ಕರೊನಾ ಕಾರಣಕ್ಕೆ ಲಾಕ್ಡೌನ್ ಹೇರಿದ ರಾಜ್ಯ ಸರ್ಕಾರ, ವಿವಿಧ ವರ್ಗಕ್ಕೆ ಆರ್ಥಿಕ ಪ್ಯಾಕೇಜ್ ಘೋಷಿಸಿದೆ. ಆದರೆ, ಕೆಲವು ವರ್ಗಗಳನ್ನು ಕಡೆಗಣಿಸಿರುವುದರ ಬಿಸಿ ಈಗ ಬಿಜೆಪಿಗೆ ತಟ್ಟಲಾರಂಭಿಸಿದೆ. ಪಕ್ಷದ ಶಾಸಕರು ಮತ್ತು ಮುಖಂಡರು ಹೋದಲ್ಲಿ ಬಂದಲ್ಲಿ, ನಮಗೆಲ್ಲಿ ಪ್ಯಾಕೇಜ್ ಎಂದು ಕೇಳಲಾರಂಭಿಸಿದ್ದಾರೆ. ನೆರವು ನಿರೀಕ್ಷೆಯಲ್ಲಿದ್ದ, ಸಂಕಷ್ಟ ವ್ಯಾಪ್ತಿಯಲ್ಲಿ ಬರುವ ಹೋಟೆಲ್ ಕಾರ್ವಿುಕರು, ಮ್ಯಾಕ್ಸಿಕ್ಯಾಬ್- ಪ್ರವಾಸಿ ವಾಹನ ಮಾಲೀಕರು, ಮೆಕ್ಯಾನಿಕ್ಗಳು, ಕ್ಯಾಟರಿಂಗ್ ಹಾಗೂ ಅಡುಗೆ ಕೆಲಸದವರು, ಫ್ಲವರ್ ಡೆಕೋರೇಟರ್ಸ್, ಪ್ರವಾಸೋದ್ಯಮ ಹಾಗೂ ಆತಿಥ್ಯ ಕ್ಷೇತ್ರದವರು ಎರಡು ಬಾರಿ ಪ್ಯಾಕೇಜ್ ಘೋಷಿಸಿದರೂ ಸರ್ಕಾರದ ಕಣ್ಣಿಗೆ ಮಾತ್ರ ಬೀಳದಾದರು. ಹೀಗಾಗಿ ಇವರೆಲ್ಲ ಸರ್ಕಾರದ ವಿರುದ್ಧ ಬೇಸರ ಹೊರಹಾಕಲು ಆರಂಭಿಸಿದ್ದಾರೆ. ನಾವು ಸಂಕಷ್ಟದಲ್ಲಿದ್ದೇವೆ, ನಮ್ಮನ್ನು ಪರಿಗಣಿಸಿಲ್ಲ ಎಂದು ಸಾಮಾಜಿಕ ಜಾಲತಾಣದಲ್ಲೂ ಅಭಿಪ್ರಾಯ ವ್ಯಕ್ತಪಡಿಸುತ್ತಿದ್ದಾರೆ. ಒಟ್ಟಾರೆ 16-18 ವರ್ಗದವರನ್ನು ಪ್ಯಾಕೇಜ್ನಲ್ಲಿ ಪರಿಗಣಿಸಿದ ಸರ್ಕಾರ, ನಮ್ಮನ್ನು ಕಣ್ಣೆತ್ತಿಯೂ ನೋಡಿಲ್ಲ ಎಂಬುದು ಹೋಟೆಲ್ ಕಾರ್ವಿುಕರ ಬೇಸರವಾಗಿದೆ. ಇತ್ತ ಲಾಕ್ಡೌನ್ ವೇಳೆ ಹೋಟೆಲ್ ತೆರೆದು ಪಾರ್ಸೆಲ್ ವಿತರಣೆಗೆ ಅವಕಾಶ ನೀಡಲಾಗಿದೆ ಎಂದು ಹೋಟೆಲ್ ಕಾರ್ವಿುಕರಿಗೆ ಪರಿಹಾರದ ಅವಕಾಶ ನೀಡಲಾಗಿಲ್ಲ ಎಂಬುದು ಅಧಿಕಾರಿಗಳ ವಾದವಾಗಿದೆ. ಆದರೆ, ತಳಮಟ್ಟದ ಪರಿಸ್ಥಿತಿಯನ್ನು ಸರ್ಕಾರ ಗಮನಿಸಿಲ್ಲ ಎಂಬುದು ಹೋಟೆಲ್ ಕಾರ್ವಿುಕರ ಬೇಸರವಾಗಿದೆ. ಶೇ.10 ಹೋಟೆಲ್ಗಳೂ ತೆರೆದಿಲ್ಲ, ತೆರೆದ ಹೋಟೆಲ್ಗಳಲ್ಲೂ ಕಾರ್ವಿುಕರಿಗೆ ಕೆಲಸವಿಲ್ಲ. ಅಡುಗೆ ಸಿಬ್ಬಂದಿಗೆ ಮಾತ್ರ ಅವಕಾಶವಿದೆ. ಕೆಲಸವಿಲ್ಲದೇ ಸಂಬಳವಿಲ್ಲ. ಸರ್ಕಾರ ಈ ವಾಸ್ತವ ಅರಿಯಬೇಕು ಎಂಬುದು ಅವರ ಅಭಿಪ್ರಾಯವಾಗಿದೆ.
