ಸಂವಿಧಾನ ಆಶಯ ಇಂದಿಗೂ ಈಡೇರಿಲ್ಲ:ಸಿಎಂ ಸಿದ್ದರಾಮಯ್ಯ ಬೇಸರ-constitutional

ಸಮಾಜ ಕಲ್ಯಾಣ ಇಲಾಖೆ, ವಸಂತನಗರದ ಡಾ.ಬಿ.ಆರ್.ಅಂಬೇಡ್ಕರ್ ಭವನದಲ್ಲಿ ಬುಧವಾರ ಆಯೋಜಿಸಿದ್ದ ‘ಸಂವಿಧಾನ ದಿನಾಚರಣೆ’ ಕಾರ್ಯಕ್ರಮದಲ್ಲಿ ಸಿಎಂ ಮಾತನಾಡಿದರು.

 ‘ವೀ ದ ಪೀಪಲ್ ಆಫ್​​ ಇಂಡಿಯಾ’ ಎನ್ನುವುದೇ ನಮ್ಮ ಸಂವಿಧಾನದ ಮೂಲ ಮಂತ್ರ. ಇಂದಿನ ದಿನಮಾನಗಳಲ್ಲಿ ಸಂವಿಧಾನದ ಆಶಯ ಬಗ್ಗೆ ಆತ್ಮವಲೋಕನ ಮಾಡಿಕೊಳ್ಳಬೇಕಿದೆ.ಸಮಸಮಾಜ ನಿರ್ಮಾಣ ಮತ್ತು ಅಸಮಾನತೆ ನಿವಾರಣೆ ಅಂಬೇಡ್ಕರ್ ಆಶಯವಾಗಿತ್ತು.ಅವರಿಂದ ಸಂವಿಧಾನ ರಚನೆಯಾಗಿಲ್ಲ ಎಂದು  ಮನುವಾದಿಗಳು ವಾದಿಸುತ್ತಾರೆ. ಆದರೆ, ಸಂವಿಧಾನ ಶಿಲ್ಪಿ ಅಂಬೇಡ್ಕರ್  ಎನ್ನುವುದನ್ನು ಮರೆಯಬಾರದು. ಈ ದೇಶದ ಜಾತಿ ವ್ಯವಸ್ಥೆ ಮತ್ತು ಅಪಾಯಗಳ ಬಗ್ಗೆ ಅವರಿಗೆ ಗೊತ್ತಿತ್ತು.  ಅದಕ್ಕಾಗಿ ಸಂವಿಧಾನದಲ್ಲಿ ಮೀಸಲಾತಿ ಸೇರಿಸಿದ್ದರು ಎಂದರು. 

ದೇಶದಲ್ಲಿ ಸಂವಿಧಾನ ವಿರೋಧಿ ಮನುವಾದಿಗಳನ್ನು ಗುರುತಿಸಬೇಕು. ಸಂವಿಧಾನ ಜಾರಿಗೆ ಬರುವ  ಮುನ್ನ ದೇಶದಲ್ಲಿ ಅಲಿಖಿತ ಮನುಸ್ಮೃತಿ ಜಾರಿಯಲ್ಲಿತ್ತು. ಮನುಸ್ಮೃತಿಯಲ್ಲಿದ್ದ ಮನುಷ್ಯ ವಿರೋಧಿ, ಸಮಾನತೆ ವಿರೋಧಿ ನಿಯಮಗಳಿಗೆ ಸಂವಿಧಾನದಲ್ಲಿ ಅವಕಾಶ ಇಲ್ಲದಂತಾಯಿತು. ಅದಕ್ಕಾಗಿ ಮನುವಾದಿಗಳು ಸಂವಿಧಾನವನ್ನು ವಿರೋಧಿಸುತ್ತಾರೆ.  ದೇಶದ ಜನತೆಗೆ ಎಂತಹ ಸಂವಿಧಾನ ಬೇಕು ಎಂಬುದರ ಬಗ್ಗೆ ಒಂದು ವರ್ಷ ಸಮಗ್ರವಾಗಿ ಚರ್ಚೆ ನಡೆದ  ಬಳಿಕ ಇದನ್ನು ಅಂಗೀಕರಿಸಲಾಯಿತು ಎಂದು ಸಿಎಂ ಹೇಳಿದರು. 

