ದೆಹಲಿ ಗಲಭೆ ಕುರಿತು ದ್ವೇಷ ಸಂದೇಶ ಕಳುಹಿಸಿದರೆ ಹುಷಾರ್​! ವಾಟ್ಸ್​ಆ್ಯಪ್​ನಲ್ಲೇ ದಾಖಲಾಗುತ್ತದೆ ದೂರು

ನವದೆಹಲಿ: ಈಶಾನ್ಯ ದೆಹಲಿಯಲ್ಲಿ ನಡೆದ ಹಿಂಸಾಚಾರ ದೇಶ ಮಾತ್ರವಲ್ಲದೆ ಬೇರೆ ಬೇರೆ ದೇಶಗಳಲ್ಲಿಯೂ ಸುದ್ದಿಯಾಗಿದೆ. ಈ ಕುರಿತಾಗಿ ಪರ ವಿರೋಧದ ಚರ್ಚೆಗಳು ಜೋರಾಗಿಯೇ ನಡೆದಿವೆ. ಫೇಸ್​ಬುಕ್​, ವಾಟ್ಸ್​ಆ್ಯಪ್​ನಂತಹ ಅಪ್ಲಿಕೇಷನ್​ಗಳಲ್ಲಿ ಸಾಕಷ್ಟು ದ್ವೇಷ ಸಂದೇಶಗಳು ವಿನಿಮಯವಾಗಿವೆ. ವಾಟ್ಸ್​ಆ್ಯಪ್​ನಲ್ಲಿ ವಿನಿಮಯವಾಗುತ್ತಿರುವ ದ್ವೇಷ ಸಂದೇಶಗಳಿಗೆ ಬ್ರೇಕ್​ ಹಾಕುವ ಸಲುವಾಗಿ ದೆಹಲಿ ಸರ್ಕಾರ ಹೊಸದೊಂದು ಪ್ಲ್ಯಾನ್​ ಮಾಡಿದೆ.

ನಿಮ್ಮ ವಾಟ್ಸ್​ಆ್ಯಪ್​ಗೆ ಯಾರಾದರೂ ದ್ವೇಷ ಸಂದೇಶವನ್ನು ಕಳುಹಿಸಿದರೆ, ನೀವು ಆ ಸಂದೇಶ ಕಳುಹಿಸಿದವರ ಅಥವಾ ಫಾರ್ವರ್ಡ್​ ಮಾಡಿದವರ ಹೆಸರು ಮತ್ತು ಮೊಬೈಲ್​ ಸಂಖ್ಯೆಯ ಮೇಲೆ ದೂರನ್ನು ದಾಖಲಿಸಬಹುದು. ಅಂಥವರ ವಿರುದ್ಧ ಸರ್ಕಾರ ಸರಿಯಾದ ಕ್ರಮವನ್ನು ತೆಗೆದುಕೊಳ್ಳುತ್ತದೆ.

ಈ ರೀತಿಯ ದೂರುಗಳನ್ನು ತೆಗೆದುಕೊಳ್ಳುವುದಕ್ಕೆಂದೇ ಹೊಸ ವಾಟ್ಸ್​ಆ್ಯಪ್​ ನಂಬರ್​ ಒಂದನ್ನು ತೆರೆಯುವ ಚಿಂತನೆಯನ್ನು ದೆಹಲಿ ಸರ್ಕಾರ ನಡೆಸಿದೆ. ವಾಟ್ಸ್​ಆ್ಯಪ್​ನಲ್ಲಿ ಬರುವ ದೂರುಗಳನ್ನು ಅಧಿಕಾರಿಗಳು ಪರಿಶೀಲಿಸಿ, ಸತ್ಯಾಂಶ ಹೊಂದಿರುವ ದೂರುಗಳನ್ನು ಗಣನೆಗೆ ತೆಗೆದುಕೊಂಡು ತಪ್ಪಿತಸ್ತರ ವಿರುದ್ಧ ಕ್ರಮ ತೆಗೆದುಕೊಳ್ಳಲಾಗುವುದು ಎಂದು ತಿಳಿಸಲಾಗಿದೆ. (ಏಜೆನ್ಸೀಸ್​)