ಸಂಪಾಕೀಯ: ಆರ್ಥಿಕ ವೈರುಧ್ಯಕ್ಕೆ ಸಾಕ್ಷಿ

ಬಿಪಿಎಲ್​ ಕಾರ್ಡ್​ಗಳು ವಾರ್ಷಿಕ 1.2 ಲಕ್ಷ ರೂ.ಗಿಂತ ಕಡಿಮೆ ಆದಾಯವಿರುವ ಕುಟುಂಬಗಳಿಗೆ ಮೀಸಲಾಗಿವೆ. ಆದರೆ ರಾಜ್ಯದಲ್ಲಿ 4.44 ಕೋಟಿ ಜನರನ್ನು ಆದ್ಯತಾ ಕುಟುಂಬಗಳಡಿ ವರ್ಗೀಕರಿಸಲಾಗಿದೆ. ಅವರಲ್ಲಿ ಅನೇಕರು ಅನರ್ಹರು. ಇವರಲ್ಲಿ ಆದಾಯ ತೆರಿಗೆ ಪಾವತಿದಾರರು, ಕಂಪನಿಗಳ ನಿರ್ದೇಶಕರು, 25 ಲಕ್ಷ ರೂ.ಗಿಂತ ಹೆಚ್ಚಿನ ಜಿಎಸ್​ಟಿ ವಹಿವಾಟು ನಡೆಸುವವರು, ಇತರ ರಾಜ್ಯಗಳಲ್ಲಿ ಪಡಿತರ ಚೀಟಿ ಹೊಂದಿರುವವರು ಇದ್ದಾರೆ. ಸುಮಾರು 7.76 ಲಕ್ಷ ಅನುಮಾನಾಸ್ಪದ ಫಲಾನುಭವಿಗಳನ್ನು ಕೇಂದ್ರ ಸರ್ಕಾರ ಈಗಾಗಲೇ ಗುರುತಿಸಿದೆ. ಇದರಿಂದ ನೇರವಾಗಿ ಬಡವರ ಮೇಲೆ ಪರಿಣಾಮವಾಗುತ್ತದೆ. ಅವರಿಗಾಗಿ ರೂಪಿಸಿರುವ ಯೋಜನೆಗಳ ಪ್ರಯೋಜನವನ್ನು ಶ್ರೀಮಂತರು ಕಸಿದುಕೊಂಡಾಗ, ಆರ್ಥಿಕ ದುರ್ಬಲರಿಗೆ ಅವು ಸಿಗದಂತಾಗುತ್ತದೆ. ರಿಯಾಯಿತಿ ದರದಲ್ಲಿ ಆಹಾರಧಾನ್ಯಗಳನ್ನು ಅನರ್ಹರು ಪಡೆದರೆ, ಅಪೌಷ್ಟಿಕತೆಯಿಂದ ಬಳಲುತ್ತಿರುವ ಕುಟುಂಬಗಳಿಗೆ ಅನ್ಯಾಯ ಮಾಡಿದಂತೆ. ಗೃಹಲಕ್ಷ್ಮೀ ಅನ್ನಭಾಗ್ಯ ಮುಂತಾದ ಯೋಜನೆಗಳಿಗಾಗಿ ವಾರ್ಷಿಕ ಸಾವಿರಾರು ಕೋಟಿ ರೂ. ವೆಚ್ಚ ಮಾಡುತ್ತಿರುವ ರಾಜ್ಯದ ಬೊಕ್ಕಸಕ್ಕೂ ಇದು ಹೊರೆಯಾಗಿ ಪರಿಣಮಿಸುತ್ತದೆ.

ಈಗಾಗಲೇ ಸರ್ಕಾರವು ಸುಮಾರು 4.9 ಲಕ್ಷ ಕಾರ್ಡ್​ಗಳನ್ನು ರದ್ದುಗೊಳಿಸಿದೆ ಅಥವಾ ವರ್ಗಾಯಿಸಿದೆ. ಉಳಿದ ಕಾರ್ಡ್​ಗಳ ವಿಷಯದಲ್ಲೂ ತಂತ್ರಜ್ಞಾನ ಆಧಾರಿತ ಮರುಪರಿಶೀಲನೆಗೆ ಸರ್ಕಾರ ಮುಂದಾಗಬೇಕು. ಕರ್ನಾಟಕದಂತಹ ಸಮೃದ್ಧ ರಾಜ್ಯ ಬಿಪಿಎಲ್​ ಕಾರ್ಡ್​ಗಳ ಸುಳ್ಳು ಮಾಹಿತಿ ಹೊಂದಿರಬಾರದು. ಇಷ್ಟೊಂದು ಢಾಳಾಗಿ ಗೋಚರಿಸುವ ಆರ್ಥಿಕ ವೈರುಧ್ಯವನ್ನು ಮುಂದುವರಿಸಿಕೊಂಡು ಹೋದರೆ ಅದು ರಾಷ್ಟ್ರ ಮಟ್ಟದಲ್ಲಿ ಹಾಸ್ಯಾಸ್ಪದ ವಿಷಯವಾಗಿ ಪರಿಣಮಿಸಬಹುದು ಎಂಬುದನ್ನು ಅಧಿಕಾರಸ್ಥರು ಮತ್ತು ಅಧಿಕಾರಿಗಳು ಗಮನಿಸಬೇಕು. ಪ್ರತಿಯೊಂದು ನಕಲಿ ಕಾರ್ಡ್​ ಕೂಡ ಸಾರ್ವಜನಿಕ ಹಣದ ಪೋಲು. ನಿಜವಾದ ಅಗತ್ಯವಿರುವವರ ಪಾಲನ್ನೂ ಇದು ಕಸಿಯುತ್ತದೆ. ಈ ವಿಷಯದಲ್ಲಿ ಯಾರೂ ರಾಜಕೀಯ ಮಾಡಬಾರದು. ಇದೇ ವೇಳೆ, ಯಾವುದೇ ಕಾರಣಕ್ಕೂ ಅರ್ಹರಿಗೆ ಅನ್ಯಾಯವಾಗದಂತೆ ಎಚ್ಚರ ವಹಿಸಬೇಕು. ಅನರ್ಹರ ಕಾರ್ಡ್​ಗಳನ್ನು ರದ್ದುಪಡಿಸುವ ಧಾವಂತದಲ್ಲಿ ನಿಜವಾದ ಬಡವರಿಗೆ ತೊಂದರೆ ಆಗಬಾರದು.