ಶನಿವಾರದ ಕಾರ್ಯಾಚರಣೆಯಲ್ಲಿ ಆಗರ್ ಯಂತ್ರವು ಪದೆ ಪದೇ ಕೈಕೊಟ್ಟ ಕಾರಣ ಡ್ರಿಲ್ಲಿಂಗ್ ಸ್ಥಗಿತ ಮಾಡಲಾಗಿದೆ. ರಕ್ಷಣಾ ಸಿಬ್ಬಂದಿಯೇ ಸುರಂಗದ ಒಳಗೆ ತೆರಳಿ ಭೌತಿಕವಾಗಿ ಅವಶೇಷಗಳನ್ನು ಅಗೆಯುವ ಕೆಲಸ ಭಾನುವಾರದಿಂದ ಆರಂಭವಾಗಲಿದೆ. ಲಂಬವಾಗಿ ಕೊಳವೆ ಕೊರೆಯುವುದು ಸಹಿತ ಇತರ ಮಾರ್ಗಗಳ ಬಗ್ಗೆಯೂ ಪರಿಶೀಲನೆ ನಡೆಯುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಸುರಂಗದ ಕುಸಿದ ಭಾಗದಲ್ಲಿ ಡ್ರಿಲ್ಲಿಂಗ್ ಕೆಲಸ ಶುಕ್ರವಾರ ರಾತ್ರಿ ಸ್ಥಗಿತಗೊಂಡಿತು. ಆಗರ್ ಡ್ರಿಲ್ಲಿಂಗ್ ಯಂತ್ರಕ್ಕೆ ಅಡಚಣೆ ಎದುರಾಯಿತು. ಶುಕ್ರವಾರದ ಕೊರೆಯುವಿಕೆ ಸ್ಥಗಿತವಾದಾಗ 800 ಎಂಎಂ ಅಗಲದ ಉಕ್ಕಿನ ಪೈಪ್ ಮೂಲಕ 46.8 ಮೀಟರ್ಗಳನ್ನು ಕೊರೆಯಲಾಗಿತ್ತು. ಸುಮಾರು 60 ಮೀಟರ್ ದೂರದಲ್ಲಿ ಕಾರ್ವಿುಕರು ಸಿಲುಕಿದ್ದಾರೆ ಎನ್ನಲಾಗಿದೆ. ಹೀಗಾಗಿ ಇನ್ನೂ ಸುಮಾರು 14 ಅಡಿ ಕೊರೆಯಬೇಕಿದೆ. ತಾಂತ್ರಿಕ ಸಮಸ್ಯೆ ಕಾರಣ ಈಗ ಉಳಿದಿರುವ ದೂರವನ್ನು ಸಿಬ್ಬಂದಿ ಭೌತಿಕವಾಗಿ ಅಗೆಬೇಕಿದೆ. ಮ್ಯಾನ್ಯುವಲ್ ಡ್ರಿಲ್ಲಿಂಗ್ ಎಂದು ಇದಕ್ಕೆ ಕರೆಯಲಾಗುತ್ತಿದ್ದರೆ. ಯಂತ್ರಕ್ಕಿಂತ ಹೆಚ್ಚಿನ ಸಮಯವನ್ನು ಇದು ತೆಗೆದುಕೊಳ್ಳುತ್ತದೆ. ಈ ಕಾರಣಕ್ಕಾಗಿ ರಕ್ಷಣಾ ಕಾರ್ಯ ವಿಳಂಬವಾಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಕಾರ್ವಿುಕರಿಗೆ ಆಹಾರ ಮತ್ತು ಇತರ ಅಗತ್ಯ ವಸ್ತುಗಳನ್ನು ಪೂರೈಸಲು ಆರು ಇಂಚು ಅಗಲದ ಟ್ಯೂಬ್ ಅಳವಡಿಕೆ ಮಾಡಲಾಗಿದೆ.
