‘ದಸರಾ ಯುವ ಸಂಭ್ರಮ’ದ ಮೆರುಗು ಹೆಚ್ಚಿಸದ ನೃತ್ಯ

ಮೈಸೂರು: ಒಂದೆಡೆ ದೇಶ ಭಕ್ತಿಗೀತೆ, ಮಹಿಳಾ ಸಬಲೀಕರಣ, ಸಾಂಸ್ಕೃತಿಕ ಪರಂಪರೆ, ಭಾರತೀಯ ಯೋಧರ ಪಾತ್ರ, ಆಧುನಿಕ ನೃತ್ಯ ಪ್ರಪಾರಗಳ ಬಿಂಬಿಸುವ ನೃತ್ಯಗಳ ಝಲಕ್.. ಇನ್ನೊಂದೆಡೆ ಶಿಳ್ಳೆ, ಚಪ್ಪಾಳೆ, ಚೀರಾಟಗಳ ಪ್ರೋತ್ಸಾಹ… ಅಷ್ಟೇ ಅಲ್ಲ, ವಿಶೇಷ ಮಕ್ಕಳ ನೃತ್ಯ ರೂಪಕ ‘ದಸರಾ ಯುವ ಸಂಭ್ರಮ’ದ ಮೆರುಗು ಹೆಚ್ಚಿಸಿದವು.

ಮಾನಸ ಗಂಗೋತ್ರಿಯ ಬಯಲು ರಂಗಮಂದಿರದಲ್ಲಿ ಗುರುವಾರ ಆಯೋಜಿಸಿದ್ದ ಯುವಸಂಭ್ರಮಕ್ಕೆ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ದೊರೆಯಿತು.

ತಂಡೋಪತಂಡವಾಗಿ ಗಂಗೋತ್ರಿ ಅಂಗಳಕ್ಕೆ ಬಂದು ಸೇರಿದ್ದ ಯುವ ಪಡೆಗೆ ಕಲಾವಿದರೆಲ್ಲರೂ ರಸದೌತಣ ನೀಡಿದರು. ಮೂರನೇ ದಿನವೂ ರಾಜ್ಯದ ಮೂಲೆ-ಮೂಲೆಗಳಿಂದ ಆಗಮಿಸಿದ್ದ 50ಕ್ಕೂ ಹೆಚ್ಚು ಕಾಲೇಜು ತಂಡಗಳು ಕನ್ನಡ ಪ್ರೇಮ, ದೇಶಪ್ರೇಮ, ರಾಷ್ಟ್ರೀಯ ಭಾವೈಕ್ಯತೆ, ಪೌರಾಣಿಕ, ಮೈಸೂರು ದಸರಾ ಪರಂಪರೆ, ಜಾನಪದ ನೃತ್ಯ ಸೇರಿದಂತೆ ಇತರ ವಿಷಯಗಳ ಬಗ್ಗೆ ನೃತ್ಯ ರೂಪಕ ಪ್ರದರ್ಶಿಸಿದರು. ದೇಶಪ್ರೇಮ ಸಾರುವ ಜತೆಗೆ ಪರಿಸರ ಕಾಳಜಿಯ ಬಗ್ಗೆ ಪಾಠ ಮಾಡಿದರು.