ಮಳೆಗಾಗಿ ಗ್ರಾಮಸ್ಥರಿಂದ ವಿಶೇಷ ಪ್ರಾರ್ಥನೆ

ಗ್ರಾಮದ ಕೃಷಿಕರು, ಮಹಿಳೆಯರು ಹಾಗೂ ಯುವಕರು ವಾದ್ಯ ವೃಂದದೊಂದಿಗೆ ಕಾಲ್ನಡಿಗೆಯಲ್ಲಿ ಬೆಟ್ಟ ಹತ್ತಿ, ಮಳೆ ಕರೆಯುವ ಸಂಪ್ರದಾಯವನ್ನು ಆಚರಿಸಿದರು. ಬೆಟ್ಟದ ತುದಿಯಲ್ಲಿರುವ ಮಳೆಮಲ್ಲೇಶ್ವರ ಹಾಗೂ ಗಣಪತಿ ದೇವರಿಗೆ ವಿಶೇಷ ಪೂಜೆ ಸಲ್ಲಿಸಿ, ಸಮೃದ್ಧ ಮಳೆಯಿಗಾಗಿ ಸಾಮೂಹಿಕ ಪ್ರಾರ್ಥನೆ ನಡೆಸಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಗೌಡಳ್ಳಿ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘದ ಅಧ್ಯಕ್ಷ ಎಸ್.ಬಿ. ಭರತ್ ಕುಮಾರ್, ಮುಂಗಾರು ಮತ್ತು ಹಿಂಗಾರು ಮಳೆಯನ್ನೇ ಅವಲಂಬಿಸಿಕೊಂಡು ಬಹುತೇಕ ರೈತರು ಕೃಷಿ ನಡೆಸುತ್ತಿದ್ದಾರೆ. ಪ್ರತಿವರ್ಷವೂ ದೇವರ ಕೃಪೆಯಿಂದ ಸಕಾಲದಲ್ಲಿ ಮಳೆ ಬರುತ್ತಿದ್ದು, ಉತ್ತಮ ಬೆಳೆ ಸಿಗುತ್ತಿದೆ. ಇದೇ ವಿಶ್ವಾಸದಿಂದ ಈ ವರ್ಷವೂ ಮಳೆಮಲ್ಲೇಶ್ವರ ದೇವರಿಗೆ ಪೂಜೆ ಸಲ್ಲಿಸಿದ್ದೇವೆ. ಗ್ರಾಮಗಳ ದೇವಾಲಯಗಳಲ್ಲಿ ಪೂಜೆ ನೆರವೇರಿಸಿ, ಬೆಟ್ಟ ಹತ್ತಿ ಸಮೂಹವಾಗಿ ಮಳೆಯಿಗಾಗಿ ಪ್ರಾರ್ಥನೆ ಮಾಡಿದ್ದೇವೆ ಎಂದು ಹೇಳಿದರು.

ಬೆಟ್ಟದಿಂದ ಇಳಿದ ಭಕ್ತರಿಗೆ ನಂದಿಗುಂದ ಗ್ರಾಮದ ಶ್ರೀ ನಂಜುಂಡೇಶ್ವರ ದೇವಾಲಯದಲ್ಲಿ ಅನ್ನದಾನ ವ್ಯವಸ್ಥೆ ಮಾಡಲಾಗಿತ್ತು. ಕಾರ್ಯಕ್ರಮದಲ್ಲಿ ಸಹಕಾರ ಸಂಘದ ನಿರ್ದೇಶಕರಾದ ರೇಖಾ, ಬಿ.ಪಿ. ಮೊಗಪ್ಪ, ಜಿ.ಎಂ. ಹೂವಯ್ಯ, ದಿನೇಶ್ ಸೇರಿದಂತೆ ಅನೇಕರು ಭಾಗವಹಿಸಿದ್ದರು.