ಇದಕ್ಕೂ ಮುನ್ನ ವಿಧಾನಸೌಧದಿಂದ ಅಂಬೇಡ್ಕರ್ ಭವನವರೆಗೆ ಜಾಥಾ ನಡೆಯಿತು. ಸಂವಿಧಾನ ಆಶಯ ಕುರಿತು ನಿರರ್ಗಳವಾಗಿ ಮಾತನಾಡಿದ್ದ ಬಾಲಕ ತೇಜಸ್ ಚಕ್ರವರ್ತಿ ಅವರನ್ನು ಸಿಎಂ ಸನ್ಮಾನಿಸಿದರು. ವಿಜೇತ ವಿದ್ಯಾರ್ಥಿಗಳಿಗೆ ನಗದು ಬಹುಮಾನ ವಿತರಿಸಲಾಯಿತು. ಸಚಿವ ಎಂ.ಸಿ. ಸುಧಾಕರ್, ಸಿಎಂ ರಾಜಕೀಯ ಕಾರ್ಯದರ್ಶಿ ನಜೀರ್ ಅಹ್ಮದ್, ಕಾನೂನು ಸಲಹೆಗಾರ ಎ.ಎಸ್. ಪೊನ್ನಣ್ಣ, ಇಲಾಖೆ ಕಾರ್ಯದರ್ಶಿ ಡಿ.ರಣದೀಪ್ ಮತ್ತು ಆಯುಕ್ತ ಡಾ.ಕೆ.ರಾಕೇಶ್ ಕುಮಾರ್ ಮತ್ತಿತರರಿದ್ದರು. 

ವಿಶ್ವದಲ್ಲಿ ಫೆಡರಲ್, ಯೂನಿಟರಿ, ರಿಟರ್ನ್ ಮತ್ತು ಅನ್ ರಿಟರ್ನ್ ಸಂವಿಧಾನಗಳಿವೆ. ನಮ್ಮದು ಲಿಖಿತ ಸಂವಿಧಾನ. ಸಂವಿಧಾನ ಅಂಗೀಕಾರಕ್ಕೆ 285 ಸದಸ್ಯರ ಪೈಕಿ 284 ಮಂದಿ ಸಹಿ ಹಾಕಿದರು. ಓರ್ವ ಮಾತ್ರ ಹಾಕಲಿಲ್ಲ. ಹೀಗಾಗಿ, ಎಲ್ಲರಿಗೂ ಒಪ್ಪಿಗೆವಾಗುವಂಥ  ಸಂವಿಧಾನವನ್ನು ಅಂಬೇಡ್ಕರ್ ರಚಿಸಿದರು. ನಮ್ಮ ದೇಶದಲ್ಲಿರುವಷ್ಟು ಜಾತಿ, ಧರ್ಮ ಬೇರೆ ಯಾವ ದೇಶದಲ್ಲೂ ಇಲ್ಲ. ಹೀಗಾಗಿ, ಈ ನೆಲಕ್ಕೆ ಒಪ್ಪಿಗೆಯಾಗುವ ಸಂವಿಧಾನವನ್ನು ಅಂಬೇಡ್ಕರ್ ಕೊಟ್ಟರು ಎಂದು ಸಿದ್ದರಾಮಯ್ಯ ತಿಳಿಸಿದರು. 

ನಾವೆಲ್ಲರೂ ಇನ್ನಷ್ಟು ಸಂಘಟನಾತ್ಮಕರಾಗಿ ಹೋರಾಟ ನಡೆಸುವ ಮೂಲಕ ಸಂವಿಧಾನವನ್ನು ರಕ್ಷಿಸುವ ಕೆಲಸ ಮಾಡೋಣ.  ಮುಂದಿನ 2 ತಿಂಗಳು ಪ್ರತಿ ಶಾಲಾ ಕಾಲೇಜುಗಳಲ್ಲಿ ಸಂವಿಧಾನ ಕುರಿತು ಜಾಗೃತಿ ಮೂಡಿಸುವ ಕೆಲಸ ಮಾಡಲಾಗುತ್ತಿದೆ. ಸಿದ್ದರಾಮಯ್ಯ ನೇತೃತ್ವದ ರಾಜ್ಯ ಸರ್ಕಾರ, ಸಭೆ, ಸಮಾರಂಭ, ಶಾಲಾ ಮತ್ತು ಕಾಲೇಜುಗಳಲ್ಲಿ ಸಂವಿಧಾನ ಪೀಠಿಕೆ ಓದಲು ಕ್ರಮಕೈಗೊಂಡಿತ್ತು. ಈ ಕುರಿತು ಜಾಗೃತ ಮಂತ್ರ ಕೊಟ್ಟವರು ದಲಿತ ಸಂಘಟನೆಗಳು.

ಸಮಾನತೆ ಹಕ್ಕು ಪ್ರತಿಪಾದಿಸಿ ಎಲ್ಲ ಸಮುದಾಯಗಳ ಸರ್ವತೋಮುಖ ಅಭಿವೃದ್ಧಿಗೆ ಸಿಎಂ ಸಿದ್ದರಾಮಯ್ಯ ಶ್ರಮಿಸುತ್ತಿದ್ದಾರೆ. ಪರಿಶಿಷ್ಟ ಸಮಯದಾಯಗಳ ಬೆಳವಣಿಗೆಗೆ  ಮೀಸಲಿಟ್ಟಿರುವ ಕೋಟ್ಯಂತರ ರೂಪಾಯಿ ಅನುದಾನ ವಿನಿಯಾಗಬೇಕು. ಕಾನೂನು ಹಕ್ಕುಗಳ ಬಗ್ಗೆ ನಾಗರಿಕರು ತಿಳಿದುಕೊಳ್ಳುವ ಅಗತ್ಯವಿದೆ.