ತಾಲೂಕಿನಲ್ಲಿ ಹಿಂಗಾರು ಬೆಳೆಯಾಗಿ ಪ್ರಮುಖ ಆಹಾರದ ಬೆಳೆಯಾದ ರಾಗಿ, ಮುಸುಕಿನ ಜೋಳ, ಅವರೆ, ಅಲಸಂದೆ, ಹುರುಳಿ ಮತ್ತಿತರ ದ್ವಿದಳ ಧಾನ್ಯಗಳನ್ನು ರೈತರು ಬೆಳೆದಿದ್ದಾರೆ. ಬಿತ್ತನೆ ವೇಳೆ ಹದವಾಗಿ ಸುರಿಯುತ್ತಿದ್ದ ಮಳೆ ಬೆಳವಣಿಗೆ ಹಂತದಲ್ಲಿ ಕೈಕೊಟ್ಟು ಅನ್ನದಾತರ ಆತಂಕಕ್ಕೆ ಕಾರಣವಾಗಿತ್ತು. ಮುಖ್ಯವಾಗಿ ಮುಂಗಾರು ಹಂಗಾಮಿನಲ್ಲಿ ಪ್ರಮುಖ ವಾಣಿಜ್ಯ ಬೆಳೆಯಾಗಿ ರಾಮನಾಥಪುರ, ಕೊಣನೂರು ಹೋಬಳಿ ಭಾಗದಲ್ಲಿ ಹೆಚ್ಚಿನದಾಗಿ ಹೊಗೆಸೊಪ್ಪು ಕಟಾವು ನಂತರ ಆಹಾರದ ಬೆಳೆಯಾಗಿ ರಾಗಿ ಬಿತ್ತುವುದು ವಾಡಿಕೆ. ಜತೆಗೆ ತರಕಾರಿ ಬೆಳೆಗಳು ಹಾಗೂ ತೋಟದ ಬೆಳೆಗಳು ಕೂಡ ಬಾಡಲಾರಂಭಿಸಿದ್ದವು. ಕಸಬಾ, ದೊಡ್ಡಮಗ್ಗೆ ಹೋಬಳಿ ಭಾಗದಲ್ಲಿ ಆಲೂಗಡ್ಡೆ, ಮುಸುಕಿನ ಜೋಳದ ಬೆಳೆ ಬೆಳೆಚಿಾಗಿದೆ. ಹೆಚ್ಚಿನದಾಗಿ ಬಹುತೇಕ ಕಡೆ ರಾಗಿ ಬಿತ್ತನೆ ಮಾಡಿದ್ದು ಮಳೆಯಿಲ್ಲದೆ ಬೆಳೆ ಒಣಗುತ್ತಿತ್ತು. ಮಳೆ ಬಿದ್ದರೆ ರಾಗಿ ಫಸಲು ಕೈಗೆ ಸಿಗುವ ಆಶಾಭಾವನೆಯಿಂದ ರೈತರು ಮುಗಿಲಿನತ್ತ ದೃಷ್ಟಿ ನೆಟ್ಟಿದ್ದರು. ಮುಸುಕಿನ ಜೋಳದ ಬೆಳೆಗೆ ಭರ್ಜರಿ ಮಳೆ ಅವಶ್ಯಕತೆ ಇತ್ತು. ಮಳೆಯಿಲ್ಲದೆ ಕೈಗೆ ಬಂದ ತುತ್ತು ಬಾಯಿಗೆ ಬಾರದ ಸ್ಥಿತಿ ನಿರ್ಮಾಣವಾಗಿತ್ತು. ಮಳೆಯನ್ನೇ ನೆಚ್ಚಿಕೊಂಡು ಇಂದಲ್ಲ ನಾಳೆ ಉತ್ತಮವಾಗಿ ಮಳೆ ಸುರಿಯಬಹುದು ಎನ್ನುವ ಆಶಾಭಾವನೆಯಲ್ಲಿಯೇ ರೈತರು ದಿನ ದೂಡುವಂತಾಗಿತ್ತು. ಕಳೆದೊಂದು ತಿಂಗಳಿನಿಂದ ಮಾಯವಾಗಿದ್ದ ಮಳೆ ಇದೀಗ ಹದವಾಗಿ ಸುರಿದಿರುವುದು ರೈತರ ಸಂತಸಕ್ಕೆ ಕಾರಣವಾಗಿದೆ.
