ನೀರಿಲ್ಲದೆ ಬರಿದಾಗಿದೆ ಕೆರೆ-ಕಟ್ಟೆ ಒಡಲು

ಮಲೆನಾಡು ಪ್ರದೇಶ ಎಂದು ಕರೆಸಿಕೊಳ್ಳುವ ಬಿಕ್ಕೋಡು ಹೋಬಳಿಯ ಮದಘಟ್ಟ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕೆರೆ-ಕಟ್ಟೆಗಳಲ್ಲಿ ನೀರಿಲ್ಲದ ಪರಿಣಾಮ ದನಕರುಗಳಿಗೆ ಕುಡಿಯಲು ನೀರಿಲ್ಲದಂತಾಗಿದೆ.

ಬೇಲೂರು ತಾಲೂಕಿನಿಲ್ಲಿರುವ ವಾಟೆಹೊಳೆ ಜಲಾಶಯದ ಕೆಳಭಾಗದಲ್ಲಿನ ಗ್ರಾಮಗಳಾದ ಮದಘಟ್ಟ, ಎಡೇಹಳ್ಳಿ, ಕೃಷ್ಣಾಪುರ, ದೊಡ್ಡಿಹಳ್ಳಿ, ಪಡುವಳಲು ಗ್ರಾಮಗಳಿಗೆ ಜಲಾಶಯದ ಎಡಭಾಗದ ಕಾಲುವೆ ಮೂಲಕ ಪ್ರತಿ ವರ್ಷ ನೀರು ಹರಿಸಲಾಗುತ್ತಿತ್ತು. ಆದರೆ, ಈ ಬಾರಿ ಮಳೆ ಕೊರತೆಯಿಂದ ನೀರು ಹರಿಸಿಲ್ಲ. ಸರ್ಕಾರದ ಸೂಚನೆ ಮೇರೆಗೆ ಎಚ್ಚೆತ್ತ ವಾಟೆಹೊಳೆ ಕೆಳಭಾಗದ ರೈತರು ಜಮೀನನ್ನು ಪಾಳು ಬಿಟ್ಟಿದ್ದಾರೆ. ಆದರೆ, ದಿನದಿಂದ ದಿನಕ್ಕೆ ಬಿರು ಬಿಸಿಲು ಹೆಚ್ಚಾಗುತ್ತಿರುವುದರಿಂದ ಕೆರೆಗಳಲ್ಲಿನ ನೀರು ಬತ್ತಿ ಹೋಗುತ್ತಿದ್ದು, ದನಕರು-ಜಾನುವಾರುಗಳಿಗೆ ಕುಡಿಯಲು ನೀರಿಲ್ಲದ ಪರಿಸ್ಥಿತಿ ಬಂದೊದಗಿದೆ.

ಸರ್ಕಾರ ಬರಪೀಡಿತ ತಾಲೂಕುಗಳನ್ನು ಜಿಲ್ಲಾವಾರು ಪ್ರಕಟಿಸಿದೆಯಾದರೂ ಬೇಲೂರು ತಾಲೂಕು ಬರಪೀಡಿತ ಪಟ್ಟಿಯಿಂದ ಹೊರಗುಳಿದಿರುವುದು ರೈತರ ಆಕ್ರೋಶಕ್ಕೆ ಕಾರಣವಾಗಿದೆ. ಕಣ್ಣ ಮುಂದೆ ಕಾಣುವಂತೆ ಅಂಕಿ ಅಂಶಗಳ ಪ್ರಕಾರ ಜಲಾಶಯದಲ್ಲೇ ನೀರಿಲ್ಲ. ಬೆಳೆದ ಬೆಳೆೆ ಒಣಗಿ ಹೋಗಿದ್ದು, ಭತ್ತ ಬೆಳೆಯುವ ರೈತರು ಕೈಚಲ್ಲಿ ತಮ್ಮ ಸಾವಿರಾರು ಎಕರೆ ತರಿ ಜಮೀನನ್ನು ಪಾಳು ಬಿಟ್ಟಿದ್ದಾರೆ. ಹೀಗಿದ್ದರೂ ಸಹ ಬೇಲೂರು ತಾಲೂಕು ಬರ ಪಟ್ಟಿಯಿಂದ ಹೊರಗುಳಿದಿರುವುದು ದುರುದೃಷ್ಟವೇ ಸರಿ. ಇನ್ನಾದರು ಎಚ್ಚೆತ್ತು ಸರ್ಕಾರ ಬೇಲೂರನ್ನು ಬರಪೀಡಿತ ಪಟ್ಟಿಗೆ ಸೇರಿಸಿ ಬರ ಪರಿಹಾರ ಘೂಷಣೆ ಮಾಡಬೇಕೆಂಬುದು ಈ ಭಾಗದ ರೈತರ ಆಗ್ರಹ.