ಬೇಸಿಗೆಗೂ ಮುನ್ನವೇ ಕೆರೆ-ಕಟ್ಟೆಗಳು ಬರಿದು

ತಾಲೂಕಿನ ಕಸಬಾ, ಬೆಳ್ಳೂರು, ಹೊಣಕೆರೆ, ದೇವಲಾಪುರ, ಬಿಂಡಿಗನವಿಲೆ ಸೇರಿದಂತೆ 5 ಹೋಬಳಿ ಕೇಂದ್ರವಿದ್ದು, ಎಲ್ಲ ಪ್ರದೇಶಗಳು ಕೂಡ ಮಳೆಯನ್ನೇ ಆಶ್ರಯಿಸಿವೆ. ಇದರ ಜತೆಗೆ ತರಕಾರಿ, ತೆಂಗು ಇತರ ಬೆಳೆ ಬೆಳೆಯುವ ರೈತರು ಕೊಳವೆ ಬಾವಿಗಳನ್ನು ಆಶ್ರಯಿಸಿದ್ದಾರೆ. ಅಲ್ಲದೆ ಜನ-ಜಾನುವಾರುಗಳಿಗೆ ಮುಂದಿನ ದಿನಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ಎದುರಾಗಲಿದೆ. ಈ ಪ್ರದೇಶಗಳು ವರುಣನ ಅವಕೃಪೆಗೆ ಒಳಗಾಗಿದ್ದು, ಕಳೆದ ಜೂನ್‌ನಿಂದ ಯಾವುದೇ ಮಳೆ ಬೀಳದ ಕಾರಣ ಬೆಳೆಗಳು ಒಣಗುತ್ತಿವೆ.

ತಾಲೂಕಿನ ಕೆರೆ-ಕಟ್ಟೆಗಳಲ್ಲಿ ನೀರಿಲ್ಲದ ಪರಿಣಾಮ ದಿನದಿಂದ ದಿನಕ್ಕೆ ಒಣಗುತ್ತಿವೆ, ತಾಲೂಕಿನಲ್ಲಿ ಸಣ್ಣ-ಪುಟ್ಟ ಸೇರಿದಂತೆ ಒಟ್ಟು 204 ಕೆರೆ-ಕಟ್ಟೆಗಳಿದ್ದು, ಇದರಲ್ಲಿ ಬೆಳ್ಳೂರಿನ ದಾಸನಕೆರೆ ಹಾಗೂ ನಾಗಮಂಗಲ ಪಟ್ಟಣದ ಹೊರವಲಯದಲ್ಲಿರುವ ಸೂಳೆಕೆರೆ ಕುಡಿಯುವ ನೀರಿನ ಬಳಕೆಗಿವೆ. 62 ಕೆರೆಗಳು ಕಾವೇರಿ ನೀರಾವರಿ ನಿಗಮದ ಅಚ್ಚುಕಟ್ಟು ಪ್ರದೇಶದ ವ್ಯಾಪ್ತಿಗೆ ಒಳಪಡುತ್ತಿದ್ದು, ಆ ಪ್ರದೇಶಗಳೂ ಕೂಡ ಈಗ ಬರಡು ಭೂಮಿಯಂತೆ ಕಾಣುತ್ತಿವೆ.

