ವಿಜಯ್ ಹಜಾರೆ ಟ್ರೋಫಿ: ಮಯಾಂಕ್, ಪಡಿಕ್ಕಲ್ ಶತಕ ರಾಜ್ಯಕ್ಕೆ ಸತತ 4ನೇ ಗೆಲುವು

ಎಡಿಎಸ್‌ಎ ರೈಲ್ವೇಸ್ ಗ್ರೌಂಡ್‌ನಲ್ಲಿ ಬುಧವಾರ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಕರ್ನಾಟಕ ಬ್ಯಾಟಿಂಗ್ ಆಯ್ದುಕೊಂಡಿತು. ಮಯಾಂಕ್-ಪಡಿಕ್ಕಲ್ ಮೊದಲ ವಿಕೆಟ್‌ಗೆ 228 ಎಸೆತಗಳಲ್ಲಿ 228 ರನ್ ಸೇರಿಸಿ ಉತ್ತಮ ಅಡಿಪಾಯ ಹಾಕಿಕೊಟ್ಟರು. ಆರಂಭಿಕ ಎರಡು ಪಂದ್ಯಗಳಲ್ಲಿ ಶತಕ ಸಿಡಿಸಿದ್ದ ಪಡಿಕ್ಕಲ್ ಕಳೆದ 4 ಪಂದ್ಯಗಳಲ್ಲಿ 3ನೇ ಶತಕದ ಸಾಧನೆ ಮಾಡಿದರು. ಇವರಿಬ್ಬರ ನಿರ್ಗಮನ ಬಳಿಕ ಮೂರನೇ ವಿಕೆಟ್‌ಗೆ ಕರುಣ್ ನಾಯರ್ (62*ರನ್, 34 ಎಸೆತ, 4 ಬೌಂಡರಿ, 4 ಸಿಕ್ಸರ್) ಹಾಗೂ ಆರ್.ಸ್ಮರಣ್ (21) ಜೋಡಿ 33 ಎಸೆತಗಳಲ್ಲಿ 56 ರನ್ ಕಸಿಯಿತು. ಕೊನೆಯಲ್ಲಿ ಅಭಿನವ್ ಮನೋಹರ್ (21*) ನಡೆಸಿದ ಬಿರುಸಿನಾಟದ ಬಲದಿಂದ ಕರ್ನಾಟಕ 4 ವಿಕೆಟ್‌ಗೆ 363 ರನ್‌ಗಳ ಬೃಹತ್ ಮೊತ್ತ ಪೇರಿಸಿತು.

ಪ್ರತಿಯಾಗಿ ನೆಯಾನ್ ಕಂಗಾಯನ್ (68 ರನ್, 66 ಎಸೆತ, 9 ಬೌಂಡರಿ, 1 ಸಿಕ್ಸರ್) ಹಾಗೂ ಜಯಂತ್ ಯಾದವ್ (54 ರನ್, 35 ಎಸೆತ, 4 ಬೌಂಡರಿ, 2 ಸಿಕ್ಸರ್) ಹೋರಾಟ ತೋರಿದ ನಡುವೆಯೂ ಪುದುಚೇರಿ ಭರ್ತಿ 50 ಓವರ್‌ಗಳಲ್ಲಿ 296 ರನ್‌ಗಳಿಗೆ ಆಲೌಟ್ ಆಯಿತು. ಪದಾರ್ಪಣೆ ಪಂದ್ಯವನ್ನಾಡಿದ ಮನ್ವಂತ್ ಕುಮಾರ್ ಎಲ್. ಮೂರು ವಿಕೆಟ್ ಕಬಳಿಸಿದರೆ, ಕರುಣ್ ನಾಯರ್, ವಿದ್ವತ್ ಕಾವೇರಪ್ಪ ತಲಾ 2 ವಿಕೆಟ್ ಪಡೆದರು.

ಕರ್ನಾಟಕ: 4 ವಿಕೆಟ್‌ಗೆ 363 (ಮಯಾಂಕ್ 132, ಪಡಿಕ್ಕಲ್ 113, ಕರುಣ್ 62*, ಸ್ಮರಣ್ 21, ಮನ್ವಂತ್ ಕುಮಾರ್ 3, ಅಭಿನವ್ ಮನೋಹರ್ 21*, ಜಯಂತ್ ಯಾದವ್ 41ಕ್ಕೆ 1). ಪುದುಚೇರಿ: 50 ಓವರ್‌ಗಳಲ್ಲಿ 296 (ನೆಯಾನ್ 68, ಅಜಯ್ 32, ಜಶ್ವಂತ್ 14, ಮೋಹಿತ್ 22, ಅಮನ್ 34, ವಿಕ್ನಿನ್ವಿಶರನ್ 31, ಜಯಂತ್ 54, ಸಿದಕ್ ಸಿಂಗ್ 27, ಮನ್ವಂತ್ ಕುಮಾರ್ 52ಕ್ಕೆ 3, ವಿದ್ವತ್ 30ಕ್ಕೆ 2, ಕರುಣ್ 38ಕ್ಕೆ 2).