ಇದರಿಂದಾಗಿ ಬಡ ರೋಗಿಗಳು ಹಣ ತೆತ್ತು ಔಷಧಿ ಖರೀದಿಸುವ ಅನಿವಾರ್ಯತೆ ತಲೆದೋರಿದೆ. ಇಂತಹ ತುರ್ತು ಹಾಗೂ ಅನಿವಾರ್ಯ ಸಂದರ್ಭಗಳಲ್ಲಿ ಅದ್ಯತೆಯನುಸಾರ ಅನುಮತಿ ನೀಡಲು ಸೂಕ್ತ ವ್ಯವಸ್ಥೆಯನ್ನು ಚುನಾವಣೆ ಆಯೋಗ ರೂಪಿಸಬೇಕು. ಇದೇ ವೇಳೆ, ಅಧಿಕಾರಿಗಳು ಹಾಗೂ ಸಿಬ್ಬಂದಿಯನ್ನು ಚುನಾವಣಾ ಕೆಲಸಕ್ಕೆ ನಿಯೋಜಿಸಿರುವುದರಿಂದ ಬಹುತೇಕ ಕಚೇರಿಗಳಲ್ಲಿ ಸಾರ್ವಜನಿಕರಿಗೆ ಸೇವೆಗಳು ಲಭ್ಯವಾಗುತ್ತಿಲ್ಲ. ಚುನಾವಣೆ ಕೆಲಸ ಮುಗಿದ ನಂತರ ಖಾಲಿ ಇರುವ ಅವಧಿಯಲ್ಲಾದರೂ ಕಚೇರಿ ಕಾರ್ಯದತ್ತ ಗಮನವನ್ನು ಸಿಬ್ಬಂದಿ ನೀಡುತ್ತಿಲ್ಲ ಹಾಗೂ ಚುನಾವಣೆ ಕಾರ್ಯಕ್ಕೆ ನಿಯೋಜನೆಗೊಳ್ಳದವರು ಕೂಡ ಇದೇ ನೆಪವನ್ನಾಗಿಸಿಕೊಂಡು ಕಚೇರಿಗಳಿಂದ ಮಾಯವಾಗುತ್ತಿದ್ದಾರೆ ಎಂಬ ಆರೋಪಗಳು ಕೇಳಿಬಂದಿದೆ. ಹೀಗಾಗಿ, ಚುನಾವಣಾ ನಿರ್ಬಂಧಗಳ ಬಗ್ಗೆಯೇ ಜನರಲ್ಲಿ ಅಸಮಾಧಾನ ಮೂಡುವದಕ್ಕೆ ಆಸ್ಪದವಾಗದ ರೀತಿಯಲ್ಲಿ ಸಾರ್ವಜನಿಕ ಸೇವೆಗಳಿಗೆ ತೀವ್ರತರಹದಲ್ಲಿ ಅಡಚಣೆಯಾಗದಂತೆ ಚುನಾವಣೆ ಆಯೋಗವು ವ್ಯವಸ್ಥಿತವಾಗಿ ಸಿಬ್ಬಂದಿಯನ್ನು ಬಳಸಿಕೊಳ್ಳಬೇಕಿದೆ. ಪ್ರಮುಖ ಇಲಾಖೆ, ಕಚೇರಿಗಳಲ್ಲಿ ಕನಿಷ್ಠ ಅಗತ್ಯದ ಸಿಬ್ಬಂದಿ ಲಭ್ಯವಿರುವಂತೆ ನೋಡಿಕೊಳ್ಳಬೇಕು.
