‘ಶಿಶಿರೋತ್ಸವ 2025’: ಶ್ರೀ ಶ್ರೀ ರವಿಶಂಕರ್ ವಿದ್ಯಾಮಂದಿರದಲ್ಲಿ ವಿದ್ಯಾರ್ಥಿಗಳ ‘ಮಿನಿ ಒಲಿಂಪಿಕ್ಸ್’

ಬೆಂಗಳೂರು: ಇಂತಹ ಒಂದು ದೊಡ್ಡ ಪ್ರಮಾಣದಲ್ಲಿ, ವೈವಿಧ್ಯ ಮತ್ತು ಶಿಸ್ತುಪೂರ್ಣ ಸಂಯೋಜನೆಯ ಕ್ರೀಡಾ–ಸಾಂಸ್ಕೃತಿಕ ಉತ್ಸವಕ್ಕೆ ಹೊಸ ಮಾನದಂಡವನ್ನೇ ಸ್ಥಾಪಿಸಿದಂತೆ, ಶ್ರೀ ಶ್ರೀ ರವಿಶಂಕರ್ ವಿದ್ಯಾ ಮಂದಿರ ಟ್ರಸ್ಟ್ ಆಯೋಜಿಸಿದ್ದ ‘ಶಿಶಿರ ಉತ್ಸವ 2025’ ಡಿಸೆಂಬರ್ 20ರಿಂದ 23ರವರೆಗೆ ನಾಲ್ಕು ದಿನಗಳ ಕಾಲ ಭವ್ಯವಾಗಿ ನಡೆಯಿತು.

ದೇಶವ್ಯಾಪಿ ಮಟ್ಟದಲ್ಲಿ ನಡೆದ ಈ ಚಳಿಗಾಲದ ಉತ್ಸವವು ಸ್ಪರ್ಧಾತ್ಮಕ ಉತ್ಕೃಷ್ಟತೆ, ಶಿಸ್ತು ಮತ್ತು ಉತ್ಸವಭಾವವನ್ನು ಸಮಾನವಾಗಿ ಒಗ್ಗೂಡಿಸಿತು. ಚೈತನ್ಯಭರಿತವಾಗಿದ್ದು, ವಿದ್ಯಾರ್ಥಿಗಳು ಇದನ್ನು ‘ಮಿನಿ ಒಲಿಂಪಿಕ್ಸ್’ ಎಂದು ಕರೆದರು. 11 ರಾಜ್ಯಗಳ 28 ನಗರಗಳ 32 ಶಾಲೆಗಳಿಂದ ಆಗಮಿಸಿದ 2000ಕ್ಕೂ ಅಧಿಕ ವಿದ್ಯಾರ್ಥಿಗಳು ಮತ್ತು 260 ಸಿಬ್ಬಂದಿ ಸದಸ್ಯರು ಈ ಮಹೋತ್ಸವದಲ್ಲಿ ಪಾಲ್ಗೊಂಡರು. ಶಾರೀರಿಕ ಉತ್ಕೃಷ್ಟತೆ, ಆಂತರಿಕ ಸಮತೋಲನ ಮತ್ತು ಮಾನವೀಯ ಮೌಲ್ಯಗಳಿಗೆ ಸಮಾನ ಮಹತ್ವ ನೀಡುವ SSRVMನ ಸಮಗ್ರ ಶಿಕ್ಷಣದ ದೃಷ್ಟಿಕೋನವನ್ನು ಈ ಉತ್ಸವವು ಪ್ರತಿಬಿಂಬಿಸಿತು.

ಉತ್ಸವಕ್ಕೆ ಭವ್ಯ ಉದ್ಘಾಟನಾ ಸಮಾರಂಭದ ಮೂಲಕ ಚಾಲನೆ ದೊರಕಿತು. SSRVM ಟ್ರಸ್ಟ್‌ ಅಧ್ಯಕ್ಷರಾದ ಕಮೋಡೋರ್ ಎಚ್.ಜಿ. ಹರ್ಷ ಅವರ ಅಧ್ಯಕ್ಷತೆಯಲ್ಲಿ ನಡೆದ ಈ ಸಮಾರಂಭದಲ್ಲಿ, ಭಾರತೀಯ ಕಬಡ್ಡಿ ತಂಡದ ಎರಡು ಬಾರಿ ವಿಶ್ವಕಪ್ ವಿಜೇತ ನಾಯಕ ಅರುಮುಗಂ ಎಂ.ಎಸ್. ಅವರು ಮುಖ್ಯ ಅತಿಥಿಯಾಗಿ ಭಾಗವಹಿಸಿದರು ಮತ್ತು SSRVMನ ಟ್ರಸ್ಟಿಯಾಗಿರುವ ಶ್ರೀಮತಿ ಜೈನಾ ದೇಸಾಯಿಯವರು ಉಪಸ್ಥಿತರಿದ್ದರು. ರಾಷ್ಟ್ರಮಟ್ಟದ ಕ್ರೀಡಾಪಟುಗಳು ದೀಪವನ್ನು ಹೊತ್ತು ಕ್ರೀಡಾಂಗಣ ಪ್ರವೇಶಿಸಿದ ಕ್ಷಣ ವಿಶೇಷವಾಗಿ ಮನಸೆಳೆಯಿತು.

