Chhath Puja 2026: ಛತ್ ಮಹಾಪರ್ವದ ಸಂಧ್ಯಾ ಅರ್ಘ್ಯ ಆಚರಣೆಯ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ದೇಶದ ಜನರಿಗೆ ಹೃತ್ಪೂರ್ವಕ ಶುಭಾಶಯ ತಿಳಿಸಿದ್ದಾರೆ. ಈ ಪವಿತ್ರ ಹಬ್ಬದಿಂದ ಜನರ ಜೀವನದಲ್ಲಿ ಹೊಸ ಚೈತನ್ಯ ಮೂಡಲಿ, ಸಮಾಜದಲ್ಲಿ ಸಾಮರಸ್ಯ ಹೆಚ್ಚಲಿ ಹಾಗೂ ಎಲ್ಲರಿಗೂ ಸುಖ, ಶಾಂತಿ ಮತ್ತು ಸಮೃದ್ಧಿ ಸಿಗಲಿ ಎಂದು ಪ್ರಾರ್ಥಿಸಿದ್ದಾರೆ.
ತಮ್ಮ ಎಕ್ಸ್‌ (X) ಖಾತೆಯಲ್ಲಿ ಶುಭಾಶಯ ಹಂಚಿಕೊಂಡಿರುವ ಪ್ರಧಾನಿ ಮೋದಿ, ಪ್ರಕೃತಿಯ ಆರಾಧನೆಗೆ ಮೀಸಲಾದ ಈ ಪವಿತ್ರ ಸಂದರ್ಭ ಎಲ್ಲರಲ್ಲೂ ಹೊಸ ಜಾಗೃತಿ ಮತ್ತು ಉತ್ಸಾಹ ಮೂಡಿಸಲಿ ಎಂದು ಹಾರೈಸಿದ್ದಾರೆ. ಸೂರ್ಯದೇವನ ಕೃಪೆಯಿಂದ ಪ್ರತಿಯೊಬ್ಬರ ಜೀವನವೂ ಬೆಳಗಲಿ ಎಂದು ಆಶಿಸಿದ್ದಾರೆ. ಕೊನೆಯಲ್ಲಿ 'ಜೈ ಛಠಿ ಮೈಯಾ' ಎಂದು ಶುಭಾಶಯ ತಿಳಿಸಿದ್ದಾರೆ.
ನಾಲ್ಕು ದಿನಗಳ ಛತ್ ಪೂಜೆಯ ವಿಶೇಷತೆ ಏನು?
ಛತ್ ಪೂಜೆ ನಾಲ್ಕು ದಿನಗಳ ಕಾಲ ನಡೆಯುವ ಪ್ರಮುಖ ಹಿಂದೂ ಹಬ್ಬವಾಗಿದೆ. ಮೊದಲ ದಿನ 'ನಹಾಯ್ ಖಾಯ್' ಆಚರಣೆಯೊಂದಿಗೆ ಹಬ್ಬ ಆರಂಭವಾಗುತ್ತದೆ. ಈ ದಿನ ಭಕ್ತರು ಪವಿತ್ರ ಸ್ನಾನ ಮಾಡಿ, ಅರವ ಅಕ್ಕಿ, ಕಡಲೆ ಬೇಳೆ ಮತ್ತು ಸೋರೆಕಾಯಿಯಿಂದ ತಯಾರಿಸಿದ ಸಾಂಪ್ರದಾಯಿಕ ಆಹಾರ ಸೇವಿಸುತ್ತಾರೆ.
