ತಾಲೂಕಿನ ಯಲವಟ್ಟಿ ಗ್ರಾಮದಲ್ಲಿ ಭಾನುವಾರ ಶಿವಮೊಗ್ಗ ತಾಲೂಕು ಗ್ರಾಮಾಂತರ ಶ್ರೀ ತರಳುಬಾಳು ಸೇವಾ ಸಮಿತಿಯಿಂದ ಶ್ರೀ ಶಿವಕುಮಾರ ಶಿವಾಚಾರ್ಯ ಸ್ವಾಮೀಜಿಯ 32ನೇ ಶ್ರದ್ಧಾಂಜಲಿ ಸಮಾರಂಭದ ದಾಸೋಹಕ್ಕೆ ಭಕ್ತಿ ಸಮರ್ಪಣೆಯ ಸಾನ್ನಿಧ್ಯ ವಹಿಸಿ ಆಶೀರ್ವಚನ ನೀಡಿದ ಅವರು, ಮಠದಲ್ಲಿ ನಡೆಯುತ್ತಿರುವ ವಿದ್ಯಮಾನಗಳು ಬಗ್ಗೆ ಸಭೆಯಲ್ಲಿ ಪ್ರಸ್ತಾಪ ಮಾಡಬಾರದೆಂದು ಭಾವಿಸಿದ್ದೆ. ಆದರೆ ಕೆಲವರು ತಮ್ಮ ಮೇಲೆ ಮಾಡುತ್ತಿರುವ ಆಪಾದನೆಗಳಿಂದ ಮನಸ್ಸಿಗೆ ತುಂಬಾ ಬೇಸರವಾಗಿದೆ. ಆ ಕಾರಣಕ್ಕಾಗಿ ಇಂದು ಅನಿವಾರ್ಯವಾಗಿ ಮಾತನಾಡುತ್ತಿದ್ದೇನೆ ಎಂದರು.
ಹಳ್ಳಿಹಳ್ಳಿಗಳಲ್ಲಿ ಯುವಕರ ಹೆಸರಲ್ಲಿ, ವಾಟ್ಸ್ಆ್ಯಪ್, ಟ್ವಿಟರ್(ಎಕ್ಸ್), ಫೇಸ್ಬುಕ್ಗಳ ಮೂಲಕ ಊಹಾಪೋಹಾ ಮಾಡಲಾಗಿತ್ತು. ಅಪಪ್ರಚಾರ ಮಾಡಲಾಯಿತು. ಒಸುಳ್ಳು ಆಪಾದನೆಯಿಂದ ತುಂಬಾ ಬೇಸರವಾಯಿತು. ಆದರೆ ಸತ್ಯವನ್ನು ಎಲ್ಲರೂ ಅರಿಯಬೇಕಿದೆ. ಆ ಕಾರಣಕ್ಕೆ ವಾಸ್ತವ ಸಂಗತಿಗಳನ್ನು ಮನವರಿಕೆ ಮಾಡಿಕೊಡಲಾಗುತ್ತಿದೆ ಎಂದರು.
ಈಗಿನ ಗುರುಗಳು ಬೆಂಗಳೂರಿನಲ್ಲಿರುವ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯಲು ಹೋದಾಗ 25 ಲಕ್ಷ ರೂ. ಕೊಟ್ಟು ಬಂದಿದ್ದಾರೆ. ಆಸ್ಪತ್ರೆಯವರು ಕೇಳದಿದ್ದರೂ ಲಕ್ಷಾಂತರ ರೂ. ಕೊಟ್ಟು ಬಂದಿದ್ದಾರೆಂದು ನನ್ನ ಮೇಲೆ ಆರೋಪ ಮಾಡಲಾಗುತ್ತಿದೆ. ಬೆಂಗಳೂರಿನ ಸ್ಪರ್ಶ ಆಸ್ಪತ್ರೆಗೆ 25 ಲಕ್ಷ ರೂ. ಕೊಟ್ಟಿರುವುದು ನಿಜ. ನಾನು ಕೊಟ್ಟಿದ್ದು 2021ರ ಮಾರ್ಚ್ನಲ್ಲಿ. ಆಗ ಕರೊನಾ ಸಂದರ್ಭ. ಎರಡು-ಮೂರು ಬಾರಿ ಆಸ್ಪತ್ರೆಗೆ ಚಿಕಿತ್ಸೆಂದು ಹೋಗಿದ್ದೆ. ಒಮ್ಮೆ ದೇಹದ ಸಂಪೂರ್ಣ ಪರೀಕ್ಷೆ ಮಾಡುತ್ತೇವೆ. ಒಂದು ವಾರ ಆಸ್ಪತ್ರೆಯಲ್ಲೇ ಇರಬೇಕೆಂದು ವೈದ್ಯರು ಹೇಳಿದ್ದರು. ಎರಡು-ಮೂರು ಬಾರಿ ಹೋದರೂ ಒಮ್ಮೆಯೂ ಹಣ ಪಡೆದಿರಲಿಲ್ಲ. ಆ ಕಾರಣಕ್ಕೆ ಆಲೋಚನೆ ಮಾಡಿ 25 ಲಕ್ಷ ರೂ. ಚೆಕ್ ಕೊಟ್ಟಿದ್ದೆ. ಅದು ಭಕ್ತರ ಕಾಣಿಕೆಯಿಂದ ಬಂದ ಹಣವಾಗಿದ್ದು ಅದು ಭಕ್ತಾದಿ(ಬಡವರು)ಗಳಿಗೆ ಉಪಯೋಗ ಆಗಬೇಕೆಂದು ಆಸ್ಪತ್ರೆಯವರಿಗೆ ತಿಳಿಸಿದ್ದೆ. ಆದರೂ ನನ್ನ ಮೇಲೆ 2021ರ ಅಕ್ಟೋಬರ್ನಲ್ಲಿ ಕೇಸ್ ಹಾಕಿದ್ದಾರೆ ಎಂದು ಬೇಸರ ವ್ಯಕ್ತಪಡಿಸಿದರು.
