ಚಿಕ್ಕಮಗಳೂರು ಜಿಲ್ಲೆಯ ಕುದುರೆಮುಖ ಪರ್ವತ ಹಾಗೂ ಅರಣ್ಯ ಪ್ರದೇಶದ ಸೊಬಗು ಅನನ್ಯ. ಈ ಪರ್ವತ ಶ್ರೇಣಿ ಕುದುರೆಮುಖದ ಹಾಗೆ ಕಾಣಿಸುವುದರಿಂದ ಪ್ರದೇಶಕ್ಕೆ ಅದೇ ಹೆಸರು. 600 ಚದರ ಕಿ.ಮೀ.ನಷ್ಟು ವಿಸ್ತಾರವಾದ ರಾಷ್ಟ್ರೀಯ ಉದ್ಯಾನ ವಿಶ್ವಪ್ರಸಿದ್ಧ ರಕ್ಷಿತಾರಣ್ಯವಾಗಿದೆ. ರಾಷ್ಟ್ರೀಯ ಉದ್ಯಾನದಲ್ಲಿ ಚಾರಣಕ್ಕೆ 13 ಸ್ಥಾನಗಳನ್ನು ಗುರುತಿಸಲಾಗಿದೆ. ತುಂಗಾ, ಭದ್ರಾ, ನೇತ್ರಾವತಿ ಸೇರಿದಂತೆ ಹಲವು ನದಿ, ತೊರೆ, ಝುರಿಗಳ ಉಗಮ ಸ್ಥಾನ. ವನ್ಯಮೃಗಗಳ ನೈಸರ್ಗಿಕ ಸದನ. ಕುದುರೆಮುಖದಿಂದ ಅರಬ್ಬಿ ಸಮುದ್ರ ಕಾಣಿಸುತ್ತದೆ. ಸುಂದರವಾದ ಪರ್ವತ ಶ್ರೇಣಿಗಳು, ಗುಹೆಗಳು, ಕಂದಕ, ಹಳ್ಳಕೊಳ್ಳದಿಂದ ಕೂಡಿರುವ ಈ ಪ್ರದೇಶ ಸಮೃದ್ಧವಾದ ಪಕ್ಷಿಸಂಕುಲವನ್ನೂ ಹೊಂದಿದೆ. ನಿತ್ಯ ಹರಿದ್ವರ್ಣ ಕಾಡಿಗೆ ಇದು ಹೆಸರುವಾಸಿಯಾಗಿದೆ. ವರಹಾ ಪರ್ವತ ಸಾಲುಗಳು ಅಭಯಾರಣ್ಯಕ್ಕೆ ಅಂಟಿಕೊಂಡಂತೆ ಇವೆ. ಇಲ್ಲಿನ ಹನುಮಾನ ಗುಂಡಿ ಜಲಪಾತಕ್ಕೆ ಪ್ರವಾಸಿಗರು ದೊಡ್ಡ ಸಂಖ್ಯೆಯಲ್ಲಿ ಭೇಟಿ ನೀಡುತ್ತಾರೆ.
