ಸುರಕ್ಷಿತ-ಸುಶಿಕ್ಷಿತ ದೇಶಗಳಿಗೆ ಭೇಟಿ ನೀಡುವುದೆಂದರೆ ನಿಜಕ್ಕೂ ಸಂಭ್ರಮವೇ ಸರಿ. ಇನ್ನು ಕಡಿಮೆ ಖರ್ಚಿನ ವಿದೇಶ ಪ್ರವಾಸವೆಂದರೆ ಅದು ಸ್ವರ್ಗ. ಮನಸೆಳೆಯುವ ವಾತಾವರಣ, ಕಣ್ಣು ಹಾಯಿಸಿದಷ್ಟೂ ಹಸಿರು, ಮನಕ್ಕೆ ಮುದನೀಡುವ ಕಡಲ ತಡಿ, ಆಕರ್ಷಕ ವಾಸ್ತು ವೈಭವದ ಕಟ್ಟಡಗಳು, ಎಲ್ಲಕ್ಕಿಂತ ಮಿಗಿಲಾದ ಶಿಸ್ತಿನ ಜತೆಗೆ ಶುಚಿತ್ವ... ಹೀಗೆ ಎಲ್ಲ ವಿಷಯಗಳಲ್ಲೂ ಚಿತ್ತಾಕರ್ಷಿಸುತ್ತ ಭಾರತೀಯರಿಗೆ ನೆಚ್ಚಿನ ಪ್ರವಾಸಿತಾಣವಾಗುತ್ತಿದೆ ದ್ವೀಪರಾಷ್ಟ್ರ ವಿಯೆಟ್ನಾಂ. ಪ್ರಪಂಚದ ಸುರಕ್ಷಿತ ರಾಷ್ಟ್ರಗಳ ಪಟ್ಟಿಯಲ್ಲಿ ಟಾಪ್ ಟೆನ್ನಲ್ಲಿರುವ ವಿಯೆಟ್ನಾಂಗೆ ಭಾರತೀಯ ಪ್ರವಾಸಿಗರು ಅಪಾರ ಪ್ರಮಾಣದಲ್ಲಿ ಲಗ್ಗೆಯಿಡುತ್ತಿದ್ದಾರೆ. ನಮ್ಮ ಕರ್ನಾಟಕ ಕರಾವಳಿಯ ವಾತಾವರಣ ವಿಯೆಟ್ನಾಂನಲ್ಲೂ ಸಿಗೋ ಕಾರಣಕ್ಕೆ ಸಹಜವಾಗಿಯೇ ಕನ್ನಡಿಗರೂ ಆಕರ್ಷಿತರಾಗುತ್ತಿದ್ದಾರೆ. ನಮ್ಮ ರೂಪಾಯಿಗೆ ತುಲನೆ ಮಾಡಿದರೆ ವಿಯೆಟ್ನಾಂ ಹಣದ ಮೌಲ್ಯ ತೀರಾ ಕಡಿಮೆ ಇರುವುದು ಭಾರತೀಯರಿಗೆ ಈ ವಿದೇಶ ಪ್ರವಾಸ ಪಾಕೆಟ್ ಫ್ರೆಂಡ್ಲಿಯಾಗಿರೋದು ಕೂಡ ಈ ಒಲವಿಗೆ ಕಾರಣ.
