ತಿಂಗಳಿಂದ ಜಿಪಂ ಸಿಇಒ ಸ್ಥಾನ ಖಾಲಿ

ಎರಡು ವರ್ಷ ಸಿಇಒ ಆಗಿ ಕೆಲಸ ಮಾಡಿದ್ದ ಲವೀಶ್ ಒರ್ಡಿಯಾ ಆ.೧೩ರಂದು ವರ್ಗವಾಗಿದ್ದು, ಐದಾರು ದಿನ ನಂತರ ಜಿಲ್ಲಾಧಿಕಾರಿ ರಾಹುಲ್ ಪಾಂಡ್ವೆ ಅವರನ್ನು ಪ್ರಭಾರಿ ಸಿಇಒ ಆಗಿ ಅಧಿಕಾರ ವಹಿಸಿಕೊಂಡಿದ್ದಾರೆ. ಇದಾದ ಎರಡ್ಮೂರು ದಿನಕ್ಕೆ ರಾಯಚೂರು ಮಹಾನಗರ ಪಾಲಿಕೆ ಆಯುಕ್ತರಾಗಿದ್ದ ಜುಬಿನ್ ಮೊಹಾಪಾತ್ರ ಅವರನ್ನು ಜಿಪಂ ಸಿಇಒ ಸ್ಥಾನಕ್ಕೆ ಸರ್ಕಾರ ವರ್ಗ ಮಾಡಿ ಆದೇಶ ಹೊರಡಿಸಿದೆ. ೧೨ ದಿನಗಳಾಗುತ್ತಿದ್ದರೂ ಅವರಿನ್ನು ಅಧಿಕಾರ ಸ್ವೀಕರಿಸಿಲ್ಲ. ಹೀಗಾಗಿ ಬಹುದೊಡ್ಡ ಇಲಾಖೆ ಮುಖ್ಯಸ್ಥರ ಸ್ಥಾನ ಹೀಗೆ ಖಾಲಿ ಇದ್ದರೆ ಕೆಲಸಗಳು ಸುಗಮವಾಗಿ ಸಾಗುವುದು ಹೇಗೆ ಎಂಬ ಪ್ರಶ್ನೆ ಜಿಲ್ಲೆಯ ಪ್ರಜ್ಞಾವಂತರನ್ನು ಕಾಡುತ್ತಿದೆ.

ಪ್ರಭಾರಿ ಸಿಇಒ ಸ್ಥಾನದಲ್ಲಿರುವ ಜಿಲ್ಲಾಧಿಕಾರಿಗಳಿಗೆ ಅವರದೇ ಕೆಲಸ-ಕಾರ್ಯಗಳು ಬಹಳಷ್ಟಿದ್ದು, ಜಿಪಂಗೆ ಬಂದು ಆಡಳಿತ ನಡೆಸುವುದು ಕಷ್ಟಸಾಧ್ಯ ಎನ್ನಲಾಗುತ್ತಿದೆ. ಕಾರಣ ಗ್ರಾಮ ಪಂಚಾಯಿತಿ ಸೇರಿ ೨೮ ವಿವಿಧ ಇಲಾಖೆಗಳು ಜಿಪಂ ಅಧಿನಕ್ಕೆ ಒಳಪಡುತ್ತವೆ. ಹೆಚ್ಚೂ-ಕಮ್ಮಿ ನಗರ ಪ್ರದೇಶ ಬಿಟ್ಟರೆ ಜಿಲ್ಲೆಯ ಸಮಸ್ತ ಹಳ್ಳಿಗಳ ಅಭಿವೃದ್ಧಿ ಸೇರಿ ಸಮಾಜ ಕಲ್ಯಾಣ, ಶಾಲಾ ಶಿಕ್ಷಣ, ಕೃಷಿ, ಹಿಂದುಳಿದ ಇಲಾಖೆ ಹೀಗೆ ಮಹತ್ವದ ಮತ್ತು ಜನಸಂಪರ್ಕ ಕಚೇರಿಗಳು ಜಿಪಂ ವ್ಯಾಪ್ತಿಗೆ ಬರಲಿದ್ದು, ಇವೆಲ್ಲವನ್ನು ಸರಿಯಾಗಿ ನಿಭಾಯಿಸಿಕೊಂಡು ಹೋಗಲು ಐಎಎಸ್ ಅಽಕಾರಿಯೇ ಸಿಇಒ ಆಗಿ ಕರ್ತವ್ಯ ನಿರ್ವಹಿಸುವುದು ಅಗತ್ಯವಿದೆ. ಇದುವರೆಗೆ ಹಾಗೆಯೇ ನಡೆದುಕೊಂಡು ಬಂದಿದೆ. ಆದರೀಗ ಬರಗಾಲದಂತಹ ಕಠಿಣ ಸಮಯದಲ್ಲಿ ಜಿಪಂಗೆ ಕಾಯಂ ಸಿಇಒ ತಿಂಗಳಾದರೂ ಇಲ್ಲವೆಂದರೆ ಯಾರು ಹೊಣೆ ಎಂಬುದು ಸಾರ್ವಜನಿಕರ ಪ್ರಶ್ನೆಯಾಗಿದೆ.

