ಆದರೆ, ಭಾರತದಲ್ಲಿ ನದಿ ವ್ಯವಸ್ಥೆಯ ಜಾಲಗಳು ಪ್ರಾಕೃತಿಕ ನಿಯಮಗಳಿಗೆ ಒಳಪಟ್ಟಿದ್ದು, ಋತುಕಾಲಿಕ ಬದಲಾವಣೆಗೆ ಆಸ್ಪದ ಮಾಡಿಕೊಡುತ್ತವೆ. ಹೀಗಾಗಿ, ಸಾಕಷ್ಟು ನದಿ ಮಾರ್ಗಗಳು ಪೂರ್ಣಪ್ರಮಾಣದಲ್ಲಿ ಸಂಚಾರಕ್ಕೆ ಅನುಕೂಲಕರವಾಗಿಲ್ಲ. ಜಲ ಸಾರಿಗೆಯನ್ನು ಸೂಕ್ತವಾಗಿ ಬಳಸಿಕೊಂಡರೆ ಹಲವಾರು ಅನುಕೂಲ ಹಾಗೂ ಲಾಭಗಳಿವೆ. ದೊಡ್ಡ ಪ್ರಮಾಣದ ಸರಕನ್ನು ಕಡಿಮೆ ಖರ್ಚಿನಲ್ಲಿ ರವಾನಿಸಲು ಸಾಧ್ಯವಾಗುತ್ತದೆ. ಕೈಗಾರಿಕೆಗಳಿಗೆ ಬೇಕಾದ ಕಚ್ಚಾವಸ್ತುಗಳನ್ನು, ಖನಿಜ, ತೈಲ, ಕಲ್ಲಿದ್ದಲು, ಆಹಾರ ಪದಾರ್ಥಗಳು, ಕೃಷಿ ಉಪಕರಣಗಳು ಮೊದಲಾದವನ್ನು ಸಾಗಿಸಲು ಜಲಮಾರ್ಗವು ಸೂಕ್ತ. ಜಲಸಾರಿಗೆಯ ವಿಶೇಷವೆಂದರೆ, ಮಾರ್ಗವನ್ನು ರೂಪಿಸಲು ಯಾವುದೇ ವೆಚ್ಚ ತಗುಲದಿರುವುದು. ಹೀಗಾಗಿ, ಸೂಕ್ತ ಮಾರ್ಗಗಳನ್ನು ಗುರುತಿಸಿ ಒಳನಾಡು ಜಲ ಸಾರಿಗೆ ಅಭಿವೃದ್ಧಿಪಡಿಸಬೇಕಾಗಿದೆ. ಈ ನಿಟ್ಟಿನಲ್ಲಿ ಕೊಚ್ಚಿ ಜಲ ಮೆಟ್ರೋ ಯೋಜನೆ ಮುನ್ನುಡಿ ಬರೆಯುವಂತಾಗಲಿ.
