ಮತದಾರರ ಪಟ್ಟಿಯ ವಿಶೇಷ ಪರಿಷ್ಕರಣೆ: 43 ಲಕ್ಷ ಜನರಿಗೆ ಕ್ಯೂಆರ್ ಕೋಡ್ ಇರುವ ನೋಟಿಸ್ ಜಾರಿ!

ಬೆಂಗಳೂರು: ರಾಜ್ಯಾದ್ಯಂತ ಈಗಾಗಲೇ ಮನೆ ಮನೆಗೆ ಭೇಟಿ ನೀಡಿ ಎಸ್​ಐಆರ್​ ಮಾಡುತ್ತಿರುವ ಬಿಎಲ್​ಓಗಳು, ಮತದಾರರ ಪಟ್ಟಿಯ ವಿಶೇಷ ಪರಿಷ್ಕರಣೆ ಮತ್ತು ದಾಖಲೆಗಳ ಪರಿಶೀಲನಾ ಪ್ರಕ್ರಿಯೆಯನ್ನು ತೀವ್ರಗೊಳಿಸಿದ್ದಾರೆ. 

ಮತದಾರರ ಪಟ್ಟಿಯಲ್ಲಿರುವ ದೋಷಗಳನ್ನು ಸರಿಪಡಿಸಲು ಮತ್ತು ಪಾರದರ್ಶಕತೆಯನ್ನು ಕಾಯ್ದುಕೊಳ್ಳಲು ಒಟ್ಟು 43 ಲಕ್ಷ ಜನರಿಗೆ ಕ್ಯೂಆರ್ ಕೋಡ್ (QR Code) ಇರುವ ನೋಟಿಸ್ ಅನ್ನು ನೇರವಾಗಿ ಮನೆಗೆ ತಲುಪಿಸಲಾಗುತ್ತದೆ. ಈ ನೋಟಿಸ್ ಪಡೆದವರು ತಮ್ಮ ಸೂಕ್ತ ದಾಖಲೆಗಳನ್ನು ಆನ್‌ಲೈನ್‌ನಲ್ಲಿ ಅಪ್ಲೋಡ್ ಮಾಡುವುದು ಅನಿವಾರ್ಯ ಎನ್ನಲಾಗಿದೆ.

ನೋಟಿಸ್‌ನಲ್ಲಿ ವಿಚಾರಣೆಯ ದಿನಾಂಕ, ಸಮಯ ಹಾಗೂ ಸ್ಥಳದ ಮಾಹಿತಿ ತುಂಬಲು ಅವಕಾಶ ನೀಡಲಾಗಿದೆ. ನಿರ್ದಿಷ್ಟ ಆಕ್ಷೇಪಣಾ ಅವಧಿಯಲ್ಲಿ ಮತದಾರರು ನಿಗದಿತ ಬೂತ್‌ಗೆ ತೆರಳಿ ಇಆರ್‌ಒ (ERO) ಮುಂದೆ ಖುದ್ದಾಗಿ ಹಾಜರಾಗುವುದು ಕಡ್ಡಾಯವಾಗಿದ್ದು, ತಪ್ಪಿದಲ್ಲಿ ಮತದ ಹಕ್ಕನ್ನು ಕಳೆದುಕೊಳ್ಳಲಿದ್ದಾರೆ. ಹಾಜರಾದ ಸಂದರ್ಭದಲ್ಲಿ ಆಧಾರ್ ಜತೆಗೆ ಕೇವಲ ಒಂದು ದಾಖಲೆಯನ್ನು ಮಾತ್ರ ಕೇಳಲು ಇಆರ್‌ಒಗೆ ಅವಕಾಶವಿದೆ. 

