ರಾಹುಲ್​ಗಾಂಧಿಯ ಭಾರತದ ಪೌರತ್ವ ರದ್ದುಗೊಳಿಸಿ; ಸುಬ್ರಮಣಿಯನ್ ಸ್ವಾಮಿ ಅರ್ಜಿ ಸಲ್ಲಿಕೆ ಹಿಂದಿದೆ ಈ ಕಾರಣ

ನವದೆಹಲಿ: ಕಾಂಗ್ರೆಸ್​ ನಾಯಕ ಹಾಗೂ ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್​​ ಗಾಂಧಿ ಅವರ ಭಾರತೀಯ ಪೌರತ್ವವನ್ನು ರದ್ದುಗೊಳಿಸಲು ಗೃಹ ಸಚಿವಾಲಯಕ್ಕೆ (ಎಂಎಚ್‌ಎ) ನಿರ್ದೇಶನ ನೀಡುವಂತೆ ಬಿಜೆಪಿ ನಾಯಕ ಸುಬ್ರಮಣಿಯನ್ ಸ್ವಾಮಿ ಶುಕ್ರವಾರ(ಆಗಸ್ಟ್​​ 16) ದೆಹಲಿ ಹೈಕೋರ್ಟ್‌ಗೆ ಅರ್ಜಿ ಸಲ್ಲಿಸಿದ್ದಾರೆ.

ಇದನ್ನು ಓದಿ: ಪ್ರಧಾನಿ ಮೋದಿ ಜತೆ ಮುಹಮ್ಮದ್ ಯೂನಸ್​ ಮಾತುಕತೆ; ಉಭಯ ನಾಯಕರ ಚರ್ಚೆ ಕುರಿತು ಪಿಎಂಒ ಕಚೇರಿ ಹೇಳಿದಿಷ್ಟು

ಸುಬ್ರಮಣಿಯನ್​ ಸ್ವಾಮಿ ಅವರು 2019ರಲ್ಲಿ ಗೃಹ ಸಚಿವಾಲಯಕ್ಕೆ ಪತ್ರ ಬರೆದಿದ್ದಾರೆ. ಅದರಲ್ಲಿ ಬ್ಯಾಕ್​ಆಪ್ಸ್​​ ಲಿಮಿಟೆಡ್​ ಹೆಸರಿನ ಸಂಸ್ಥೆಯನ್ನು 2003ರಲ್ಲಿ ಬ್ರಿಟನ್​​ನಲ್ಲಿ ನೋಂದಾಯಿಸಲಾಗಿದ್ದು, ಕಾಂಗ್ರೆಸ್ ಸಂಸದ ರಾಹುಲ್​ ಗಾಂಧಿ ಅವರು ಅದರ ನಿರ್ದೇಶಕರು ಮತ್ತು ಕಾರ್ಯದರ್ಶಿಗಳಲ್ಲಿ ಒಬ್ಬರು ಎಂದು ಹೇಳಿದ್ದಾರೆ.

ಸಂಸ್ಥೆಯು 2005 ಅಕ್ಟೋಬರ್​ 10 ಮತ್ತು 2006 ಅಕ್ಟೋಬರ್​ 31ರಂದು ಸಲ್ಲಿಸಿದ ವಾರ್ಷಿಕ ರಿಟರ್ನ್ಸ್​​​ನಲ್ಲಿ ರಾಹುಲ್​ ಗಾಂಧಿ ಅವರು ತಮ್ಮ ರಾಷ್ಟ್ರೀಯತೆಯನ್ನು ಬ್ರಿಟಿಷರು ಎಂದು ಉಲ್ಲೇಖಿಸಿದ್ದಾರೆ. 2009 ಫೆಬ್ರವರಿ 17ರಂದು ಬ್ಯಾಕ್​ಆಪ್ಸ್​​​​ ಲಿಮಿಟೆಡ್​ ಕಂಪನಿಯ ವಿಸರ್ಜನೆಯ ಅರ್ಜಿಯಲ್ಲಿಯೂ ಮತ್ತೆ ಬ್ರಿಟಿಷರು ಎಂದು ಉಲ್ಲೇಖಿಸಿದ್ದಾರೆ. ಇದು ಭಾರತದ ಸಂವಿಧಾನದ 9ನೇ ವಿಧಿ ಮತ್ತು ಭಾರತೀಯ ಪೌರತ್ವ ಕಾಯಿದೆ, 1955 ಅನ್ನು ಉಲ್ಲಂಘಿಸಿದೆ ಎಂದು ಸುಬ್ರಮಣಿಯನ್​ ಸ್ವಾಮಿ ಆರೋಪಿಸಿರುವುದಾಗಿ ಬಾರ್​ ಆ್ಯಂಡ್​ ಬೆಂಚ್​​ ವರದಿ ಮಾಡಿದೆ.

2019 ಏಪ್ರಿಲ್​​ 29ರಂದು ಗೃಹ ಸಚಿವಾಲಯವು ರಾಹುಲ್​ಗಾಂಧಿಗೆ ಪತ್ರ ಬರೆದು, ಈ ವಿಷಯದ ಕುರಿತು ಹದಿನೈದು ದಿನದೊಳಗೆ ವಾಸ್ತವಿಕ ನಿಲುವನ್ನು ಮುಂದಿಡುವಂತೆ ಕೇಳಿದೆ. ಆದರೆ ಪತ್ರ ಬರೆದು ಐದು ವರ್ಷಗಳು ಕಳೆದರೂ ರಾಹುಲ್​ ಗಾಂಧಿ ಈ ಬಗ್ಗೆ ಗೃಹ ಸಚಿವಾಲಯಕ್ಕೆ ಯಾವುದೆ ಸ್ಪಷ್ಟನೆ ನೀಡಿಲ್ಲ ಎಂದು ಬಿಜೆಪಿ ಆರೋಪಿಸಿದೆ. ಸುಬ್ರಮಣಿಯನ್ ಸ್ವಾಮಿ ಅವರು ಸಲ್ಲಿಸಿರುವ ಅರ್ಜಿಯ ವಿಚಾರಣೆಯು ಮುಂದಿನ ವಾರ ನಡೆಯಲಿದೆ. (ಏಜೆನ್ಸೀಸ್​​)