ದೀಪದ ಜ್ವಾಲೆಗಳು ಕುಂಡದಲ್ಲಿ ಒಂದಾಗುವಾಗ, ಪ್ರತಿಯೊಬ್ಬ ಯುವ ಸ್ಪರ್ಧಾಳುವಿನ ಪಥವನ್ನು ಬೆಳಗಿಸಿದಂತಾಯಿತು. ಇದು ಶಿಶಿರ ಉತ್ಸವದ ಉದ್ದೇಶವನ್ನು, ಸಹನಶೀಲತೆ, ಸಮಗ್ರತೆ, ಟೀಮ್‌ವರ್ಕ್, ಕ್ರೀಡಾ ಮನೋಭಾವ ಮತ್ತು ಕ್ರೀಡೆಯಲ್ಲಿ ಆನಂದ, ಇವೆಲ್ಲವನ್ನು ಸ್ಪಷ್ಟವಾಗಿ ಪ್ರತಿಬಿಂಬಿಸಿತು. ಜಾಗತಿಕ ಮಾನವತಾವಾದಿ ಹಾಗೂ ಆಧ್ಯಾತ್ಮಿಕ ಗುರುಗಳಾಗಿರುವ ಗುರುದೇವ ಶ್ರೀ ಶ್ರೀ ರವಿಶಂಕರ್ ರವರ ದೃಷ್ಟಿಕೋನವು ಈ ಎಲ್ಲ ಮೌಲ್ಯಗಳಿಗೂ ಪ್ರೇರಣೆ. ಈ ನೀತಿಯ ನೆಲೆಯಲ್ಲಿ, ಗುರುದೇವರು, ನಿಜವಾದ ಶಿಕ್ಷಣವು ಬುದ್ಧಿಯನ್ನು ಮಾತ್ರವಲ್ಲ, ಹೃದಯ ಮತ್ತು ಚೇತನವನ್ನೂ ಪೋಷಿಸಬೇಕೆಂದು ಸದಾ ಒತ್ತಿಹೇಳಿದ್ದಾರೆ.

ಆಂತರಿಕ ಶಕ್ತಿ ಜಾಗೃತವಾದಾಗ, ಕಾರ್ಯಕ್ಷೇತ್ರದಲ್ಲಿ ಶ್ರೇಷ್ಠತೆ ಸಹಜವಾಗಿ ವ್ಯಕ್ತವಾಗುತ್ತದೆ. ಈ ತತ್ವವೇ ಮೌನವಾಗಿ ಸಂಪೂರ್ಣ ಉತ್ಸವವನ್ನು ಆಧಾರವಾಗಿ ಹಿಡಿದಿತ್ತು. ಸಮಗ್ರ ಶಿಕ್ಷಣದ ಬಗ್ಗೆ ತಮ್ಮ ದೃಷ್ಟಿಕೋನವನ್ನು ಆನ್‌ಲೈನ್‌ನಲ್ಲಿ ಹಂಚಿಕೊಂಡ ಗುರುದೇವರು, “ಸಂಗೀತ, ಕ್ರೀಡೆ, ನೃತ್ಯ, ಚಿತ್ರಕಲೆ, ತೋಟಗಾರಿಕೆ ಮತ್ತು ಮಕ್ಕಳು ಕಲಿಯಬೇಕಾದ ಹಲವು ವಿಷಯಗಳಲ್ಲಿ ಭಾಗವಹಿಸಿದಾಗ, ಯುವಜನರು ಸರ್ವತೋಮುಖ ಅಭಿವೃದ್ಧಿ ಹೊಂದಿ, ಅವರಲ್ಲಿನ ಪ್ರತಿಭೆ ಅರಳಲು ಪ್ರಾರಂಭಿಸುತ್ತದೆ. ವಿದ್ಯಾರ್ಥಿಗಳಾಗಿ, ಕಲಿಯುವುದು ಮತ್ತು ಈ ರೀತಿಯ ಉತ್ಸವಗಳಲ್ಲಿ ಭಾಗವಹಿಸುವುದು ಮುಖ್ಯ" ಎಂದರು.

