ದಕ್ಷಿಣ ಅಮೆರಿಕಾದ ಅಮೆಜಾ಼ನ್ ಕಾಡು- ಅದೊಂದು ವಿಸ್ಮಯಗಳ ಸಾಗರ! ಸೂರ್ಯ ರಶ್ಮಿಯೂ ನೆಲಕ್ಕೆ ತಗುಲದಷ್ಟು ದಟ್ಟವಾಗಿ ಹರಡಿಕೊಂಡಿರುವ ನೂರಾರು ಅಡಿ ಎತ್ತರಕ್ಕೆ ಜಿಗಿದು ಮುಗಿಲು ಮುಟ್ಟುವ ನಿತ್ಯ ಹರಿದ್ವರ್ಣ ಮರಗಳು, ಪ್ರಪಂಚದಲ್ಲಿ ಕಂಡು ಕೇಳರಿಯದ ಪ್ರಾಣಿ ಪಕ್ಷಿಗಳು, ಮುನ್ನೂರು ಕೆ.ಜಿ. ಬೆಳೆಯಬಲ್ಲ ರಾಕ್ಷಸ ಗಾತ್ರದ ಅನಾಕೊಂಡಾಗಳು, ಕಣ್ಮುಚ್ಚಿ ತೆರೆಯುವುದರೊಳಗೆ ಮೂಳೆಯವರೆಗೆ ಹಿಸಿದು ಹಾಕುವ ರಕ್ತ ಪಿಪಾಸು ಫಿರಾನ್ಹಾ ಮೀನುಗಳು, ಮೊಣಕಾಲು ಎತ್ತರ ಬೆಳೆಯುವ ಗೋಲಿಯಾತ್ ಕಪ್ಪೆಗಳು, ಭೀಕರ ಮೊಸಳೆಗಳನ್ನೂ ಶಾಕ್ ಹೊಡೆಸಿ ಪ್ರಜ್ಞೆ ತಪ್ಪಿಸಬಲ್ಲ ಪ್ರಚಂಡ ಇಲೆಕ್ಟ್ರಿಕ್ ಈಲ್ಗಳು, ಸೋಮಾರಿಗಳ ರಾಜ ‘ಸ್ಲಾತ್’, ಕಚ್ಚಿದರೆ ಮೈಗೆ ಬೆಂಕಿ ಹೊತ್ತಿಸಿದಷ್ಟು ಉರಿ ತರಬಲ್ಲ ಬೆಂಕಿ ಇರುವೆಗಳು... - ಈ ವಿಸ್ಮಯಗಳ ಪಟ್ಟಿಗೆ ಮತ್ತೊಂದು ಸೇರ್ಪಡೆ, ಅಮೆಜಾ಼ನಿನ ದೈತ್ಯ ತಾವರೆ ಎಲೆ. ಈ ಎಲೆಗಳ ಅಗಲ ಕೇಳಿದರೆ ಹೌಹಾರುತ್ತೀರಿ. ಒಂದು ಅಡಿ?, ಎರಡು ಅಡಿ?, ಮೂರು, ನಾಲ್ಕು, ಐದು ಅಡಿ? ನೀವು ನಂಬಲಿಕ್ಕಿಲ್ಲ!, ಇದರ ಎಲೆಗಳು ಪೂರ್ತಿ ಮೂರು ಮೀಟರ್ ವ್ಯಾಸ ಹೊಂದಿದೆ! ಎಂದರೆ ಸುಮಾರು ಒಂದು ಕೊಪ್ಪರಿಗೆಯಷ್ಟು ಅಗಲ!! ಸಾಮಾನ್ಯ ನಮ್ಮ-ನಿಮ್ಮಂತಹ ಮನುಷ್ಯರು ಸಿಂಹಾಸನದ ಮೇಲೆ ಕುಳಿತ ರಾಜನಂತೆ ಈ ಎಲೆಯ ಮೇಲೆ ವಿರಾಜಮಾನರಾಗಬಹುದು! ಹೆಚ್ಚೇಕೆ?!, ಗರಿಷ್ಠ 135 ಕೆ.ಜಿ ತೂಕದವರೆಗಿನ ದಡೂತಿ ವ್ಯಕ್ತಿ ಕೂಡಾ ಆರಾಮವಾಗಿ ಇದರ ಮೇಲೆ ಕೂರಬಹುದು! ಅಷ್ಟು ತೂಕವನ್ನು ಎಲೆಯ ಮೇಲೆ ಇಟ್ಟರೂ ಎಲೆ ಮುಳುಗಲಾರದು! ಮುಳುಗದಂತೆ ತಡೆಯಲು ಎಲೆಯ ಅಡಿಭಾಗದಲ್ಲಿ ನೇರಳೆ ಬಣ್ಣದ ಜೇಡರ ಬಲೆಗಳಂತೆ ಹೆಣೆದುಕೊಂಡಿರುವ ‘ನರ’ಗಳ ವ್ಯೂಹವೇ ಇದೆ. ಈ ನರಗಳ ಪೂರ್ತಿ ಗಾಳಿ ತುಂಬಿಕೊಂಡಿರುವುದರಿಂದ, ಬೇರೆ ಎಲೆಗಳಿಗಿಂತ ಐವತ್ತು-ಅರವತ್ತು ಪಟ್ಟು ಹೆಚ್ಚು ಭಾರವನ್ನು ತಡೆಯುವ ಸಾಮರ್ಥ್ಯ ಈ ಎಲೆಗಿದೆ!
