ಗಾಜಾದಲ್ಲಿ ಹುಟ್ಟಿದ ಮಗುವಿಗೆ ಸಿಂಗಾಪೂರ್​ ಎಂದು ಹೆಸರಿಟ್ಟ ದಂಪತಿ: ಕಾರಣ ಕೇಳಿದ್ರೆ ಮನಕಲಕುತ್ತೆ! Singapore

ಜೆರುಸಲೇಮ್​: ಯುದ್ಧದಿಂದ ಭಾರಿ ಹಾನಿಗೊಳಗಾಗಿರುವ ಗಾಜಾ ಪಟ್ಟಿಯ ಭಯಾನಕ ಪರಿಸ್ಥಿತಿಗಳ ನಡುವೆ ಜನಿಸಿದ ನವಜಾತ ಶಿಶುವಿಗೆ ಪ್ಯಾಲೆಸ್ಟೀನಿಯನ್ ದಂಪತಿ 'ಸಿಂಗಾಪೂರ್​' ( Singapore ) ಎಂದು ಹೆಸರಿಟ್ಟಿದ್ದಾರೆ. ಈ ಮೂಲಕ ತಮ್ಮ ಕಷ್ಟದ ಸಮಯದಲ್ಲಿ ಸಹಾಯ ಮಾಡಿದ ದೇಶಕ್ಕೆ ದಂಪತಿ ಕೃತಜ್ಞತೆ ಸಲ್ಲಿಸಿದ್ದಾರೆ.

ಯುದ್ಧಪೀಡಿತ ದೇಶದಲ್ಲಿ ಆಹಾರದ ಕೊರತೆ ಮತ್ತು ಭೀಕರ ಭಯದ ಸಮಯದಲ್ಲಿ ತಮ್ಮ ಕುಟುಂಬಕ್ಕೆ ಆಹಾರವನ್ನು ಒದಗಿಸಿದ್ದಕ್ಕಾಗಿ ಸಿಂಗಾಪೂರ್​ಗೆ ಕೃತಜ್ಞತೆಯ ಸಂಕೇತವಾಗಿ ತಮ್ಮ ಮಗುವಿಗೆ 'ಸಿಂಗಾಪೂರ್​' ಎಂದು ಹೆಸರಿಟ್ಟಿದ್ದೇವೆ ಎಂದು ದಂಪತಿ ಹೇಳಿದ್ದಾರೆ.

ಮಗುವಿನ ತಂದೆ ಹಮ್ದಾನ್ ಹಡ್ಡಾದ್ ಅವರು ಗಾಜಾದಲ್ಲಿ ಸಿಂಗಾಪೂರ್​ ಮೂಲದ "ಚಾರಿಟಿ ಲವ್ ಏಯ್ಡ್ ಸಿಂಗಾಪೂರ್​" ನಡೆಸುತ್ತಿರುವ ಅಡುಗೆಮನೆಯಲ್ಲಿ ಅಡುಗೆ ಸಹಾಯಕರಾಗಿ ಕೆಲಸ ಮಾಡುತ್ತಾರೆ. ಗಾಜಾದಲ್ಲಿ ತೀವ್ರ ಆಹಾರದ ಕೊರತೆಯ ಸಮಯದಲ್ಲೇ ಅವರ ಪತ್ನಿ ಗರ್ಭಿಣಿಯಾಗಿದ್ದರು. ಈ ವೇಳೆ ಇದೇ ಅಡುಗೆಮನೆಯಿಂದ ಹಡ್ಡಾದ್​ ಅವರು ಆಹಾರವನ್ನು ತೆಗೆದುಕೊಂಡು ಹೋಗುತ್ತಿದ್ದರು. ಈ ಒಂದು ಸಹಾಯವು ಅವರ ಕುಟುಂಬಕ್ಕೆ ಜೀವನೋಪಾಯದ ಮೂಲವನ್ನೇ ಒದಗಿಸಿತು. ಹೀಗಾಗಿ, ಆ ದೇಶದ ಮೇಲಿನ ಪ್ರೀತಿ ಮತ್ತು ಕೃತಜ್ಞತೆಯನ್ನು ತೋರಿಸಲು ತಮ್ಮ ಮಗಳಿಗೆ 'ಸಿಂಗಾಪೂರ್​' ಎಂದು ಹೆಸರಿಟ್ಟಿದ್ದಾಗಿ ಹಮ್ದಾನ್ ಹಡ್ಡಾದ್ ಹೇಳಿದ್ದಾರೆ.

ಇದನ್ನೂ ಓದಿ: ಅಪರೂಪದ ದಾಖಲೆ ಬರೆದ ವೆಸ್ಟ್​ ಇಂಡೀಸ್​: ಏಕದಿನ ಕ್ರಿಕೆಟ್​ ಇತಿಹಾಸದಲ್ಲೇ ಈ ಸಾಧನೆ ಇದೇ ಮೊದಲು! West Indies

ಮಗು ಜನಿಸಿದ ನಂತರ, ಲವ್ ಏಯ್ಡ್ ಸಿಂಗಾಪೂರ್ ಇನ್‌ಸ್ಟಾಗ್ರಾಮ್‌ನಲ್ಲಿ ಮಗುವಿನ ಜನನ ಪ್ರಮಾಣಪತ್ರವನ್ನು ಹಂಚಿಕೊಳ್ಳಲಾಗಿದೆ. ಗಾಜಾದಲ್ಲಿ 'ಸಿಂಗಾಪೂರ್​' ಎಂದು ಹೆಸರಿಸಲಾದ ಮೊದಲ ಪ್ಯಾಲೆಸ್ಟೀನಿಯನ್ ಮಗು ಇದಾಗಿರಬಹುದು ಎಂದು ಅಡಿಬರಹ ಬರೆಯಲಾಗಿದೆ. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದ್ದು ವ್ಯಾಪಕ ಪ್ರಶಂಸೆಗೆ ಗುರಿಯಾಗಿದೆ.

ಯುದ್ಧ ಮತ್ತು ಕ್ಷಾಮದ ಮಧ್ಯೆ ಗಡಿಗಳನ್ನು ಮೀರಿ ಭರವಸೆ ಮತ್ತು ದಯೆ ಹೇಗೆ ಸಹಾಯ ಮಾಡುತ್ತದೆ ಎಂಬುದನ್ನು ಈ ಘಟನೆ ತೋರಿಸಿದೆ. ಸಿಂಗಾಪೂರ್​ ಸಂಘಟನೆಯೊಂದು ನೀಡಿದ ಸಣ್ಣ ದೇಣಿಗೆಯು ಒಂದು ಕುಟುಂಬದ ಜೀವವನ್ನೇ ಉಳಿಸಿತು ಮತ್ತು ಅಂತಿಮವಾಗಿ ಮಗುವಿನ ಹೆಸರಿನ ಮೂಲಕ ದೇಶದೊಂದಿಗೆ ಅಳಿಸಲಾಗದ ಬಂಧವನ್ನು ಸೃಷ್ಟಿಸಿದೆ. (ಏಜೆನ್ಸೀಸ್​)

https://www.vijayavani.net/unknown-facts-a-country-where-nudity-is-not-wrong-office-meetings-are-held-without-clothes

https://www.vijayavani.net/mohammad-kaif-slams-indias-bowlers-and-gills-captaincy-calls-after-perth-defeat