Animal digestive systems: ಹಸುಗಳು ಹುಲ್ಲು ತಿಂದ ಮೇಲೆ ನಿಧಾನವಾಗಿ ಕುಳಿತು ಮೆಲಕು ಹಾಕುವುದನ್ನು ನಾವೆಲ್ಲರೂ ನೋಡಿರುತ್ತೇವೆ. ಆದರೆ, ಅವು ಹೀಗೆ ಆಹಾರವನ್ನು ಎರಡು ಬಾರಿ ಅಗಿದು ತಿನ್ನುವುದರ ಹಿಂದೆ ಪ್ರಕೃತಿಯ ದೊಡ್ಡ ವಿಜ್ಞಾನವೇ ಅಡಗಿದೆ ಎಂಬುದು ಹಲವರಿಗೆ ತಿಳಿದಿಲ್ಲ. ಹಸುಗಳ ಈ ವಿಶಿಷ್ಟ ಜೀರ್ಣಾಂಗ ವ್ಯವಸ್ಥೆ ಮತ್ತು ಅದರ ಹಿಂದಿರುವ ಕುತೂಹಲಕಾರಿ ವೈಜ್ಞಾನಿಕ ಸಂಗತಿಗಳ ವಿವರ ಇಲ್ಲಿದೆ.
ಹಸುಗಳು ಹುಲ್ಲು ಅಥವಾ ಮೇವನ್ನು ತಿಂದ ತಕ್ಷಣ ಅದನ್ನು ಪೂರ್ತಿಯಾಗಿ ಅಗಿಯುವುದಿಲ್ಲ, ಬದಲಿಗೆ ನೇರವಾಗಿ ನುಂಗುತ್ತವೆ. ಈ ಅರ್ಧಂಬರ್ಧ ನುಂಗಿದ ಆಹಾರವು ಹೊಟ್ಟೆಯ ಮೊದಲ ಭಾಗವಾದ 'ರೂಮೆನ್' ತಲುಪುತ್ತದೆ.
ನಂತರ, ಹಸುಗಳು ವಿಶ್ರಾಂತಿ ಪಡೆಯುವಾಗ, ರೂಮೆನ್‌ನಲ್ಲಿರುವ ಆಹಾರವು ಮತ್ತೆ ಬಾಯಿಗೆ ಬರುತ್ತದೆ. ಇದನ್ನು ಹಸುಗಳು ನಿಧಾನವಾಗಿ ಚೆನ್ನಾಗಿ ಅಗಿಯುತ್ತವೆ. ಇದನ್ನೇ ನಾವು 'ಮೆಲಕು ಹಾಕುವುದು' ಎಂದು ಕರೆಯುತ್ತೇವೆ.
ಹಸುವಿನ ಹೊಟ್ಟೆಯಲ್ಲಿವೆ ನಾಲ್ಕು ಕೋಣೆಗಳು
ಮನುಷ್ಯರಂತೆ ಹಸುಗಳಿಗೆ ಒಂದೇ ಹೊಟ್ಟೆ ಇರಲ್ಲ. ಅವುಗಳ ಜೀರ್ಣಾಂಗ ವ್ಯವಸ್ಥೆಯಲ್ಲಿ ನಾಲ್ಕು ವಿಭಿನ್ನ ಭಾಗಗಳಿವೆ
ರೂಮೆನ್: ಇದು ಹೊಟ್ಟೆಯ ಅತಿ ದೊಡ್ಡ ಭಾಗ. ಇಲ್ಲಿ ಆಹಾರ ಶೇಖರಣೆಯಾಗಿ, ಹುದುಗುವಿಕೆ (Fermentation) ಪ್ರಕ್ರಿಯೆಗೆ ಒಳಗಾಗುತ್ತದೆ.
ರೆಟಿಕ್ಯುಲಮ್: ಜೇನುಗೂಡಿನಂತಹ ರಚನೆ ಹೊಂದಿರುವ ಈ ಭಾಗವು, ಆಹಾರವನ್ನು ಮತ್ತೆ ಬಾಯಿಗೆ ಕಳುಹಿಸಲು ನೆರವಾಗುತ್ತದೆ
ಒಮಾಸಮ್: ಈ ಭಾಗವು ಆಹಾರದಲ್ಲಿರುವ ನೀರು ಹಾಗೂ ಪೋಷಕಾಂಶಗಳನ್ನು ಹೀರಿಕೊಳ್ಳುತ್ತದೆ.
ಅಬೊಮಾಸಮ್ : ಇದನ್ನು ಹಸುವಿನ 'ನಿಜವಾದ ಹೊಟ್ಟೆ' ಎನ್ನಲಾಗುತ್ತದೆ. ಇದು ಆಮ್ಲಗಳ ಸಹಾಯದಿಂದ ಆಹಾರವನ್ನು ಸಂಪೂರ್ಣವಾಗಿ ಜೀರ್ಣ ಮಾಡುತ್ತದೆ.
