ಆದರೆ, ಅದು ಅಷ್ಟೊಂದು ಸುಲಭ ಸಾಧ್ಯವಾಗಿರಲಿಲ್ಲ. ಏಕೆಂದರೆ ನಾವಿಂದು ಪ್ರಜಾಪ್ರಭುತ್ವ ಹಾಗೂ ಸರ್ವಧರ್ಮ ಸಮಭಾವದ ಸಂಕಲ್ಪದ ಮೇಲೆ ಸಂವಿಧಾನವನ್ನು ರಚಿಸಿಕೊಂಡಿದ್ದೇವೆ. ಇಲ್ಲಿನ ನ್ಯಾಯ ವ್ಯವಸ್ಥೆ ಅತ್ಯಂತ ಆದರ್ಶ ಪ್ರಾಯವಾಗಿದೆ. ಹೀಗಾಗಿ ಹಲವಾರು ನ್ಯಾಯಾಲಯಗಳಲ್ಲಿ ಹೋರಾಟ, ಸೋಲು-ಗೆಲುವು, ವಾದ-ವಿವಾದ, ಸವಾಲು ಪಾಟೀಸವಾಲು, ವಿಚಾರ ವಿನಿಮಯ ಸಂಧಾನ ಪ್ರಯತ್ನ ಎಲ್ಲವೂ ಮುಗಿದು ನ್ಯಾಯವಾದಿ ಪರಾಶರನ್ ರವರ ಅಗಾಧ ಪಾಂಡಿತ್ಯ, ಕಾನೂನಿನ ಜ್ಞಾನ ಹಾಗೂ ನ್ಯಾಯಾಲಯ ಒಪ್ಪಬಹುದಾದ ಸಾಕ್ಷ್ಯಳು ಸಾಂರ್ದಭಿಕ ಸಂಗತಿಗಳು, ಭಾವನೆಗಳು ಎಲ್ಲವೂ ಒಟ್ಟಿಗೆ ಸೇರಿ ಅಂತಿಮವಾಗಿ ರಾಮಜನ್ಮಭೂಮಿ ರಾಮಲಲ್ಲಾನಿಗೇ ಸೇರಿದ್ದು ಎಂಬ ತೀರ್ಪು ಬಂದಾಗ ದೇಶದ ಜನತೆ ಅದನ್ನು ಸ್ವೀಕರಿಸಿದ ರೀತಿ ತೋರಿದ ತಾಳ್ಮೆ, ಅವರನ್ನು ತಪ್ಪಾಗಿಯೇ ಭಾವಿಸಿಕೊಂಡು ಬಂದಿದ್ದ್ದ ಹಲವು ರಾಜಕಾರಣಿಗಳಿಗೆ, ಬುದ್ಧಿ ಜೀವಿಗಳಿಗೆ ಹಾಗೂ ವಿದೇಶಿ ವಿಚ್ಛಿದ್ರಕಾರಿ ಶಕ್ತಿಗಳಿಗೆ ಸ್ಪಷ್ಟ ಸಂದೇಶ ನೀಡಿತು. ಅದರಲ್ಲೂ ವೈಯಕ್ತಿಕ ಲಾಭಗಳಿಸಲು ಹೋದವರಿಗೆ ಭ್ರಮನಿರಸನವಾಯಿತು. ಎಂದೋ ಪರಿಹಾರವಾಗಬೇಕಿದ್ದ ಸಮಸ್ಯೆ ಅಂತೂ ಸುಖಾಂತ್ಯವಾಯಿತು. ಮರ್ಯಾದಾ ಪುರುಷೋತ್ತಮ ನಮ್ಮ ರಾಮಲಲ್ಲಾನಿಗೊಂದು ಮಂದಿರ ನಿರ್ಮಾಣ ಮಾಡುವ ಸಂಕಲ್ಪದ ಭೂಮಿಪೂಜೆಯ ಶುಭಘಳಿಗೆ 2020ರ ಆಗಸ್ಟ್ 5ರಂದು ಕೂಡಿಬಂದಿದೆ. ಪ್ರಪಂಚದ ಹಲವಾರು ದೇಶಗಳಲ್ಲಿ ಅಂದು ಸಂಭ್ರಮ ಮನೆಮಾಡುವ ಲಕ್ಷಣಗಳು ಗೋಚರಿಸುತ್ತಿವೆ. ಏಕೆಂದರೆ ರಾಮನ ಆದರ್ಶ ಜಗತ್ತಿನಲ್ಲೆಲ್ಲಾ ಪಸರಿಸಿದೆ. ಜಗತ್ತಿನ ಎಲ್ಲ ದೇಶಗಳಲ್ಲಿ ರಾಮಾಯಣವಿದೆ, ರಾಮನಿದ್ದಾನೆ. ಥೈಲ್ಯಾಂಡ್ ದೇಶದಲ್ಲಂತೂ ಅಲ್ಲಿನ ರಾಜನನ್ನೂ ‘ರಾಮನೆಂದೇ’ ಸಂಬೋಧಿಸುತ್ತಾರೆ. ಇಂಡೋನೇಷಿಯಾದಲ್ಲಿ ರಾಮಾಯಣದ ಬ್ಯಾಲೆ ನಡೆಯುತ್ತದೆ. ಹೀಗಿರುವಾಗ ಒಂದು ಅವಿಸ್ಮರಣೀಯ ಘಟನೆಗೆ ಸಾಕ್ಷಿಯಾಗುತ್ತಿರುವ ನಾವೆಲ್ಲರೂ ಧನ್ಯರಲ್ಲವೇ !
