ಬೆಂಗಳೂರು: ಯುದ್ಧ ಪೀಡಿತ ಯೂಕ್ರೇನ್ನಿಂದ ಕರ್ನಾಟಕದ ವಿದ್ಯಾರ್ಥಿಗಳನ್ನು ಕರೆತರುವ ಕೆಲಸ ಆರಂಭವಾಗಿದೆ. ಎಲ್ಲರನ್ನೂ ಸುರಕ್ಷಿತವಾಗಿ ಕರೆತರಲಾಗುವುದು ಎಂದು ರಾಜ್ಯ ಸರ್ಕಾರ ಭರವಸೆ ನೀಡಿದೆ. ಯೂಕ್ರೇನ್ನಲ್ಲಿ ಯುದ್ಧದಿಂದಾಗಿ ಬಂಕರ್ನಲ್ಲಿ ಕಾಲ ಕಳೆಯುತ್ತಿದ್ದ ರಾಯಚೂರು ಜಿಲ್ಲೆಯ ನಾಲ್ವರು ವಿದ್ಯಾರ್ಥಿಗಳು ಬುಧವಾರ ರೈಲಿನಲ್ಲಿ ಇತರ ದೇಶಗಳ ಗಡಿಯತ್ತ ಪ್ರಯಾಣ ಬೆಳೆಸಿರುವ ಮಾಹಿತಿ ಲಭ್ಯವಾಗಿದೆ. ಎಂಬಿಬಿಎಸ್ ಓದುತ್ತಿರುವ ಜಿಲ್ಲೆಯ ರುಬೀನಾ, ತೃಪ್ತಿ ಪೂಜಾರಿ, ಸೋಮು ತುರ್ವಿಹಾಳ ಹಾಗೂ ನಂದೀಶ ಬಾರ್ದಲಿ ಭಯದ ನಡುವೆ ಭಾರತದ ಬಾವುಟ ಹಿಡಿದುಕೊಂಡು ಕಾಲ್ನಡಿಗೆಯಲ್ಲಿ ರೈಲು ನಿಲ್ದಾಣ ತಲುಪಿ, ರೈಲಿನಲ್ಲಿ ಕುಳಿತಿರುವ ಬಗ್ಗೆ ಪಾಲಕರಿಗೆ ಧ್ವನಿ ಸಂದೇಶ ಕಳುಹಿಸಿದ್ದಾರೆ. ರಾಯಚೂರು ನಗರದ ವೈ.ಎಸ್.ಮಯೂರ ಒಂದೆರಡು ದಿನಗಳಲ್ಲಿ ಭಾರತಕ್ಕೆ ಹಿಂತಿರುಗುವ ಸಾಧ್ಯತೆಗಳಿವೆ. ದಕ್ಷಿಣ ಕನ್ನಡ ಜಿಲ್ಲೆಯ 18 ಮಂದಿಯಲ್ಲಿ 10 ಮಂದಿ ಸುರಕ್ಷಿತವಾಗಿ ಸ್ಲೋವಾಕಿಯಾ, ಹಂಗೇರಿ ಹಾಗೂ ರೊಮಾನಿಯಾ ದೇಶಗಳಿಗೆ ತಲಪಿದ್ದಾರೆ. ಉಳಿದ ವಿದ್ಯಾರ್ಥಿಗಳಲ್ಲಿ ಹೆಚ್ಚಿನವರು ಯೂಕ್ರೇನ್ ಗಡಿ ದಾಟುವ ಕೊನೆ ಹಂತದಲ್ಲಿದ್ದು, ಬುಧವಾರ ರಾತ್ರಿ ವೇಳೆ ಗಡಿ ದಾಟಿ ಬೇರೆ ಬೇರೆ ದೇಶಗಳನ್ನು ಪ್ರವೇಶಿಸುವ ನಿರೀಕ್ಷೆಯಿದೆ. ಆದರೆ ಕೆಲವರು ಮಾತ್ರ ಫೋನ್ ಸ್ವಿಚ್ ಆಫ್ ಮಾಡಿದ್ದರಿಂದ ಸಂಪರ್ಕಕ್ಕೆ ಸಿಕ್ಕಿಲ್ಲ. ಆದರೆ ಅವರೆಲ್ಲರೂ ಸುರಕ್ಷಿತರಾಗಿದ್ದಾರೆ ಎನ್ನುವ ಮಾಹಿತಿ ಕುಟುಂಬದವರಿಗೆ ಲಭಿಸಿದೆ. ಹಾಸನದ 6, ಬೆಳಗಾವಿಯ 17 ವಿದ್ಯಾರ್ಥಿಗಳು ಅಲ್ಲಿಯೇ ಬಾಕಿ ಉಳಿದಿದ್ದಾರೆ.
