ಎದುರಿಸುತ್ತಿರುವ ಸಮಸ್ಯೆಗೆ ಪರಿಹಾರ ವಾಗಿ 50 ಸಾವಿರ ಕೋಟಿ ರೂ.ಗಳ ನೆರವನ್ನು ಆರ್ಬಿಐ ಘೋಷಿಸಿದೆ. ಮಾರುಕಟ್ಟೆಯಲ್ಲಿ ಹಣದ ಹರಿವನ್ನು ಹೆಚ್ಚಿಸುವ ಇನ್ನೊಂದು ಕ್ರಮವಾಗಿ ರಿವರ್ಸ್ ರೆಪೊ ದರವನ್ನು (ಬ್ಯಾಂಕುಗಳು ಆರ್ಬಿಐನಲ್ಲಿ ಇಡುವ ಠೇವಣಿಗೆ ನೀಡುವ ಬಡ್ಡಿ) 25 ಮೂಲಾಂಶದಷ್ಟು ಕಡಿಮೆ ಮಾಡಿದ್ದು, ಶೇ.4ರಿಂದ ಶೇ.3.75ಕ್ಕೆ ತಗ್ಗಿಸಿದೆ. ಆರ್ಬಿಐ ಬಳಿ ರಿವರ್ಸ್ ರೆಪೊ ವಿಭಾಗದಲ್ಲಿ ಸುಮಾರು 6.9 ಲಕ್ಷ ಕೋಟಿ ರೂ.ಗಳಷ್ಟು ಮೊತ್ತದ ಹಣವಿದ್ದು, ಈ ಕ್ರಮದಿಂದಾಗಿ ಬ್ಯಾಂಕುಗಳು ಇ ಹಣವನ್ನು ಸಾಲ ನೀಡುವುದಕ್ಕಾಗಿ ಬಳಸಿಕೊಳ್ಳಲು ಅನುಕೂಲವಾಗುತ್ತದೆ ಎಂದು ಆರ್ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಹೇಳಿದ್ದಾರೆ. ಕರೊನಾ ವಿರುದ್ಧದ ಹೋರಾಟಕ್ಕಾಗಿ ರಾಜ್ಯಗಳು ಹಲವಾರು ಕ್ರಮಗಳನ್ನು ತೆಗೆದುಕೊಳ್ಳಬೇಕಾಗಿ ಬಂದಿದ್ದು, ಹೆಚ್ಚಿನ ಹಣದ ಅಗತ್ಯವಿದೆ. ಹೀಗಾಗಿ, ರಾಜ್ಯಗಳು ಅಲ್ಪಕಾಲೀನ ನಿಧಿಯಿಂದ ಪಡೆಯಬಹುದಾದ ಹಣದ ಮಿತಿಯನ್ನು ಶೇ.60ಕ್ಕೆ ಆರ್ಬಿಐ ಹೆಚ್ಚಿಸಿದೆ. ಇದರಿಂದ ರಾಜ್ಯಗಳಿಗೆ ಹಣ ಹೊಂದಾಣಿಕೆಗೆ ಅನುವಾಗುತ್ತದೆ. ಮೊದಲೇ ಎಲ್ಲ ರಾಜ್ಯಗಳು ಹಣಕಾಸು ಸಮಸ್ಯೆಯನ್ನು ಎದುರಿಸುತ್ತಿದ್ದು, ಇಂಥ ಹೆಜ್ಜೆಗಳಿಂದ ಸ್ವಲ್ಪವಾದರೂ ಪ್ರಯೋಜನವಾಗುತ್ತದೆ. ಏಕೆಂದರೆ, ಕರೊನಾ ನಿಯಂತ್ರಣಕ್ಕೆ ಯಾವುದೇ ರೀತಿಯಲ್ಲಿ ತೊಂದರೆಯಾಗದಂತೆ ನೋಡಿಕೊಳ್ಳುವುದು ಮುಖ್ಯ. ಇದಲ್ಲದೆ, ನಬಾರ್ಡ್ ಸೇರಿ ಮೂರು ಸಂಸ್ಥೆಗಳಿಗೆ ಒಂದು ಲಕ್ಷ ಕೋಟಿ ರೂ. ನೆರವನ್ನು ಆರ್ಬಿಐ ಘೋಷಿಸಿದೆ. ಸದ್ಯದ ಆರ್ಥಿಕ ಹಿಂಜರಿತದ ಹಿನ್ನೆಲೆಯಲ್ಲಿ, ವಿಶ್ವ ಬ್ಯಾಂಕ್ ಹಾಗೂ ಕೆಲ ಹಣಕಾಸು ವಿಶ್ಲೇಷಣಾ ಸಂಸ್ಥೆಗಳು ಭಾರತದ ಮುಂದಿನ ವರ್ಷದ ಆರ್ಥಿಕ ಬೆಳವಣಿಗೆ ದರ ಕಡಿಮೆಯಾಗಬಹುದೆಂದು ಈಗಾಗಲೇ ಅಂದಾಜಿಸಿವೆ. ಹೀಗಾಗಿ, ಮಾರುಕಟ್ಟೆಯಲ್ಲಿ ಮತ್ತು ವಿದೇಶಿ ಹೂಡಿಕೆದಾರರಲ್ಲಿ ವಿಶ್ವಾಸ ಕುದುರಿಸುವ ಕೆಲಸ ಆಗಬೇಕಾಗುತ್ತದೆ. ಇಲ್ಲಿ ಇನ್ನೊಂದು ಅಂಶವೂ ಮುಖ್ಯ. ಅದೆಂದರೆ, ಸರ್ಕಾರ ಮತ್ತು ಆರ್ಬಿಐ ಇಂಗಿತ ಹಾಗೂ ಉದ್ದೇಶಕ್ಕೆ ಬ್ಯಾಂಕುಗಳು ಸಹ ಸೂಕ್ತರೀತಿಯಲ್ಲಿ ಸ್ಪಂದಿಸಬೇಕಾಗುತ್ತದೆ. ಈ ಹಿಂದೆ, ಆರ್ಬಿಐ ರೆಪೊ ದರವನ್ನು ಕಡಿಮೆ ಮಾಡಿದಾಗ, ಕೆಲ ಬ್ಯಾಂಕುಗಳು ಅದರ ಪ್ರಯೋಜನವನ್ನು ಗ್ರಾಹಕರಿಗೆ ಸರಿಯಾದ ರೀತಿಯಲ್ಲಿ ವರ್ಗಾಯಿಸಿರಲಿಲ್ಲ ಎಂಬ ಆಕ್ಷೇಪ-ಅಸಮಾಧಾನಗಳು ವ್ಯಕ್ತವಾಗಿದ್ದವು. ಈಗಂತೂ ದೇಶ ಮತ್ತು ಇಡೀ ವಿಶ್ವದಲ್ಲಿ ಕರೊನಾ ವಿರುದ್ಧ ಅಕ್ಷರಶಃ ಹೋರಾಟವನ್ನೇ ನಡೆಸಲಾಗುತ್ತಿದೆ. ಈ ಹೋರಾಟದಲ್ಲಿ ಎಲ್ಲರೂ ಅವರವರ ನೆಲೆಯಲ್ಲಿ ಕೈಜೋಡಿಸಬೇಕಾದುದು ಕಾಲದ ಅಗತ್ಯ.
