆ ಕಾರಣವೂ ಇಲ್ಲದಿಲ್ಲ. ಲಖನೌ ಸುತ್ತಮುತ್ತ ವಿಡಿಯೋ ತುಣುಕು ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿರುವುದು ಇದಕ್ಕೆ ಕಾರಣ. ಆ ವಿಡಿಯೋ ತುಣುಕಿನಲ್ಲಿ ಅಪರಿಚಿತನೊಬ್ಬ ಒಂದು ಮನೆಯ ಎದುರು 500 ರೂ. ನೋಟು ಎಸೆದು, ಡೋರ್​ಬೆಲ್​ ಮಾಡಿ ಹೋಗುತ್ತಾನೆ. ಆ ಮನೆಯ ಹುಡುಗ ಬಾಗಿಲು ತೆಗೆದು ನೋಡಿದಾಗ ಯಾರೂ ಕಾಣಿಸುವುದಿಲ್ಲ. ಆದರೆ, ಬಾಗಿಲಲ್ಲಿ 500 ರೂ. ನೋಟು ಬಿದ್ದಿರುವುದನ್ನು ಗಮನಿಸುತ್ತಾನೆ. ಬಾಗಿಲು ಹಾಕಿಕೊಂಡು ತನ್ನ ತಾಯಿಗೆ ನೋಟಿನ ವಿಷಯ ತಿಳಿಸುತ್ತಾನೆ. ಆಗ ಆಕೆ ಗಾಬರಿಗೊಳ್ಳುತ್ತಾಳೆ.

ಬಳಿಕ ಸ್ಯಾನಿಟೈಸರ್​ನೊಂದಿಗೆ ಹೊರಬರುವ ಬಾಲಕ, ಅದನ್ನು ನೋಟಿನ ಮೇಲೆ ಸಿಂಪಡಿಸುತ್ತಾನೆ. ನಂತರ ಅದನ್ನು ಪಕ್ಕದ ಮನೆಯವರ ಬಾಗಿಲಿಗೆ ದಬ್ಬಿ ಒಳ ಹೋಗುತ್ತಾನೆ. ನೋಟುಗಳ ಮೂಲಕ ಕರೊನಾ ಹಬ್ಬಿಸಲು ಯತ್ನಿಸಲಾಗುತ್ತಿದೆ ಎಂಬ ಭೀತಿಯಿಂದಾಗಿ ಆತ ಹಾಗೆ ನಡೆದುಕೊಳ್ಳುತ್ತಾನೆ ಎಂದು ಪೊಲೀಸರು ವಿವರಿಸಿದ್ದಾರೆ.

https://www.vijayavani.net/shivasena-objects-of-parallel-governance-in-maharastra/