ತಾಲೂಕಿನ ಗೂಳಿಗಾನಹಳ್ಳಿ ಸಮೀಪ ಲೋಕೋಪಯೋಗಿ ಇಲಾಖೆಯಿಂದ 2019-20ನೇ ಸಾಲಿನಲ್ಲಿ 5 ಕೋಟಿ ರೂ. ವೆಚ್ಚದಲ್ಲಿ ಸೇತುವೆ ನಿರ್ಮಾಣ ಹಾಗೂ ಡಾಂಬರ್ ರಸ್ತೆ ಅಭಿವೃದ್ಧಿಗಾಗಿ ಟೆಂಡರ್ ಕರೆಯಲಾಗಿತ್ತು. ಈ ಟೆಂಡರ್ ಪಡೆದ ಬೆಂಗಳೂರು ಮೂಲದ ಗುತ್ತಿಗೆದಾರ ಡಾಂಬರ್ ಹಾಕಿ, ಸೇತುವೆ ನಿರ್ಮಾಣಕ್ಕೆ ಕಂಬಿ ಹಾಕಿ ಮೂರು ವರ್ಷಗಳೇ ಕಳೆದಿವೆಯಾದರೂ ಕಾಮಗಾರಿ ಆರಂಭಿಸಿಲ್ಲ
ಸೇತುವೆ ನಿರ್ಮಾಣಕ್ಕೆ ರಸ್ತೆ ಅಗೆಯಲಾಗಿದ್ದು, ಕಾಮಗಾರಿ ನಡೆಯುತ್ತಿರುವ ಪಕ್ಕದಲ್ಲೇ ತಾತ್ಕಾಲಿಕ ರಸ್ತೆ ನಿರ್ಮಾಣ ಮಾಡಿದ್ದು, ಈಗ ಮಳೆಗಾಲವಾಗಿರುವುದರಿಂದ ಸಂಚಾರಕ್ಕೆ ತೊಂದರೆಯಾಗಿದೆ.
ಕೋಲಾರದಿಂದ ತಾಲೂಕಿನ ತೊಂಡಾಲ, ನಾಯಕರಹಳ್ಳಿ ಗ್ರಾಮಗಳಿಗೆ ಹೋಗಲು ಇದು ಪ್ರಮುಖ ರಸ್ತೆಯಾಗಿದ್ದು, ಕಾಮಗಾರಿ ನನೆಗುದಿಗೆ ಬಿದ್ದಿರುವುದು ವಾಹನ ಸವಾರರ ಆಕ್ರೋಶಕ್ಕೆ ಕಾರಣವಾಗಿದೆ.
ಮುದುವಾಡಿ ಕೆರೆ ಕೋಡಿ ಹರಿದರೆ ಮುಖ್ಯ ಕಾಲುವೆಯಿಂದ ಮಣಿಟ್ಟ ಕೆರೆಗೆ ನೀರು ಹರಿಯುತ್ತದೆ. ಸೇತುವೆಗೆ ರಸ್ತೆ ಅಗೆದು ಕಾಲುವೆ ಹಾನಿಪಡಿಸಿದ್ದರಿಂದ ಮಳೆ ಬಂದರೆ ರೈತರ ತೋಟಗಳಿಗೆ ನೀರು ಹರಿದು ಬೆಳೆ ಹಾನಿಯಾಗುವಂತಾಗಿದೆ. ಈ ಬಗ್ಗೆ ಹಿಂದಿನ ಶಾಸಕರ ಗಮನಕ್ಕೆ ತಂದಿದ್ದರೂಯಾವುದೇ ಪ್ರಯೋಜನೆಯಿಲ್ಲ ಎಂದು ತೊಂಡಾಲ, ನಾಯಕರಹಳ್ಳಿ ಗ್ರಾಮಸ್ಥರು ಕಿಡಿಕಾರಿದ್ದಾರೆ.
ಮುದುವಾಡಿ ಕೆರೆ ಕೋಡಿ ಹರಿದರೆ ಕೋಲಾರ&ಶ್ರೀನಿವಾಸಪುರ ರಸ್ತೆಯಲ್ಲಿ ವಾಹನ ಸಂಚಾರ ಸ್ಥಗಿತಗೊಳ್ಳುತ್ತದೆ. ಆಗ ಪರ್ಯಾಯವಾಗಿ ಮಣಿಟ್ಟ ರಸ್ತೆ, ಅಣ್ಣಿಹಳ್ಳಿ ಮಾರ್ಗವಾಗಿ ಕೋಲಾರಕ್ಕೆ ಹೋಗಬೇಕು. ಜೋರು ಮಳೆಯಾಗುವ ಮುನ್ನವೇ ಕಾಮಗಾರಿ ಆರಂಭಿಸಿ ಕೆಲಸ ಪೂರ್ಣಗೊಳಿಸುವಂತೆ ಸ್ಥಳಿಯರು ಆಗ್ರಹಿಸಿದ್ದಾರೆ.
