ಜಿಎಸ್​ಟಿ ಸಂಗ್ರಹದಲ್ಲಿ ರಾಜ್ಯಕ್ಕೆ ಮೂರನೇ ಸ್ಥಾನ; 85 ಸಾವಿರ ಕೋಟಿ ರೂ.ನಷ್ಟು ಸಂಗ್ರಹ

ಬೆಂಗಳೂರು: ಸರಕು ಮತ್ತು ಸೇವಾ ತೆರಿಗೆ ಸಂಗ್ರಹದಲ್ಲಿ ಕರ್ನಾಟಕ ಗಣನೀಯ ಪ್ರಗತಿ ಸಾಧಿಸಿದ್ದು, 2021ರ ಏಪ್ರಿಲ್​ನಿಂದ 2022 ಮಾರ್ಚ್ ಅಂತ್ಯದವರೆಗೆ 85 ಸಾವಿರ ಕೋಟಿ ರೂ.ನಷ್ಟು ಸಂಗ್ರಹಿಸಿ ದೇಶದಲ್ಲಿ ಮೂರನೇ ಸ್ಥಾನದಲ್ಲಿದೆ.

ಮಹಾರಾಷ್ಟ್ರ ಮತ್ತು ಗುಜರಾತ್ ಮೊದಲ ಎರಡು ಸ್ಥಾನದಲ್ಲಿವೆ. ಕರೊನಾ ಎರಡನೇ ಅಲೆಯ ಹೊಡೆತದಿಂದ ಹಂತಹಂತವಾಗಿ ಚೇತರಿಸಿಕೊಂಡ ರಾಜ್ಯವು 2021ರ ಆರ್ಥಿಕ ವರ್ಷಕ್ಕೆ ಹೋಲಿಸಿದರೆ ಜಿಎಸ್​ಟಿ ತೆರಿಗೆ ಸಂಗ್ರಹದಲ್ಲಿ ಗಣನೀಯ ಪ್ರಗತಿ ಕಂಡಿದೆ.

2021ರಲ್ಲಿ ಏಪ್ರಿಲ್- ಮೇನಲ್ಲಿ ಕರೊನಾ ಹಾಗೂ ಲಾಕ್​ಡೌನ್ ಕಾರಣಕ್ಕೆ ಜಿಎಸ್ಟಿ ಸಂಗ್ರಹದ ಮೇಲೆ ಗಾಢ ಪರಿಣಾಮ ಬೀರಿತ್ತು. ಹಂತಹಂತವಾಗಿ ಲಾಕ್​ಡೌನ್ ಸಡಿಲಿಕೆಯಾಗಿ ರಫ್ತು ಹೆಚ್ಚಾಗುತ್ತಿದ್ದಂತೆ ಜಿಎಸ್ಟಿ ಕೂಡ ಗಣನೀಯವಾಗಿ ವೃದ್ಧಿಯಾಗಿರುವುದು ಕಾಣಿಸಿತು.

ಅಧಿಕಾರಿಗಳು ವಿವರಿಸುವಂತೆ ಕೋವಿಡ್ ಆತಂಕ ಇಲ್ಲದಿದ್ದರೆ ತೆರಿಗೆ ಸಂಗ್ರಹದಲ್ಲಿ ಇನ್ನಷ್ಟು ಪ್ರಗತಿ ಸಾಧ್ಯವಿತ್ತು, ಆದರೂ ನಿಧಾನವಾಗಿ ಆರ್ಥಿಕ ಚಟುವಟಿಕೆಯಲ್ಲಿ ಚೇತರಿಕೆ ಕಾಣಿಸಿರುವ ಪ್ರತಿಬಿಂಬವೇ ಈ ಅಂಕಿ ಸಂಖ್ಯೆ ಎಂದು ವಿವರಿಸಿದರು.

ಜನವರಿಯಲ್ಲಿ ದೇಶದ ಜಿಎಸ್ಟಿ ಸಂಗ್ರಹ 1,40,986 ಕೋಟಿ ರೂ. ಆಗಿತ್ತು. ಮಾರ್ಚ್​ನಲ್ಲಿ 1,42,095 ಕೋಟಿ ರೂ. ತಲುಪಿದೆ. ಈ ಬೆಳವಣಿಗೆಯು ಸಮಾಧಾನ ತರುವ ಸಂಗತಿ ಎಂದು ವಿವರಿಸುವ ಅವರು, ಜಿಎಸ್ಟಿ ವಂಚನೆ ಪ್ರಕರಣಕ್ಕೆ ಕಡಿವಾಣ ಹಾಕುವುದು ಹಾಗೂ ಜಿಎಸ್ಟಿ ವ್ಯಾಪ್ತಿಯಿಂದ ಹೊರಗುಳಿದ ದೊಡ್ಡ ಸಮುದಾಯ ಸೇರ್ಪಡೆಯಾದರೆ ದೇಶದ ತೆರಿಗೆ ಸಂಗ್ರಹ ಇನ್ನಷ್ಟು ಸಮೃದ್ಧವಾಗಲಿದೆ ಎಂದು ತಿಳಿಸಿದರು.

https://www.vijayavani.net/i-am-not-against-prayers-but-the-government-should-take-a-decision-on-removing-mosque-loudspeakers/

https://www.vijayavani.net/boy-made-hoax-call-to-railway-station-just-to-play-pub-g/