"ಸೇವೆಯು ವಿದ್ಯಾರ್ಥಿ ಜೀವನದ ಭಾಗವಾಗಿರಬೇಕು. ಅದು ನಿಮ್ಮನ್ನು ಬಲಿಷ್ಠಗೊಳಿಸುತ್ತದೆ ಮತ್ತು ನಿಮ್ಮ ವ್ಯಕ್ತಿತ್ವವು ಹೊಳೆಯುತ್ತದೆ. ಒಬ್ಬರು ತಮ್ಮ ಮೇಲೆ ಮಾತ್ರ ಗಮನಹರಿಸಿದರೆ, ಆ ಕೊರತೆಯು ಎದ್ದು ಕಾಣುತ್ತದೆ. ಸೇವೆ ಮಾಡುವುದು, ವೈಫಲ್ಯಗಳನ್ನು ಅರಗಿಸುವ ಸಾಮರ್ಥ್ಯ ಮತ್ತು ಇತರರ ಯಶಸ್ಸಿನಲ್ಲಿ ಸಂತೋಷಪಡುವುದು, ಇವೆಲ್ಲ ವ್ಯಕ್ತಿತ್ವವನ್ನು ಹೆಚ್ಚು ಬಲಶಾಲಿಯಾಗಿಯೂ, ಹೆಚ್ಚು ಸುಂದರವಾಗಿಯೂ ಆಗುವಂತೆ ಮಾಡುತ್ತವೆ. ಶಾಲೆಗಳು ಬಹುಮುಖ ಪ್ರತಿಭೆಯ, ಕೌಶಲ್ಯಪೂರ್ಣ ವ್ಯಕ್ತಿತ್ವಗಳನ್ನು ಸೃಷ್ಟಿಸುವ ಉದ್ದೇಶ ಹೊಂದಿರಬೇಕು - ಮತ್ತು ಅದು ಆಗುತ್ತಿದೆ” ಎಂದು ಹೇಳಿದರು.

ಮೊದಲ ದಿನ ಕಬಡ್ಡಿ ಮತ್ತು ಬ್ಯಾಡ್ಮಿಂಟನ್ ಪಂದ್ಯಗಳು ಉತ್ಸಾಹದಿಂದ ನಡೆದರೆ, ಸಂಜೆ 18 ತಂಡಗಳನ್ನು ಒಳಗೊಂಡ ಯೋಗ ಸ್ಪರ್ಧೆ ನಡೆಯಿತು. SSRVM ಘಟ್‌ಶಿಲಾ ತಂಡವನ್ನು, ಅವರ ಭವ್ಯ ಪಥಸಂಚಲನಕ್ಕಾಗಿ ಹರ್ಷರವರು ಶ್ಲಾಘಿಸಿದರು. ಎರಡನೇ ದಿನ ಮನಸ್ಸಿನ ಕಡೆಗೆ ದೃಷ್ಟಿ ತಿರುಗಿತು. ದಿ ಆರ್ಟ್ ಆಫ್ ಲಿವಿಂಗ್ ಅಂತಾರಾಷ್ಟ್ರೀಯ ಕೇಂದ್ರದ ಗುರು ಪಾದುಕಾ ವನಂನಲ್ಲಿ ವಿಶ್ವ ಧ್ಯಾನ ದಿನಾಚರಣೆಯೊಂದಿಗೆ ದಿನದ ಆರಂಭವಾಯಿತು. 2,000ಕ್ಕೂ ಅಧಿಕ ವಿದ್ಯಾರ್ಥಿಗಳು ಒಟ್ಟಾಗಿ ಧ್ಯಾನದಲ್ಲಿ ಭಾಗವಹಿಸಿದಾಗ, ಕೆಲವು ನಿಮಿಷಗಳ ಕಾಲ ಸಂಪೂರ್ಣ ವಾತಾವರಣವೇ ನಿಶ್ಚಲತೆಯಲ್ಲಿ ಲೀನವಾಯಿತು. ಮಧ್ಯಾಹ್ನದಿಂದ, 38 ವೈಯಕ್ತಿಕ ಹಾಗೂ ತಂಡದ ಕ್ರೀಡಾ ಸ್ಪರ್ಧೆಗಳು — ಟ್ರ್ಯಾಕ್ ಸ್ಪರ್ಧೆಗಳು ಮತ್ತು ರಾಷ್ಟ್ರೀಯ ಚಿತ್ರಕಲೆ ಸ್ಪರ್ಧೆಗಳು ಆರಂಭಗೊಂಡವು.