ಬಿಎಲ್‌ಒಗಳು‌ ನೋಟಿಸ್ ನೀಡುವುದು ಜಿಯೋ ಫೆನ್ಸ್ ಫೋಟೋ ತೆಗೆದು ಅಪ್ಲೋಡ್ ಮಾಡಲಿದ್ದಾರೆ. ಇಆರ್​ಒ ಮುಂದೆ ಹಾಜರಾಗಿ ರಿಜಿಸ್ಟರ್‌ಗೆ ಸಹಿ‌ ಮಾಡುವುದು, ಕೇಂದ್ರಕ್ಕೆ ಬಂದ ಫೋಟೋ ಸಹ ಆಯೋಗಕ್ಕೆ ಇಆರ್‌ಒ ಅಪ್ಲೋಡ್ ಮಾಡಲಿದ್ದಾರೆ. ಒಟ್ಟಾರೆ ಪ್ರತಿ ಹಂತದಲ್ಲಿ 43 ಲಕ್ಷ ಮತದಾರರ ದಾಖಲೀಕರಣ ನಡೆಯಲಿದೆ. ನೋಟಿಸ್ ಕೊಡುವ ಮಾಹಿತಿ ಪ್ರತಿ ಪೊಲಿಂಗ್ ಸ್ಟೇಷನ್‌ನಲ್ಲಿ ಪ್ರಕಟಿಸಲಾಗುವುದು.

ಇವರೆಲ್ಲರಿಗೂ ನೋಟಿಸ್ ಜಾರಿ ಮಾಡಲಾಗುತ್ತದೆ. ಒಂಬತ್ತು ರೀತಿ ಅನಾಮಲಿ ಗುರುತಿಸಲಾಗುತ್ತದೆ. ಮತದಾರರ ದತ್ತಾಂಶವನ್ನು ಸಾಫ್ಟ್ ವೇರ್ ಗುರುತು‌ ಮಾಡಿದೆ. ವೋಟರ್​​ಗಳ ಒಪ್ಪಿಗೆ ಇಲ್ಲದೇ ದತ್ತಾಂಶ/ಮಾಹಿತಿ ಪರಿಷ್ಕರಣೆ ಮಾಡಲು ಸಾಧ್ಯವಿಲ್ಲ. ಈ ಕಾರಣಕ್ಕೆ ನೋಟಿಸ್ ನೀಡಲಾಗುತ್ತದೆ ಎಂದು ತಿಳಿಸಲಾಗಿದೆ. 

ಕರಡು ಮತದಾರರ ಪಟ್ಟಿ ಕನ್ನಡ ಅಥವಾ ಇಂಗ್ಲಿಷ್ ಜತೆ ಪ್ರದೇಶವಾರು ಭಾಷೆ ಬಳಕೆ ಮಾಡಲಾಗುತ್ತದೆ. ಮರಾಠಿ, ತಮಿಳು, ತೆಲುಗು, ಹಿಂದಿಯೂ ಬಳಕೆಯಲ್ಲಿದೆ. ಆಗಸ್ಟ್ 24ರಂದು ಕರಡು ಮತದಾರರ ಪಟ್ಟಿಯನ್ನು ಪ್ರಕಟಿಸಲಿದ್ದು, 24ರಿಂದ ನೋಟಿಸ್ ವಿತರಣೆ ಆರಂಭವಾಗಲಿದೆ. ದಾಖಲೆ ಸಲ್ಲಿಕೆ ಆಕ್ಷೇಪಣೆ ಸಲ್ಲಿಸಲು ಅಕ್ಟೋಬರ್ 22ರ ವರೆಗೆ ಅವಕಾಶವಿದೆ. ಫಾರಂ 6 ಸಲ್ಲಿಸಿರುವವರ ದಾಖಲೆ ಪರಿಶೀಲನೆ ಕೂಡ ಆ.24ರಿಂದ ಆರಂಭವಾಗಲಿದೆ. ಅವರ ಹೆಸರು ಅಂತಿಮ ಮತದಾರರ ಪಟ್ಟಿಯಲ್ಲಿ ಪ್ರಕಟಿಸಲಾಗುತ್ತದೆ ಎಂದು ವಿವರಿಒಸಲಾಗಿದೆ.