ನಾಲ್ಕು ಕಾರ್ಖಾನೆಗಳಿಗೆ ಸೀಲ್​

ಹುಮನಾಬಾದ್​: ಪಟ್ಟಣ ಹೊರವಲಯದ ಕೈಗಾರಿಕಾ ಪ್ರದೇಶದ ನಾಲ್ಕು ಕಾರ್ಖಾನೆಗಳ ವಿದ್ಯುತ್​ ಸಂಪರ್ಕ ಕಡಿತಗೊಳಿಸಿದ ಅಧಿಕಾರಿಗಳ ತಂಡ ಗುರುವಾರ ಸಂಜೆ ಸೀಲ್​ನೊಂದಿಗೆ ಬೀಗ ಹಾಕಿತು.

ರಾಸಾಯನಿಕ ತ್ಯಾಜ್ಯವನ್ನು ನದಿ ಮತ್ತು ಹಳ್ಳಕ್ಕೆ ಹರಿಸುತ್ತಿರುವ ಆರೋಪದ ಹಿನ್ನೆಲೆಯಲ್ಲಿ ನಾಲ್ಕು ಕಾರ್ಖಾನೆಗಳ ಕಾರ್ಯನಿರ್ವಹಣೆ ಸ್ಥಗಿತಗೊಳಿಸುವಂತೆ ಜಿಲ್ಲಾಧಿಕಾರಿ ಶಿಲ್ಪಾ ಶಮಾರ್ ಸೋಮವಾರ ಆದೇಶಿಸಿದ ಹಿನ್ನೆಲೆಯಲ್ಲಿ ತಂಡ ಕಾರ್ಯಾಚರಣೆ ನಡೆಸಿತು.

ಸಹಾಯಕ ಆಯುಕ್ತ ಪ್ರಕಾಶ ಕುದರೆ, ತಹಸೀಲ್ದಾರ್​ ಜಗದೀಶ್​ ಚೌರ, ಡಿವೈಎಸ್ಪಿ ಮಡೋಳಪ್ಪ ಪಿ.ಎಸ್​., ತಾಲೂಕು ಪಂಚಾಯಿತಿ ಕಾರ್ಯನಿರ್ವಹಣಾಧಿಕಾರಿ ದೀಪಿಕಾ ನಾಯ್ಕರ್​, ಪರಿಸರ ಮಾಲಿನ್ಯ ನಿಯಂತ್ರಣ ಅಧಿಕಾರಿ ಸಂತೋಷ, ಪಿಡಿಒ ಜಗದೇವಿ ಗೋರ್ಟೆ, ಪಿಎಸ್​ಐ ಸುರೇಶ ಚವ್ಹಾಣ್​ ನೇತೃತ್ವದ ತಂಡ 6ಎಚ್​ ಇಂಡಸ್ಟ್ರೀಸ್​, ಸತ್ಯದಿಪ್ತ ಫಾಮಾರ್ಸುಟಿಕಲ್ಸ್​, ಕೆಜಿಎನ್​ ಇಂಡಸ್ಟ್ರೀಸ್​ ಹಾಗೂ ಹಿಮಾಲಯ ಸ್ಟೀಲ್​ ಇಂಡಸ್ಟ್ರೀಗಳಿಗೆ ಭೇಟಿ ನೀಡಿ ವಿದ್ಯುತ್​ ಸಂಪರ್ಕ ಕಡಿತಗೊಳಿಸಿ ಬೀಗ ಹಾಕಿತು.

