ಭೂಮಿ ನೀಡುವ ರೈತರನ್ನು ಸಂತ್ರಸ್ತರು ಎಂದು ಪರಿಗಣಿಸುವ ಬದಲು, ಆಯಾ ಯೋಜನೆಯ ಲಾಭ ಪಡೆಯುವ ಪಾಲುದಾರರ ರೂಪದಲ್ಲಿ ಪರಿಗಣಿಸುವ ಚಿಂತನೆ ಮೊಳಕೆಯೊಡದಿದ್ದು, ಪ್ರಾಥಮಿಕ ಹಂತದಲ್ಲಿ ಚಿಂತನ ಮಂಥನ ನಡೆದಿದೆ. ಸಾಂಪ್ರದಾಯಿಕ ಭೂಸ್ವಾಧೀನ ಪದ್ಧತಿಯಲ್ಲಿ ರೈತರಿಗೆ ಒಂದೇ ಬಾರಿ ನಗದು ಪರಿಹಾರ ನೀಡಿ ಕೈತೊಳೆದುಕೊಳ್ಳಲಾಗುತ್ತದೆ. ಕೈಗಾರಿಕೆ, ವಸತಿ ನಿವೇಶನ ಯೋಜನೆಯಲ್ಲಾದರೆ ಅಭಿವೃದ್ಧಿಪಡಿಸಿದ ಭೂಮಿಯನ್ನು ಪರಿಹಾರದ ಮೊತ್ತಕ್ಕೆ ಸಮಾನವಾಗಿ ನೀಡುವ ವ್ಯವಸ್ಥೆ ಇದೆ. ಆದರೆ, ಈ ಹೊಸ ಮಾದರಿಯಲ್ಲಿ ಭೂಮಿ ಕಳೆದುಕೊಂಡ ರೈತರಿಗೆ ಯೋಜನೆಯಿಂದ ಬರುವ ವಾರ್ಷಿಕ ಆದಾಯದಲ್ಲಿ ನಿರ್ದಿಷ್ಟ ಶೇಕಡವಾರು ಪಾಲನ್ನು ನಿಯಮಿತವಾಗಿ ಹಂಚಿಕೆ ಮಾಡುವ ಚೌಕಟ್ಟನ್ನು ರೂಪಿಸುವ ಬಗ್ಗೆ ಚಿಂತನೆ ನಡೆದಿದೆ.