ಮೂರನೇ ಮತ್ತು ನಾಲ್ಕನೇ ದಿನಗಳಲ್ಲೂ, 100 ರಿಂದ 800 ಮೀಟರ್‌ವರೆಗಿನ ಟ್ರ್ಯಾಕ್ ಫೈನಲ್‌ಗಳ ಜೊತೆಗೆ ಫುಟ್‌ಬಾಲ್, ವಾಲಿಬಾಲ್ ಮತ್ತು ಬ್ಯಾಸ್ಕೆಟ್‌ಬಾಲ್ ಪಂದ್ಯಗಳೊಂದಿಗೆ ಉತ್ಸಾಹವು ಮುಂದುವರಿಯಿತು. ಎರಡನೇ ದಿನ, 22 ಶಾಲೆಗಳಿಂದ 203 ತಂಡಗಳು ನೃತ್ಯ ಸ್ಪರ್ಧೆಗಳಲ್ಲಿ ಭಾಗವಹಿಸುವುದರೊಂದಿಗೆ ಮತ್ತು ಮೂರನೇ ದಿನ ನುಕ್ಕಡ್ ನಾಟಕ ನಡೆಸುವುದರೊಂದಿಗೆ ಸಾಂಸ್ಕೃತಿಕ ಅಭಿವ್ಯಕ್ತಿಯು ತನ್ನ ಸ್ಥಾನ ಕಂಡುಕೊಂಡಿತು. ವಿದ್ಯಾರ್ಥಿಗಳನ್ನು ಉದ್ದೇಶಿಸಿ ಮಾತನಾಡಿದ ಕಮೋಡೋರ್ ಎಚ್.ಜಿ. ಹರ್ಷರವರು, ಕ್ರೀಡೆಗಳು ನೀಡುವ ಪಾಠಗಳ ಕುರಿತು ಮಾತನಾಡುತ್ತಾ, "ಕ್ರೀಡಾ ಮೈದಾನದಲ್ಲಿ ನಡತೆಯ ನಿರ್ಮಾಣವಾಗುತ್ತದೆ. ಇಲ್ಲಿ ನೀವು ಟೀಮ್‌ವರ್ಕ್, ಸಹನಶೀಲತೆ ಮತ್ತು ವಿನಮ್ರತೆಯನ್ನು ಕಲಿಯುತ್ತೀರಿ. ವೈಯಕ್ತಿಕ ವೈಭವವು ಕ್ಷಣಿಕವಾಗಿದೆ, ಆದರೆ ಸಾಮೂಹಿಕ ಪ್ರಯತ್ನವು ಶಾಶ್ವತ ಯಶಸ್ಸನ್ನು ನೀಡುತ್ತದೆ. ವಿಜೇತರು ಮತ್ತು ಸೋತವರು ಇಬ್ಬರೂ ಆಚರಣೆಗೆ ಅರ್ಹರು" ಎಂದರು.

ಉತ್ಸವವು ಸಮಾರೋಪ ಸಮಾರಂಭದೊಂದಿಗೆ ಮುಕ್ತಾಯಗೊಂಡಿತು. ಇದರಲ್ಲಿ ಯೋಗ, ನೃತ್ಯ ಮತ್ತು ನುಕ್ಕಡ್ ನಾಟಕದ ವಿಜೇತರ ಮತ್ತು ಭಾಗಿಯಾದವರ ಸಾಧನೆಗಳನ್ನು ಆಚರಿಸಲಾಯಿತು. ನಾಲ್ಕು ದಿನಗಳಲ್ಲಿ ಆಡಲಾದ 187 ಪಂದ್ಯಗಳ ವಿಜೇತರನ್ನು ಸನ್ಮಾನಿಸಲಾಯಿತು. ‘ಶಿಶಿರೋತ್ಸವ 2025’ ಅನ್ನು ಕೇವಲ ಸ್ಪರ್ಧೆಯ ಉತ್ಸವವಾಗಿ ಮಾತ್ರವಲ್ಲದೆ, ನಡತೆ, ಕ್ರೀಡಾ ಮನೋಭಾವ ಮತ್ತು ಕಲಿಕೆಯ ಉತ್ಸವವಾಗಿ ಆಚರಿಸಲಾಯಿತು.