ಈಗ ನಾಡಕಚೇರಿಯನ್ನು ಉಳವಿ-ಶಿರಾಳಕೊಪ್ಪ ರಸ್ತೆಯ ಕಾನಹಳ್ಳಿ ಗ್ರಾಮದ ಬಳಿ ಸ್ವಂತ ಕಟ್ಟಡಕ್ಕೆ ಸ್ಥಳಾಂತರಿಸಲಾಗಿದೆ. ಉಳವಿಯಿಂದ 2 ಕಿ.ಮೀ ದೂರವಿದೆ. ಕಾನಹಳ್ಳಿಗೆ ಬಸ್ ಸೌಲಭ್ಯ ಇಲ್ಲ. ಸ್ವಂತ ವಾಹನ ಇಲ್ಲದವರು ನಡೆದುಕೊಂಡು ಹೋಗಬೇಕಿದೆ. ಸಾಮಾನ್ಯವಾಗಿ ದಿನನಿತ್ಯ ಸಾರ್ವಜನಿಕರು ಆದಾಯ, ಜಾತಿ, ವಿಧವಾ ವೇತನ ಪ್ರಮಾಣ ಪತ್ರ, ಪಡಿತರ ಚೀಟಿ ಮತ್ತಿತರ ದಾಖಲೆ ಪಡೆಯಲು ನಾಡಕಚೇರಿಗೆ ಹೋಗಲೇಬೇಕು. ಅರ್ಜಿಗಳಿಗೆ ಸಂಬಂಧಿಸಿದ ಗ್ರಾಮ ಲೆಕ್ಕಾಧಿಕಾರಿ ದೃಢೀಕರಣ ಬೇಕು. ಇವರೆಲ್ಲ ಉಳಿವಿ ಹಳೇ ಕಚೇರಿಯಲ್ಲೆ ಇದ್ದಾರೆ. ಇವರ ಬಳಿ ಆಗಬೇಕಾದ ಹಾಗೂ ನಾಡ ಕಚೇರಿಯಲ್ಲಿ ಆಗಬೇಕಾದ ಕೆಲಸಕ್ಕೆ ಸಾರ್ವಜನಿಕರು ಅಲೆದಾಡಬೇಕಿದೆ. ವೃದ್ಧರು, ಅಂಗವಿಕಲರು, ವಾಹನ ಇಲ್ಲದ ಬಡವರು ಪ್ರಮಾಣ ಪತ್ರಗಳಿಗಾಗಿ ಓಡಾಡಿ ಹೈರಾಣಾಗಿದ್ದಾರೆ. ಅಲ್ಲದೆ ನಾಡಕಚೇರಿ ಇರುವ ಬಗ್ಗೆ ಕಾನಹಳ್ಳಿ ಬಳಿ ಯಾವುದೇ ನಾಮಲಕ ಇಲ್ಲ. ಕೆಲವರು ನಾಡಕಚೇರಿ ಎಲ್ಲಿದೆ ಎಂದು ಹುಡುಕಾಡಬೇಕಿದೆ. ಒಂದು ದಿನದಲ್ಲಿ ಆಗುವ ಕೆಲಸಕ್ಕೆ ಎರಡ್ಮೂರು ದಿನ ಅಲೆಯುವಂತಾಗಿದೆ.