ತಾಲೂಕಿನಲ್ಲಿ 41 ಸಾವಿರ ಹೆಕ್ಟೇರ್ ಪ್ರದೇಶದಲ್ಲಿ ನಾನಾ ಬೆಳೆಗಳನ್ನು ಬೆಳೆಯಲಾಗುತ್ತದೆ. ಜತೆಗೆ ಶೇ.95 ರಷ್ಟು ಮಳೆಯಾಶ್ರಿತ ಪ್ರದೇಶವಿದೆ. ರಾಗಿ, ಹುರುಳಿ, ಅಲಸಂದೆ ಪ್ರಮುಖ ಬೆಳೆಯಾಗಿದ್ದು, ಇದರ ಜತೆಗೆ ತರಕಾರಿ ಸೇರಿದಂತೆ ದ್ವಿದಳ ಧಾನ್ಯಗಳನ್ನೂ ಸಹ ಬೆಳೆಯಲಾಗುತ್ತದೆ. ಪ್ರಸ್ತುತ ವರ್ಷ ಮಳೆ ಕೊರತೆ ಎದುರಾಗಿರುವುದರಿಂದ ಯಾವುದೇ ಬೆಳೆ ಬೆಳೆಯಲು ಸಾಧ್ಯವಾಗದಿದ್ದು, ರೈತರು ಬಿತ್ತನೆ ಕಾರ್ಯಕ್ಕಾಗಿ ಭೂಮಿಯನ್ನು ಉಳುಮೆ ಮಾಡಿಲ್ಲ. ಮುಂಗಾರು ಮಳೆ ಸ್ವಲ್ಪ ಪ್ರಮಾಣದಲ್ಲಿ ಆಗಿದ್ದನ್ನು ಹೊರತು ಪಡಿಸಿದರೆ ಪರಿಪೂರ್ಣವಾಗಿ ಮಳೆಯಾಗಿಲ್ಲ.

ಜೂನ್ ಆರಂಭದಲ್ಲಿ 45 ಮಿ.ಮೀಟರ್ ಮಳೆ ಆಗಿದ್ದನ್ನು ಹೊರತು ಪಡಿಸಿದರೆ ಈವರೆಗೂ ಮಳೆಯಾಗಿಲ್ಲ. ಇದರಿಂದಾಗಿ ರೈತರು ಇನ್ನೂ ಬಿತ್ತನೆ ಮಾಡಲು ಸಾಧ್ಯವಾಗದೆ ಚಿಂತಾಕ್ರಾಂತ ಸ್ಥಿತಿಯಲ್ಲಿದ್ದಾರೆ. ಜೂನ್‌ನಲ್ಲಿ ಬಿದ್ದ ಮಳೆಗೆ ಕೆಲವರು ಹಾಕಿದ್ದ ಹುರುಳಿ, ಅಲಸಂದೆ, ಎಳ್ಳು ಬೆಳೆಯೂ ಸರಿಯಾಗಿ ಹುಟ್ಟಿಲ್ಲ. ಅಲ್ಲದೆ ಕೆಲವು ಕಡೆ ಒಣಗಿ ನಿಂತಿವೆ.

ಬರ ಘೋಷಣೆ: ನಾಗಮಂಗಲ ಕ್ಷೇತ್ರದ ಶಾಸಕ ಎನ್.ಚಲುವರಾಯಸ್ವಾಮಿ ಅವರೇ ಜಿಲ್ಲಾ ಉಸ್ತುವಾರಿಯಾಗಿದ್ದು, ಜಿಲ್ಲಾದ್ಯಂತ ಬರಪ್ರದೇಶ ವೀಕ್ಷಣೆ ಮಾಡಿ ಸರ್ಕಾರಕ್ಕೆ ವರದಿ ನೀಡಿದ್ದರು. ಕಳೆದ ಬಾರಿ ಚಲುವರಾಯಸ್ವಾಮಿ ಕೃಷಿ ಸಚಿವರಾಗಿದ್ದರಿಂದ ರೈತರು ಹಾಗೂ ಕೃಷಿಯ ಬಗ್ಗೆ ಮತ್ತಷ್ಟು ಅನುಭವವಿರುವುದರಿಂದ ತಾಲೂಕಿನದ್ಯಂತ ಬೆಳೆಗಳನ್ನು ವೀಕ್ಷಿಸಿದ ಬಳಿಕ ತಾಲೂಕನ್ನು ತೀವ್ರಬರಪೀಡಿತ ಎಂದು ಘೋಷಿಸಿದ್ದಾರೆ. ಬರಘೋಷಣೆ ಹಿನ್ನೆಲೆಯಲ್ಲಿ ರೈತರು ಬೆಳೆವಿಮೆ ಹಾಗೂ ಇತರ ಪರಿಹಾರದ ನಿರೀಕ್ಷೆಯಲ್ಲಿದ್ದಾರೆ.