ಗಿರಿ ಜಿಲ್ಲೆಯಲ್ಲಿ ಮಳೆ ಸಂಪೂರ್ಣ ಕೈಕೊಟ್ಟಿದ್ದು, ರೈತಾಪಿ ವರ್ಗ ತೀವ್ರ ಸಂಕಷ್ಟದಲ್ಲಿದೆ. ನೂರಾರು ಹಳ್ಳಿಗಳು ಕುಡಿಯುವ ನೀರಿನ ತೊಂದರೆ ಎದುರಿಸುತ್ತಿವೆ. ಜಾನುವಾರುಗಳಿಗೆ ಅಗತ್ಯ ಮೇವು, ಕುಡಿಯುವ ನೀರು ಸಹ ಸಕಾಲಕ್ಕೆ ಲಭ್ಯವಾಗುತ್ತಿಲ್ಲ. ನೂರಾರು ಗ್ರಾಪಂಗಳಲ್ಲಿ ಅಽಕಾರಿ, ಸಿಬ್ಬಂದಿ ಕೈಗೆ ಸಿಗುತ್ತಿಲ್ಲ. ಇದರಿಂದಾಗಿ ಗ್ರಾಮೀಣ ಪ್ರದೇಶದಲ್ಲಿ ಅಭಿವೃದ್ಧಿ ಕೆಲಸಗಳು ನಿಂತಿವೆ. ಸ್ವಚ್ಛತೆ ಮರೀಚಿಕೆಯಾಗಿ ಅಸ್ವಚ್ಛತೆ ತಾಂಡವವಾಡುತ್ತಿದೆ. ಹೀಗೆ ಒಂದೇ ಎರಡೇ ನೂರೆಂಟು ಸಮಸ್ಯೆಗಳು ಗ್ರಾಮೀಣ ಭಾಗದಲ್ಲಿ ತಲೆ ಎತ್ತಿವೆ. ಇಂಥದರಲ್ಲಿ ಜಿಪಂಗೆ ಕಾಯಂ ಸಿಇಒ ಇಲ್ಲದಿರುವುದು ಬಹುದೊಡ್ಡ ಸಮಸ್ಯೆಯಾಗಿ ಪರಿಣಮಿಸಿದೆ.

ರಾಯಚೂರು ಮಹಾನಗ ಪಾಲಿಕೆ ಆಯುಕ್ತರಾಗಿದ್ದ ಜುಬಿನ್ ಮೊಹಾಪಾತ್ರ ಅವರು ಸರ್ಕಾರದ ಆದೇಶದಂತೆ ವರ್ಗವಾಗಿ ಇಲ್ಲಿನ ಜಿಪಂ ಸಿಇಒ ಸ್ಥಾನದ ಅಽಕಾರ ಸ್ವೀಕರಿಸಬೇಕಿತ್ತು. ಆದರೆ ಬಲ್ಲ ಮೂಲಗಳ ಪ್ರಕಾರ ಅವರನ್ನು ಎಸ್‌ಐಆರ್ ಕೆಲಸಕ್ಕೆ ನಿಯೋಜಿಸಿದ್ದು, ಒಂದು ತಿಂಗಳವರೆಗೆ ಆ ಕೆಲಸದಲ್ಲಿ ನಿರತರಾಗಿದ್ದಾರೆ. ಅದು ಮುಗಿದ ಮೇಲೆಯೇ ಇಲ್ಲಿಗೆ ಬರುತ್ತಾರೆಂಬ ಮಾಹಿತಿ ಇದೆ. ಏನೇ ಇರಲಿ, ಹಿಂದುಳಿದ ಹಣೆಪಟ್ಟಿ ಹೊತ್ತಿರುವ ಗಿರಿ ಜಿಲ್ಲೆಯ ಜಿಪಂ ಸಿಇಒ ಸ್ಥಾನ ತಿಂಗಳಾನುಗಟ್ಟಲೇ ಖಾಲಿ ಇಟ್ಟರೆ ಇನ್ನೆಂತಹ ಅಭಿವೃದ್ಧಿ ನಿರೀಕ್ಷಿಸಲು ಸಾಧ್ಯ?! ಇದಲ್ಲದೆ ನೂತನ ಜಿಲ್ಲಾ ಉಸ್ತುವಾರಿ ಸಚಿವ ಡಾ.ಶರಣಪ್ರಕಾಶ ಪಾಟೀಲ್ ಸೆ.೧೧, ೧೫ಕ್ಕೆ ಕೆಡಿಪಿ ಸಭೆ ಕರೆದಿದ್ದಾರೆ. ಇಂತಹ ಸಂದರ್ಭದಲ್ಲಿ ಪ್ರಮುಖ ಇಲಾಖೆ ಮುಖ್ಯಸ್ಥರು ಇಲ್ಲವೆಂದರೆ ಹೇಗೆ?

"