ಮುಂದೇನು?: ಅಕ್ಟೋಬರ್ ಕೊನೆ ವಾರದೊಳಗೆ ಮಾಹಿತಿ ಸಂಗ್ರಹವಾದರೆ ಅದನ್ನು ಮಾಧ್ಯಮಗಳ ಮೂಲಕ ಜನರ ಮುಂದೆ ಚರ್ಚೆಗಿಡುವುದು, ಕಾನೂನು ಹೋರಾಟ ಮಾಡುವುದು ಮತ್ತು ಸ್ಥಳೀಯವಾಗಿ ಬೀದಿಗಿಳಿದು ಹೋರಾಟ ಮಾಡುವ ಚರ್ಚೆ ಪಕ್ಷದಲ್ಲಿ ನಡೆದಿದೆ. ಅದಕ್ಕಿನ್ನೂ ಸ್ಪಷ್ಟ ರೂಪ ಸಿಕ್ಕಿಲ್ಲ. ಈಗಾಗಲೇ ಬಿಜೆಪಿ ನಾಯಕರ ದಾಖಲೆಗಳನ್ನು ಮುಂದಿಟ್ಟುಕೊಂಡು ರಾಜ್ಯ ಮಟ್ಟದಲ್ಲಿ ಗಮನ ಸೆಳೆಯುವ ಕಾರ್ಯ ನಡೆದಿದೆ. ಇತ್ತೀಚೆಗೆ ಪ್ರತಿಪಕ್ಷ ನಾಯಕ ಆರ್. ಅಶೋಕ್ ಅವರಿಗೆ ಸಂಬಂಧಿಸಿದ, ಕೋರ್ಟ್ನಲ್ಲಿ ಇತ್ಯರ್ಥಗೊಂಡಿರುವ 12 ವರ್ಷ ಹಳೆಯ ವ್ಯಾಜ್ಯದ ದಾಖಲೆ ಬಹಿರಂಗಪಡಿಸಿ ಬಿಜೆಪಿಯನ್ನು ಮುಜುಗರಕ್ಕೀಡು ಮಾಡುವ ಕಾರ್ಯ ನಡೆದಿತ್ತು. ಅದಾದ ಬಳಿಕ ಬಿಜೆಪಿ ಅಧ್ಯಕ್ಷ ಬಿ.ವೈ.ವಿಜಯೇಂದ್ರ ಅವರು ಚುನಾವಣೆ ಅಫಿಡೆವಿಟ್ನಲ್ಲಿ ನೀಡಿದ ಮಾಹಿತಿಯನ್ನೇ ಮುಂದಿಟ್ಟುಕೊಂಡು ಅವರಿಗೆ ಪ್ರಶ್ನೆ ಕೇಳಿ ರಾಜಕೀಯ ಎದಿರೇಟು ನೀಡುವ ಕೆಲವಾಗಿತ್ತು. ಈ ಕಾರ್ಯಕ್ಕೆ ಸಿದ್ದರಾಮಯ್ಯ ಸಂಪುಟದ ಪ್ರಮುಖ ಸಚಿವರನ್ನೇ ಕಾಂಗ್ರೆಸ್ ಮುಂದೆಬಿಟ್ಟಿತ್ತು. ಸಚಿವರನ್ನೇ ಮುಂದೆ ಬಿಡುವ ಮೂಲಕ ಗಂಭೀರತೆ ತರುವುದು ಉದ್ದೇಶ. ಮುಂದಿನ ಹಂತದಲ್ಲಿ ಬಿಜೆಪಿಯ ಇತರ ನಾಯಕರಿಗೆ ಸಂಬಂಧಿಸಿದ ದಾಖಲೆಯನ್ನು ಬಹಿರಂಗಪಡಿಸಿ ಬಿಸಿಮುಟ್ಟಿಸುವ ಗುರಿ ಇದೆ ಎಂದು ಪಕ್ಷದ ಹಿರಿಯ ನಾಯಕರು ವಿವರಿಸಿದ್ದಾರೆ.