-----ವಾಗ್ವಾದ: ಸತ್ಯದಿಪ್ತ ಫಾಮಾರ್ಸುಟಿಕಲ್ಸ್​ಗೆ ತೆರಳಿದ ತಂಡದೊಂದಿಗೆ ಕಂಪನಿ ಅಧಿಕಾರಿಗಳು ಕೆಲಕಾಲ ವಾಗ್ವಾದ ನಡೆಸಿದರು. ಕಾರ್ಖಾನೆಯನ್ನು ಏಕಾಏಕಿ ಬಂದ್​ ಮಾಡಿದರೆ ಯಂತ್ರೋಪಕರಣಗಳಲ್ಲಿ ತಾಂತ್ರಿಕ ಸಮಸ್ಯೆ ಉಂಟಾಗಿ ಸ್ಫೋಟ ಸಂಭವಿಸುವ ಸಾಧ್ಯತೆ ಇರುತ್ತದೆ. ಹೀಗಾಗಿ ಇನ್ನೂ ಎರಡ್ಮೂರು ದಿನ ಅವಕಾಶ ನೀಡಬೇಕು ಎಂದು ಕಂಪನಿಯರು ಮನವಿ ಮಾಡಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಸಹಾಯಕ ಆಯುಕ್ತ ಪ್ರಕಾಶ ಕುದರೆ, ಜಿಲ್ಲಾಧಿಕಾರಿ ಆದೇಶದಂತೆ 24 ಗಂಟೆಯೊಳಗೆ ಕಾರ್ಖಾನೆಗಳ ಕಾರ್ಯಾಚರಣೆ ಸ್ಥಗಿತಗೊಳಿಸಬೇಕಿದೆ. ಈಗಾಗಲೇ ನೋಟಿಸ್​ ನೀಡಿದ್ದು, ಯಾವುದೇ ಕಾರಣ ಹೇಳದೆ ತಕ್ಷಣ ಸಿಬ್ಬಂದಿಯನ್ನು ಹೊರಗೆ ಕಳುಹಿಸುವಂತೆ ಸೂಚಿಸಿದರು. ಆದರೂ ಕೆಲಕಾಲ ಹೊರಬರದ ಹಿನ್ನೆಲೆಯಲ್ಲಿ ಡಿವೈಎಸ್ಪಿ ಮಡೋಳಪ್ಪ ಪಿ.ಎಸ್​. ಕಾರ್ಖಾನೆ ಒಳಗೆ ತೆರಳಿ ಸಿಬ್ಬಂದಿಯನ್ನು ಹೊರಗಡೆ ಕಳಿಸಿದರು. ಬಳಿಕ ಕಾರ್ಖಾನೆಗೆ ಬೀಗ ಹಾಕಲಾಯಿತು.

ಬಾಕ್ಸ್​

ಫಲ ನೀಡಿದ ಗುರುಗಂಗಾ ಉಳಿಸಿ ಹೋರಾಟ

ಕೈಗಾರಿಕೆ ಪ್ರದೇಶದ ಕೆಲ ಕಾರ್ಖಾನೆಗಳಿಂದ ಹಳ್ಳಕ್ಕೆ ವಿಷಯುಕ್ತ ತ್ಯಾಜ್ಯ ಹರಿಬಿಟ್ಟಿದ್ದರಿಂದ ಜನತೆ ಹಾಗೂ ಜಲಚರ, ಜಾನುವಾರುಗಳ ಜೀವಕ್ಕೆ ಕುತ್ತಾಗಿ ಪರಿಣಮಿಸಿದೆ. ಹೀಗಾಗಿ ಮಾಣಿಕನಗರದ ಮಾಣಿಕಪ್ರಭು ಸಂಸ್ಥಾನದ ಶ್ರೀ ಆನಂದರಾಜ ಪ್ರಭು ನೇತೃತ್ವದಲ್ಲಿ ಗುರುಗಂಗಾ ಉಳಿಸಿ ಅಭಿಯಾನದಡಿ ಪಟ್ಟಣ ಸೇರಿ ಮಾಣಿಕನಗರ, ಗಡವಂತಿ, ಮೊಳಕೇರಾ, ಬಸಂತಪುರ, ಧುಮ್ಮನಸೂರ, ಹುಡಗಿ ಇತರ ಹಳ್ಳಿ ಜನ, ಯುವಕರು, ಮಹಿಳೆಯರು, ಜನಪ್ರತಿನಿಧಿಗಳು ಹಾಗೂ ಸಂಘ&-ಸಂಸ್ಥೆಗಳ ಪ್ರಮುಖರು ಪಕ್ಷಭೇದ ಮರೆತು ಹೋರಾಟ ನಡೆಸಿದ್ದರು. ಮಂಗಳವಾರ ಬೀದರ್​&-ಕಲಬುರಗಿ ಹೆದ್ದಾರಿ ಸಂಚಾರ ಸುಮಾರು ಐದು ತಾಸು ತಡೆದು ಆಕ್ರೋಶ ವ್ಯಕ್ತಪಡಿಸಿದ್ದ ಹೋರಾಟಗಾರರು, ಕೆಮಿಕಲ್​ ಕಾರ್ಖಾನೆಗಳನ್ನು ಶಾಶ್ವತವಾಗಿ ಬಂದ್​ ಮಾಡಬೇಕು ಎಂದು ಒತ್ತಡ ಹೇರಿದ್ದರ ಫಲವಾಗಿ ನಾಲ್ಕು ಕಾರ್ಖಾನೆಗಳಿಗೆ ಬೀಗ ಜಡಿಯಲಾಗಿದೆ.