ಸಮೀಕ್ಷೆ ಆ್ಯಪ್ ಅಭಿವೃದ್ಧಿ, ಪ್ರಗತಿಯಲ್ಲಿ ಶೇ.43 ಬೆಳೆ ಸರ್ವೇ ಸಾಧನೆ

ವಿಜಯವಾಣಿ ವಿಶೇಷ ಯಲಬುರ್ಗಾ

ಜಿಪಿಎಸ್ ಆಧಾರಿತ ಮೊಬೈಲ್ ಅಪ್ಲಿಕೇಷನ್ (ಮುಂಗಾರು ರೈತರ ಬೆಳೆ ಸಮೀಕ್ಷೆ ಆ್ಯಪ್) ಬಳಸಿ ಸರ್ವೇ ನಂಬರ್‌ವಾರು ಬೆಳೆ ಪ್ರದೇಶದ ನಿಖರ ಮಾಹಿತಿ ದಾಖಲಿಸುವ ಕಾರ್ಯ ತಾಲೂಕಿನಲ್ಲಿ ಕಂದಾಯ-ಕೃಷಿ ಇಲಾಖೆಯಿಂದ ನಡೆದಿದ್ದು, ಈಗಾಗಲೇ ಶೇ.43 ಸಾಧನೆಯಾಗಿದೆ.

ಮುಂಗಾರು ಹಂಗಾಮಿನಲ್ಲಿ ರೈತರು ತಮ್ಮ ಜಮೀನಿನಲ್ಲಿ ಬೆಳೆದ ಬೆಳೆ ವಿವರ ದಾಖಲಿಸಲು ಸರ್ಕಾರವು ಮುಂಗಾರು ರೈತರ ಬೆಳೆ ಸಮೀಕ್ಷೆ ಆ್ಯಪ್ ಅಭಿವೃದ್ಧಿಪಡಿಸಿದೆ. ರೈತರಿಂದಲೇ ಬೆಳೆ ಸಮೀಕ್ಷೆ ಕೈಗೊಳ್ಳಲು ರೈತಸ್ನೇಹಿ ಕಾರ್ಯಕ್ರಮ ಇದಾಗಿದೆ. ಇದರ ಮೂಲಕ ರೇಷ್ಮೆ, ಕೃಷಿ, ತೋಟಗಾರಿಕೆ ಬೆಳೆಗಳ ದಾಖಲೆ ಮಾಡಬಹುದಾಗಿದೆ. ಯಲಬುರ್ಗಾ-ಕುಕನೂರು ತಾಲೂಕಿನ 1.09 ಲಕ್ಷ ಪ್ಲಾಟ್ (ತಾಕುಗಳಲ್ಲಿ)ಗಳಲ್ಲಿ ಈಗಾಗಲೇ 46 ಸಾವಿರ ತಾಕುಗಳು ಪೂರ್ಣಗೊಂಡಿವೆ. ಶೇ.43 ಬೆಳೆ ಸಮೀಕ್ಷೆ ಕಾರ್ಯ ಪೂರ್ಣಗೊಂಡಿದೆ.

ಇದನ್ನೂ ಓದಿ:ಸರ್ವೇ ಇಲಾಖೆಯಲ್ಲಿನ ಸಮಸ್ಯೆಗಳ ಪರಿಹಾರಕ್ಕೆ ಸರ್ಕಾರ ಪ್ರಯತ್ನ ಮಾಡುತ್ತಿದೆ: ಸಚಿವ ಕೃಷ್ಣ ಬೈರೇಗೌಡ

ತಾತ್ಕಾಲಿಕ ಉದ್ಯೋಗ ಸೃಷ್ಟಿ

ಮೊಬೈಲ್ ಇಲ್ಲದವರು, ಇದ್ದೂ ಬಳಕೆ ಮಾಡಲು ಬಾರದವರು ಬೆಳೆ ಸಮೀಕ್ಷೆ ಬಗ್ಗೆ ತಲೆ ಕೆಡಿಸಿಕೊಳ್ಳಬೇಕಿಲ್ಲ. ಸರ್ಕಾರದ ನಿರ್ದೇಶನದಂತೆ ಕೃಷಿ, ಕಂದಾಯ ಇಲಾಖೆಯಿಂದ ಅಂದಾಜು 1000 ಸರ್ವೇ ನಂಬರ್‌ಗೆ ಒಬ್ಬರಂತೆ ತಂತ್ರಾಂಶ ಜ್ಞಾನವುಳ್ಳ ಖಾಸಗಿ ವ್ಯಕ್ತಿಗಳನ್ನು ನೇಮಿಸಿಕೊಂಡು 2024-25ನೇ ಸಾಲಿನ ಮುಂಗಾರು ಬೆಳೆ ಸಮೀಕ್ಷೆ ಆ್ಯಪ್ ಮೂಲಕ ಸರ್ವೇ ಕಾರ್ಯ ನಡೆಸಲಾಗುತ್ತಿದೆ. ಒಂದು ಪ್ಲಾಟ್ ಸಮೀಕ್ಷೆ ನಡೆಸಿದರೆ 10 ರೂ. ಗೌರವಧನ ಇದೆ.

ಸ್ಥಳೀಯ ಯುವಕರ (ಖಾಸಗಿ ವ್ಯಕ್ತಿಗಳು) ಸೇವೆಯನ್ನು ಬಳಸಿಕೊಳ್ಳುವುದರ ಮೂಲಕ ತಾತ್ಕಾಲಿಕ ಉದ್ಯೋಗ ಸೃಷ್ಟಿಸಿದಂತಾಗುತ್ತದೆ. ಸರ್ವೇ ನಂಬರ್‌ಗಳ ಪ್ರಕಾರ ಜಮೀನುಗಳಿಗೆ ಬಂದು ಖಾಸಗಿ ವ್ಯಕ್ತಿಗಳು ಬೆಳೆಗಳ ಸರ್ವೇ ಕೈಗೊಳ್ಳುವಾಗ ರೈತರು ಆ ವೇಳೆಯಲ್ಲಿ ಇದ್ದು, ಬೆಳೆ ಸಮೀಕ್ಷೆ ದಾಖಲೀಕರಣ ಖಾತ್ರಿಪಡಿಸಿಕೊಳ್ಳಬಹುದು.

ರೈತರಿಗೆ ಅನುಕೂಲ

ಮೊಬೈಲ್ ಆಪ್ ಮೂಲಕ ಮುಂಗಾರಿನ ವಿವಿಧ ಬೆಳೆಗಳ ಸಮೀಕ್ಷೆ ಮಾಡುವುದರಿಂದ ಈ ಮಾಹಿತಿಯನ್ನು ಬೆಳೆಸಾಲ, ಬೆಳೆವಿಮೆ, ಬೆಳೆ ಪರಿಹಾರ ಮತ್ತು ವಿವಿಧ ಇಲಾಖೆಗಳ ಸೌಲಭ್ಯ ಪಡೆಯಲು ಅನುಕೂಲವಾಗಿದೆ.