Scene Movie Audio Launch: ತಮಿಳು ಚಿತ್ರರಂಗದ ರಿಯಲ್ ಕಪಲ್ ಸೂರ್ಯ ಮತ್ತು ಜ್ಯೋತಿಕಾ ಜೋಡಿಗೆ ಇರುವ ಫ್ಯಾನ್ ಬೇಸ್ ಬಗ್ಗೆ ಎಲ್ಲರಿಗೂ ಗೊತ್ತು. ಇತ್ತೀಚೆಗೆ ಈ ಜೋಡಿಯ ಪ್ರೀತಿಯ ವಿಡಿಯೋ ಒಂದನ್ನು ನೋಡಿ ಸೂರ್ಯ ಅವರ ತಮ್ಮ, ನಟ ಕಾರ್ತಿ ತಮಾಷೆಯಾಗಿ ಕಾಲೆಳೆದಿದ್ದು, ಆ ಮಾತುಗಳು ಈಗ ಅಭಿಮಾನಿಗಳ ಗಮನ ಸೆಳೆಯುತ್ತಿವೆ.
ಜಿತು ಮಾಧವನ್ ನಿರ್ದೇಶನದಲ್ಲಿ, ಸೂರ್ಯ ಮತ್ತು ಜ್ಯೋತಿಕಾ ಅವರ '2ಡಿ ಎಂಟರ್‌ಟೈನ್‌ಮೆಂಟ್' ಸಂಸ್ಥೆ ನಿರ್ಮಿಸಿರುವ 'ಸೀನ್' ಸಿನಿಮಾ ಆಡಿಯೋ ಮತ್ತು ಟ್ರೈಲರ್ ಬಿಡುಗಡೆ ಸಮಾರಂಭದಲ್ಲಿ ಕಾರ್ತಿ ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದರು. ಈ ವೇಳೆ ವೇದಿಕೆಯಲ್ಲಿ ಮಾತನಾಡಿದ ಕಾರ್ತಿ, ತಮ್ಮ ಅಣ್ಣ ಹಾಗೂ ಅತ್ತಿಗೆಯ ನಡುವಿನ ಪ್ರೀತಿಯನ್ನು ತಮಾಷೆಯಾಗಿ ಹಾಗೂ ಮುದ್ದಾಗಿ ವರ್ಣಿಸಿದ್ದಾರೆ.
ಹೆಂಡತಿಯಂದಿರು ಗಂಡಂದಿರಿಗೆ ಬೈದಿರ್ತಾರೆ
‘ಅವರಿಬ್ಬರ ನಡುವಿನ ಪ್ರೀತಿ ಸ್ವಲ್ಪ ಅತಿಯಾಗಿಯೇ ಇದೆ. ಇದನ್ನು ನೋಡುವ ಎಷ್ಟೋ ಜನ ಹೆಂಡತಿಯರು ತಮ್ಮ ಗಂಡಂದಿರಿಗೆ 'ನೋಡಿ, ಅವರು ಹೇಗೆ ಒಬ್ಬರನ್ನೊಬ್ಬರು ಪ್ರೀತಿಸುತ್ತಾರೆ... ನೀವೂ ಇದ್ದೀರಲ್ಲ’ ಎಂದು ಖಂಡಿತ ಬೈದಿರುತ್ತಾರೆ. ಆದರೆ ನಿಜ ಹೇಳಬೇಕೆಂದರೆ, ಆ ವಿಡಿಯೋ ನೋಡಲು ತುಂಬಾ ಸುಂದರವಾಗಿತ್ತು’ ಎಂದು ಕಾರ್ತಿ ವೇದಿಕೆಯಲ್ಲಿ ಹೇಳಿ ಎಲ್ಲರನ್ನೂ ನಗೆಗಡಲಿನಲ್ಲಿ ತೇಲಿಸಿದರು.
