ವಾಹನಗಳ ದಟ್ಟಣೆ ಉಂಟಾದಾಗ ರಸ್ತೆ ದಾಟಲು ಸಾರ್ವಜನಿಕರು ಪರದಾಡಬೇಕಾದ ಪರಿಸ್ಥಿತಿ ಇದೆ. ಬಸ್ ಡಿಪೋ, ತಂಬಾಕು ಹರಾಜು ಮಾರುಕಟ್ಟೆ, ತಾಲೂಕು ಕ್ರೀಡಾಂಗಣ, ಪ್ರಥಮ ದರ್ಜೆ ಕಾಲೇಜು, ಸರ್ಕಾರಿ ಪಾಲಿಟೆಕ್ನಿಕ್ ಮತ್ತು ಐಟಿಐ ಕಾಲೇಜು ಸೇರಿದಂತೆ ಬಹುತೇಕ ಶಿಕ್ಷಣ ಸಂಸ್ಥೆಗಳು ಇದೇ ರಸ್ತೆಯಲ್ಲಿ ಇದ್ದು ವಾಹನಗಳ ಓಡಾಟವೂ ಹೆಚ್ಚು ಇರುತ್ತದೆ. ಕಿರಿದಾದ ರಸ್ತೆಯಲ್ಲಿ ವಾಹನಗಳ ನಿಲುಗಡೆಗೂ ಸೂಕ್ತ ಅವಕಾಶ ಇರುವುದಿಲ್ಲ. ಪರಿಣಾಮ ರಸ್ತೆ ಬದಿಯಲ್ಲಿ ದ್ವಿಚಕ್ರ ವಾಹನಗಳನ್ನು ನಿಲ್ಲಿಸುವ ಅನಿವಾರ್ಯತೆ ಎದುರಾಗಿದೆ. ಮತ್ತೊಂದೆಡೆ ದೊಡ್ಡ ವಾಹನಗಳು ಸಂಚರಿಸಲು ಪರದಾಡುವಂತಿದ್ದು, ಇವುಗಳ ನಡುವೆ ಸಾರ್ವಜನಿಕರು, ವಿದ್ಯಾರ್ಥಿಗಳು, ಮಹಿಳೆಯರು ಮತ್ತು ವೃದ್ಧರು ರಸ್ತೆ ದಾಟಲು ಹರಸಾಹಸಪಡಬೇಕಿದೆ.
