58152 ಮಕ್ಕಳಿಗೆ ಲಸಿಕೆ ಹಾಕುವ ಗುರಿ

ಸುರಪುರ: ಜೂನ್​ 28ರಿಂದ ಜು.1ರವರೆಗೆ ಪಲ್ಸ್​ ಪೋಲಿಯೋ ಕಾರ್ಯಕ್ರಮ ನಡೆಯಲಿದ್ದು, ಹುಣಸಗಿ ಮತ್ತು ಸರುಪುರ ಈ ಎರಡು ತಾಲೂಕಿನಲ್ಲಿ ಒಟ್ಟು 58152 ಮಕ್ಕಳಿಗೆ ಲಸಿಕೆ ಹಾಕುವ ಗುರಿ ಹೊಂದಲಾಗಿದೆ ಎಂದು ತಾಲೂಕು ಆರೋಗ್ಯಾಧಿಕಾರಿ ಡಾ.ಆರ್​.ವಿ.ನಾಯಕ ತಿಳಿಸಿದರು.

ಈ ಕುರಿತು ಸೋಮವಾರ ತಹಸಿಲ್​ ಕಚೇರಿಯಲ್ಲಿ ಕರೆದಿದ್ದ ಪೂರ್ವಭಾವಿ ಸಭೆಯಲ್ಲಿ ಮಾತನಾಡಿದ ಅವರು, ಈ ಕಾರ್ಯಕ್ರಮ ಯಶಸ್ಸಿಗೆ ಎಲ್ಲ ಅನುಷ್ಠಾನ ಅಕಾರಿಗಳು ಕೈ ಜೋಡಿಸಬೇಕು ಎಂದು ಅವರು ಹೇಳಿದರು.

ಕಾರ್ಯಕ್ರಮ ಯಶಸ್ಸಿಗೆ ಒಟ್ಟು 233 ತಂಡ ರಚಿಸಲಾಗಿದ್ದು 492 ಲಸಿಕೆ ಹಾಕುವ ಸಿಬ್ಬಂದಿ ನೇಮಿಸಲಾಗಿದೆ. 47 ಮೇಲ್ವಿಚಾರಕರನ್ನು, 11 ಟ್ರಾಂಜಿಟ್​ ಕೇಂದ್ರ, 2 ಮೊಬೈಲ್​ ಟೀಮ್​ ನೇಮಕ ಮಾಡಲಾಗಿದೆ ಎಂದು ಮಾಹಿತಿ ನೀಡಿದರು.

ಸುರಪುರ ಸರ್ಕಾರಿ ಸಾರ್ವಜನಿಕ ಆಸ್ಪತ್ರೆ, ನಗರ ಆರೋಗ್ಯ ಕೇಂದ್ರ, ದೇವರಗೋನಾಲ, ಗುತ್ತಿಬಸವೇಶ್ವರ, ಹಸನಾಪುರ, ಹೆಮನೂರ, ಪೇಠ ಅಮ್ಮಾಪುರ, ಕಕ್ಕೇರಾ, ಕಲ್ಲದೇವನಳ್ಳಿ, ಶ್ರೀನಿವಾಸಪುರ, ಕೊಡೇಕಲ್​, ರಾಜನಕೋಳೂರು, ಕೆಂಭಾವಿ, ಮಲ್ಲಾ (ಬಿ), ನಗನೂರ, ಸುರಪುರ ಮತ್ತು ಹುಣಸಗಿ ಬಸ್​ ನಿಲ್ದಾಣ ಸೇರಿ 16ಕ್ಕೂ ಹೆಚ್ಚು ಕೇಂದ್ರಗಳಲ್ಲಿ ಲಸಿಕೆ ಹಾಕಲಾಗುತ್ತಿದೆ.

ಗ್ರಾಮೀಣ ಪ್ರದೇಶಗಳಲ್ಲಿ ಗ್ರಾಪಂ ನವರು 26 ಮತ್ತು 27ರಂದು ಪ್ರತಿ ಗ್ರಾಮಗಳಲ್ಲಿ ಡಂಗೂರ ಹಾಕಿಸಬೇಕು. ನಗರ ಪ್ರದೇಶಗಳಲ್ಲಿ ನಗರಸಭೆ, ಪುರಸಭೆ, ಪಟ್ಟಣ ಪಂಚಾಯಿತಿ ಅಟೋ, ಟಂಟಂಗಳಲ್ಲಿ ಧ್ವನಿ ವರ್ಧಕದ ಮೂಲಕ ಜಾಗೃತಿ ಮೂಡಿಸಬೇಕು ಎಂದು ಸಲಹೆ ನೀಡಿದರು.

ಶಿಕ್ಷಣ ಇಲಾಖೆ ಅವರು 0ದಿಂದ 5 ವರ್ಷದ ಒಳಗಿನ ಮಕ್ಕಳಿಗೆ ಕರೆ ತಂದು ಕಡ್ಡಾಯವಾಗಿ ಲಸಿಕೆ ಹಾಕಿಸಲು ಸಹಕರಿಸಬೇಕು. ಅಂದು ಭಾನುವಾರ ಇರುವುದರಿಂದ ಶಾಲೆಗಳಿಗೆ ರಜೆ ರದ್ದು, ಶಾಲೆ ತೆರೆದಿಡುವ ವ್ಯವಸ್ಥೆ ಮಾಡಬೇಕು ಪ್ರತಿಯೊಬ್ಬ ವಿದ್ಯಾರ್ಥಿಗೆ 10 ಮಕ್ಕಳನ್ನು ಕರೆ ತಂದು ಲಸಿಕೆ ಹಾಕಿಸುವ ಗುರಿ ನೀಡಬೇಕು. ಅಂಗನವಾಡಿ, ಆಶಾಕಾರ್ಯಕರ್ತೆಯರು ಕೇಂದ್ರಗಳಲ್ಲಿದ್ದು ಮನೆ ಮನೆಗೆ ತೆರಳಿ ಐದು ವರ್ಷದ ಒಳಗಿನ ಮಕ್ಕಳಿಗೆ ಲಸಿಕೆ ಹಾಕಿಸಬೇಕು. ಒಟ್ಟಾರೆ ಅಭಿಯಾನ ಯಶಸ್ಸಿಗೆ ಕೈ ಜೋಡಿಸಬೇಕು. ಪೋಲಿಯೋ ಮುಕ್ತಭಾರತ ನಿರ್ಮಾಣದ ಆರೋಗ್ಯ ಇಲಾಖೆಯ ಸಂಕಲ್ಪಕ್ಕೆ ತಾವೆಲ್ಲರೂ ಸಹಕರಿಸಬೇಕು ಎಂದು ಮನವಿ ಮಾಡಿದರು. ಸಿಡಿಪಿಒ ಲಾಲ್​ಸಾಬ್​ ಪೀರಾಪುರ, ಜೆಸ್ಕಾಂ ಎಇಇ ರಫೀಕ್​, ನಗರಸಭೆಯ ಎಇಇ ಶಾಂತಪ್ಪ, ಸಾರಿಗೆ ಇಲಾಖೆ ಅಧಿಕಾರಿಗಳು ಸೇರಿ ತಾಲೂಕಿನ ಅನುಷ್ಠಾನ ಅಕಾರಿಗಳಿದ್ದರು.