ಹಳೇ ರಸ್ತೆ ಕಡಗಣನೆ: ಕೆಲವು ತಿಂಗಳ ಹಿಂದಷ್ಟೇ ಮಧುವನಹಳ್ಳಿ ಹೊರವಲಯದಲ್ಲಿ ಬೈಪಾಸ್ ರಸ್ತೆ ನಿರ್ಮಾಣವಾಗಿದೆ. ಕಾರಣ ಬೆಂಗಳೂರು, ಮಳವಳ್ಳಿ, ಕನಕಪುರ, ಮೈಸೂರು, ಚಾಮರಾಜನಗರದಿಂದ ಬರುವ ವಾಹನಗಳು ನರೀಪುರ ಬೈಪಾಸ್ ಜಂಕ್ಷನ್ ಮೂಲಕ ಮಧುವನಹಳ್ಳಿ ಬೈಪಾಸ್ ಮೇಲೆ ಮಹದೇಶ್ವರ ಬೆಟ್ಟ, ತಮಿಳುನಾಡಿಗೆ ಸಂಚರಿಸುತ್ತಿವೆ. ಮೊದಲಾದರೆ ಪ್ರತಿಯೊಂದು ವಾಹನವು ಕೊಳ್ಳೇಗಾಲ ಮಾರ್ಗವಾಗಿ ಮಧುವನಹಳ್ಳಿ ಮೂಲಕ ಮಲೆಮಹದೇಶ್ವರ ಬೆಟ್ಟಕ್ಕೆ ತೆರಳುತ್ತಿದ್ದವು. ಬೈಪಾಸ್ ರಸ್ತೆ ನಿರ್ಮಾಣವಾದ ಬಳಿಕ ವಾಹನಗಳು ಬೈಪಾಸ್ ರಸ್ತೆಯಲ್ಲಿ ಹೆಚ್ಚು ಸಂಚಾರ ಮಾಡತೊಡಗಿವೆ. ಹಾಗಾಗಿ, ಹಳೇ ಮುಖ್ಯ ರಸ್ತೆಗಳ ಅಭಿವೃದ್ಧಿಯನ್ನು ಕಡೆಗಣಿಸಲಾಗುತ್ತಿದೆ. ಗುಂಡಿಗಳು ಬಿದ್ದು ಶೋಚನೀಯ ಸ್ಥಿತಿಯಲ್ಲಿದ್ದರೂ ಜನಪ್ರತಿನಿಧಿಗಳು ಮತ್ತು ಅಧಿಕಾರಿಗಳು ಗಮನಹರಿಸುತ್ತಿಲ್ಲ ಎಂಬುದು ಮಧುವನಹಳ್ಳಿ ಗ್ರಾಮಸ್ಥರ ಅಳಲಾಗಿದೆ. ಈ ಬಗ್ಗೆ ಲೋಕೋಪಯೋಗಿ ಇಲಾಖೆ ಅಧಿಕಾರಿ ಪ್ರತಿಕ್ರಿಯಿಸಿ, ಸದ್ಯದಲ್ಲಿಯೇ ಮಧುವನಹಳ್ಳಿ ರಸ್ತೆ ಗುಂಡಿಗಳಿಗೆ ತೇಪೆ ಹಾಕುವ ಕಾಮಗಾರಿ ನಡೆಯಲಿದೆ ಎಂದರು.
