ಕಠಿಣ ಶಿಸ್ತು ನಮ್ಮನ್ನು ಗಟ್ಟಿ ಮಾಡುತ್ತೆ
ನಾನು ಹುಟ್ಟಿ ಬೆಳೆದ ಕನಕಪುರದ ಮಣ್ಣಿನಿಂದ ಹಿಡಿದು, ಇವತ್ತು ನಾಡಿನ ಸೇವೆ ಮಾಡುವ ಈ ಜವಾಬ್ದಾರಿಯ ತನಕ ನಡೆದುಬಂದ ದಾರಿಯನ್ನು ನೆನಪಿಸಿಕೊಂಡರೆ ನನ್ನ ಕಣ್ಣಮುಂದೆ ಮೊದಲು ಬರುವುದೇ ನನ್ನ ಗುರುಗಳ ಮಾರ್ಗದರ್ಶನ. ಶಾಲೆಯಲ್ಲಿ ಕಲಿಯುವಾಗ ನಮಗೆ ಮೇಷ್ಟ್ರುಗಳ ಬೆಲೆ ಅಷ್ಟು ಗೊತ್ತಾಗಲ್ಲ. ಆದರೆ ಬದುಕಿನ ಏಳುಬೀಳುಗಳನ್ನೆಲ್ಲ ದಾಟಿ ಈ ಮಟ್ಟಕ್ಕೆ ಬಂದು ನಿಂತಾಗ, ಆವತ್ತು ನಮ್ಮನ್ನು ತಿದ್ದಿ ತೀಡಿದ ಅವರ ಬೆಲೆ ಎಷ್ಟಿತ್ತು ಎಂದು ಅರ್ಥವಾಗುತ್ತದೆ. ಅಧಿಕಾರ, ಸ್ಥಾನಮಾನ ಏನೇ ಬರಲಿ, ಅಕ್ಷರ ಕಲಿಸಿದ ಗುರುಗಳ ಮುಂದೆ ನಾವೆಂದಿಗೂ ಕೈಮುಗಿದು ನಿಲ್ಲುವ ಶಿಷ್ಯರು ಮಾತ್ರ.
ಚಿಕ್ಕಂದಿನಲ್ಲಿ ನಾನೊಬ್ಬ ತುಂಟ ಹುಡುಗ. ಓದಿಗಿಂತ ಆಟ, ಚರ್ಚೆ ಮತ್ತು ಪಠ್ಯೇತರ ಚಟುವಟಿಕೆಗಳಲ್ಲೇ ಹೆಚ್ಚು ಆಸಕ್ತಿ. ಆದರೆ ನನಗೆ ಐದರಿಂದ ಏಳನೇ ತರಗತಿವರೆಗೆ ಕಲಿಸಿದ ಗುರುಗಳು, ನನ್ನೊಳಗಿನ ನಾಯಕತ್ವದ ಗುಣಗಳನ್ನು ಆಗಲೇ ಗುರುತಿಸಿ ಪೋ›ತ್ಸಾಹಿಸಿದರು. ಓಡುವ ಕುದುರೆ ಮೇಲೆ ಯಾರಾದರೂ ಸವಾರಿ ಮಾಡಬಹುದು, ಆದರೆ ಓಡಲಾರದ ಕುದುರೆಯನ್ನು ರೇಸ್ಗೆ ಅಣಿಗೊಳಿಸುವುದು ನಿಜವಾದ ಶಿಕ್ಷರಿಂದ ಮಾತ್ರ ಸಾಧ್ಯ.
ನಮ್ಮೊಳಗಿನ ಸಾಧ್ಯತೆಗಳು ನಮಗೇ ತಿಳಿಯುವ ಮೊದಲೇ ಶಿಕ್ಷಕರು ಅದನ್ನು ಗುರುತಿಸುತ್ತಾರೆ. ಇನ್ನು ನ್ಯಾಷನಲ್ ಪಬ್ಲಿಕ್ ಸ್ಕೂಲ್ನಲ್ಲಿ ನನಗಾದ ಅನುಭವ ನನ್ನ ಬದುಕನ್ನೇ ಬದಲಿಸಿಬಿಟ್ಟಿತು. ಶಾಲೆಯ ಕಟ್ಟುನಿಟ್ಟಾದ ಓದಿಗೆ ಹೊಂದಿಕೊಳ್ಳೋದಕ್ಕೆ ಆಗದಿದ್ದಾಗ, ಡಾ.ಕೆ.ಪಿ.ಗೋಪಾಲಕೃಷ್ಣ ಸರ್ ನನಗೆ ಟಿಸಿ ಕೊಟ್ಟು ಕಳುಹಿಸಿಬಿಟ್ಟರು. ಹುಡುಗಾಟದ ವಯಸ್ಸಲ್ಲಿ ಅದು ಬೇಸರ ತಂದಿದ್ದು ನಿಜ. ಆದರೆ ಅದೇ ನೋವು ನನ್ನಲ್ಲಿ ಒಂದು ಹಠ ಹುಟ್ಟಿಸಿತು. ಸೋಲೊಪ್ಪಿಕೊಳ್ಳದೆ ಮುಂದೆ ಸಾಗೋಕೆ, ಮುಂದೆ ನಾನೇ ದೊಡ್ಡ ಶಿಕ್ಷಣ ಸಂಸ್ಥೆಗಳನ್ನು ಕಟ್ಟಬೇಕು ಅನ್ನೋ ಛಲ ತಂದುಕೊಟ್ಟಿತು.
ನಾನು ಶಾಸಕನಾಗಿ ವಿಧಾನಸಭೆಗೆ ಬಂದು, ಅಲ್ಲಿದ್ದ ಘಟಾನುಘಟಿ ನಾಯಕರಾದ ರಾಮಕೃಷ್ಣ ಹೆಗಡೆ, ವೀರೇಂದ್ರ ಪಾಟೀಲ್, ಬಂಗಾರಪ್ಪ, ವೀರಪ್ಪ ಮೊಯ್ಲಿ, ಎಸ್.ಎಂ ಕೃಷ್ಣ, ನಂಜೇಗೌಡ, ಎಂ ಸಿ ನಾಣಯ್ಯ, ಎ.ಕೆ ಸುಬ್ಬಯ್ಯ ಅವರ ವಾಗ್ಚಾತುರ್ಯ, ಪಾಂಡಿತ್ಯ ಕಂಡಾಗ ವಿದ್ಯೆಯ ಮಹತ್ವ ಅರಿವಾಯಿತು. ಹೀಗಾಗಿ 46ನೇ ವಯಸ್ಸಿನಲ್ಲಿ ಎಂಎ ಪೊಲಿಟಿಕಲ್ ಸೈನ್ಸ್ ಪರೀಕ್ಷೆ ಬರೆದು ಪಾಸು ಮಾಡಿದೆ. ಪ್ರೀತಿಯಿಂದ ತಿದ್ದೋ ಮಾತಷ್ಟೇ ಅಲ್ಲ, ಮಕ್ಕಳನ್ನು ದಾರಿಗೆ ತರೋಕೆ ಮಾಡುವ ಕಠಿಣ ಶಿಸ್ತು ನಮ್ಮನ್ನು ಗಟ್ಟಿ ಮಾಡುತ್ತೆ ಅನ್ನೋದಕ್ಕೆ ನನ್ನ ಬದುಕೇ ಸಾಕ್ಷಿ.
| ಡಿ.ಕೆ.ಶಿವಕುಮಾರ್ ಮುಖ್ಯಮಂತ್ರಿ
