ಹೂಡಿಕೆ ನೆಪದಲ್ಲಿ ಟೆಕ್ಕಿಗೆ ₹5.92 ಕೋಟಿ ವಂಚನೆ

ಬೊಮ್ಮಸಂದ್ರ ನಿವಾಸಿ, ಇಂಜಿನಿಯರ್ ಅಭಿಷೇಕ್ ಕುಮಾರ್ 5.92 ಕೋಟಿ ರೂ. ಕಳೆದುಕೊಂಡವರು. ಇವರ ದೂರಿನ ಮೇರೆಗೆ ಎಚ್‌ಎಸ್‌ಆರ್ ಲೇಔಟ್ ನಿವಾಸಿ ಕೇಶವ್ ಇನಾನಿ, ಮಹೇಂದ್ರ ರಾಥೋಡ್ ಎಂಬಾತರ ವಿರುದ್ಧ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಅಲ್ಪಾವಧಿ ಹೂಡಿಕೆ ಅವಕಾಶಗಳಲ್ಲಿ ಹಣ ತೊಡಗಿಸಿದರೆ ದೊಡ್ಡ ಮಟ್ಟದಲ್ಲಿ ಲಾಭ ನೀಡುವುದಾಗಿ ನಂಬಿಸಿದ್ದರು. ಅವರ ಮಾತಿಗೆ ಮರುಳಾಗಿ ಅಭಿಷೇಕ್ ಹಂತ ಹಂತವಾಗಿ ಒಟ್ಟು 7.20 ಕೋಟಿ ರೂ. ಹೂಡಿಕೆ ಮಾಡಿದ್ದರು.

ಹೂಡಿಕೆ ಮಾಡಿದ ಒಟ್ಟು ಹಣದ ಪೈಕಿ 1.27 ಕೋಟಿ ರೂ.ಗಳನ್ನು ಹಿಂದುರಿಗಿಸಿದ್ದರು. ಇನ್ನು 5.92 ಕೋಟಿ ರೂ.ಗಳನ್ನು ಕೊಡುವುದಾಗಿ ಸಬೂಬು ಹೇಳುತ್ತಾ ವಂಚಿಸಿದ್ದಾರೆ ಎಂದು ದೂರಿನಲ್ಲಿ ಅಭಿಷೇಕ್ ತಿಳಿಸಿದ್ದಾರೆ.

ವಿಶ್ವಾಸ ಗಳಿಸಿದ್ದ ಆರೋಪಿಗಳು: ಆರೋಪಿಗಳಾದ ಕೇಶವ್ ಇನಾನಿ ಹಾಗೂ ಮಹೇಂದ್ರ ರಾಥೋಡ್ ಈ ಹಿಂದೆ ಕಂಪನಿಯೊಂದರಲ್ಲಿ ಚಾರ್ಟೆಡ್ ಅಕೌಂಟೆಂಟ್ ಆಗಿ ಕೆಲಸ ಮಾಡಿಕೊಂಡಿದ್ದರು. ಆಗ ಅಭಿಷೇಕ್ ಅವರ ಆದಾಯ ತೆರಿಗೆ ಸಂಬಂಧಿಸಿದ ಎಲ್ಲ ಕೆಲಸಗಳನ್ನು ಮಾಡಿಕೊಡುತ್ತಿದ್ದರು. ಆ ಕೆಲ ವರ್ಷಗಳಲ್ಲಿ ಅವರೊಂದಿಗೆ ನಡೆದ ವ್ಯವಹಾರ ಆತ್ಮಿಯತೆಗೆ ತಿರುಗಿತ್ತು. ಇದನ್ನೇ ಬಂಡವಾಳ ಮಾಡಿಕೊಂಡ ವಂಚಕರು ಕೋಟ್ಯಂತರ ರೂ. ವಂಚಿಸಿದ್ದಾರೆ.

ಸಿಎ ಕಚೇರಿಯಲ್ಲಿ ಕೆಲಸ ಮಾಡುವುದನ್ನು ನಿಲ್ಲಿಸಿದ ಆರೋಪಿಗಳು, ಸ್ವಂತ ಹೂಡಿಕೆ ಕಂಪನಿ ಆರಂಭಿಸಿದ್ದರು. ಈ ನಡುವೆ ಅಭಿಷೇಕ್ ಅವರ ಸಂಪೂರ್ಣ ಹಣಕಾಸಿನ ವ್ಯವಹಾರ ಅರಿತಿದ್ದ ಇಬ್ಬರೂ ಹೆಚ್ಚಿನ ಲಾಭದ ಆಮೀಷ ಒಡ್ಡಿ ಕೋಟ್ಯಂತರ ರೂ. ಹೂಡಿಕೆ ಮಾಡಿಸಿಕೊಂಡಿದ್ದರು. ಬಳಿಕ ಯಾವುದೇ ಲಾಭ ನೀಡದೇ ಸತಾಯಿಸಿದ್ದರು. ಕೊನೆ ಅಸಲು ಹಣ ಕೊಡುವಂತೆ ಜನವರಿ ತಿಂಗಳಲ್ಲಿ ಪಟ್ಟು ಹಿಡಿದಾಗ ಆರೋಪಿಗಳು ಫೋನ್ ಕರೆಗೆ ಸ್ಪಂದಿಸುವುದನ್ನೇ ನಿಲ್ಲಿಸಿದ್ದರು. ಕಚೇರಿಗೆ ತೆರಳಿ ಹಣ ಕೇಳಿದಾಗ ಆರೋಪಿಗಳು ಸಬೂಬು ಹೇಳುತ್ತಿದ್ದರು ಎಂದು ದೂರಿನಲ್ಲಿ ಉಲ್ಲೇಖವಾಗಿದೆ.