ಸೇವೆ ದುಬಾರಿ : ದೇವಾಲಯ ಸಮೀಪದಲ್ಲಿದ್ದ ಹೊನ್ನ ಹುತ್ತದ ಮಂಟಪದ ಬಳಿ ನೀಲಗಾರರ ಧೀಕ್ಷೆ ಸೇವೆ ನೆರವೇರಿತು. ಮಠದ ಕಡೆಯಿಂದ ಧೀಕ್ಷೆ ಪಡೆಯಲು 610 ರೂ. ಶುಲ್ಕ ನಿಗದಿಪಡಿಸಲಾಗಿತ್ತು. ನೀಲಗಾರರ ಧಾರ್ಮಿಕ ವಿಧಿ-ವಿಧಾನದಲ್ಲಿ ಧೀಕ್ಷೆ ನೀಡಿದ ದೇವರು ಗುಡ್ಡರಿಗೆ 501 ರೂ. ಭಕ್ತರು ನೀಡಬೇಕಿತ್ತು. ದೀಕ್ಷೆ ಪಡೆದವರಿಗೆ ಜೋಳಿಗೆ, ಬೆತ್ತ, ಮಣಿ ನೀಡಲಾಗುತ್ತಿತ್ತು. ದೇವಾಲಯ ಆವರಣದಲ್ಲಿ ಕಜ್ಜಾಯ, ಕಲ್ಲುಸಕ್ಕರೆ, ತೀರ್ಥದ ಬಾಟಲಿ, ಕಪ್ಪು-ದೂಳ್ತಕ್ಕೆ 120 ರೂ. ನಿಗದಿಪಡಿಸಿ ಮಾರಾಟ ಮಾಡಲಾಗುತ್ತಿತ್ತು. ಮುಡಿಗೆ 70.ರೂ ನಿಗದಿ ಪಡಿಸಲಾಗಿತ್ತು. ಮುಡಿಯ ಬಳಿಕ ಭಕ್ತರಿಂದ ಮುಡಿ ಮಾಡಿದವರು 50.ರೂ ಪಡೆಯುತ್ತಿದ್ದರು. 1 ಬಕೆಟ್ ಸ್ನಾನದ ಬಿಸಿ ನೀರಿಗಾಗಿ 30 ರೂ. ಟೆಂಡರ್ದಾರರು ನಿಗದಿಗೊಳಿಸಿದ್ದರು. ಮಠದ ವತಿಯಿಂದ ಸ್ನಾನದ ಮನೆಗಳು, ಶೌಚಗೃಹ ವ್ಯವಸ್ಥೆ ಮಾಡಲಾಗಿತ್ತು, ಭಕ್ತರ ಸಂಖ್ಯೆಯೂ ಹೆಚ್ಚಿದ್ದರಿಂದ ಭಕ್ತರು ಸಮೀಪಿದಲ್ಲಿದ್ದ ಚೆಕ್ಡ್ಯಾಮ್, ತೊಂಬೆಗಳಲ್ಲಿ ಸ್ನಾನ ಮಾಡಬೇಕಾಯಿತು.
7ರಂದು ಪಂಕ್ತಿ ಸೇವೆ: ಐದು ದಿನಗಳ ಜಾತ್ರೆಯಲ್ಲಿ ಮೊದಲ ದಿನವಾದ ಚಂದ್ರ ಮಂಡಲದಲ್ಲಿ ಲಕ್ಷಕ್ಕೂ ಅಧಿಕ ಭಕ್ತರು ಜಾತ್ರೆ ಮಾಳದಲ್ಲಿ ನೆರೆದಿದ್ದರು. 2ನೇ ದಿನ ಹುಲಿವಾಹನ ಉತ್ಸವ (ದೊಡ್ಡವರ ಸೇವೆ), ಮೂರನೇ ದಿನ ರುದ್ರಾಕ್ಷಿ ಮಂಟಪೋತ್ಸವ (ಮುಡಿಸೇವೆ) ನಡೆದಿದೆ. ಇನ್ನು 4ನೇ ದಿನವಾದ ಪಂಕ್ತಿ ಸೇವೆ ಇರುವುದರಿಂದ ಅಪಾರ ಸಂಖ್ಯೆಯಲ್ಲಿ ಭಕ್ತರು ನಿರೀಕ್ಷೆ ಇದೆ.
ಚಿಕ್ಕಲ್ಲೂರು ಜಾತ್ರೆಯಲ್ಲಿ ಪ್ರಾಣಿ ಬಲಿ ನಿಷೇಧ ಕಾಯ್ದೆ ಜಾರಿಯಲ್ಲಿದ್ದು, ಹೈಕೋರ್ಟ್ ಆದೇಶದಂತೆ ಜಿಲ್ಲಾಡಳಿತ ಪ್ರಾಣಿ ಬಲಿಯಾಗದಂತೆ ಕಟ್ಟುನಿಟ್ಟಿನ ಸಕಲ ವ್ಯವಸ್ಥೆ ಮಾಡಿಕೊಂಡಿದೆ. ಜಾತ್ರೆ ಆರಂಭದ ದಿನದಿಂದಲೇ ಶ್ರೀ ಕ್ಷೇತ್ರ ಹೊರ ವ್ಯಾಪ್ತಿಯಲ್ಲಿ 4 ಚೆಕ್ ಪೋಸ್ಟ್ ನಿರ್ಮಿಸಲಾಗಿದೆ. ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಮುತ್ತುರಾಜ್ ಮಾರ್ಗದರ್ಶನದಲ್ಲಿ 600 ಪೊಲೀಸ್ ಅಧಿಕಾರಿ ಮತ್ತು ಸಿಬ್ಬಂದಿ , 2 ಕೆಎಸ್ಆರ್ಪಿ ತುಕಡಿ, 5 ಪೊಲೀಸ್ ಡಿಆರ್ ವಾಹನ , 200 ಗೃಹ ರಕ್ಷಕದಳ ಸಿಬ್ಬಂದಿ ನಿಯೋಜನೆ ಮಾಡಲಾಗಿದೆ.
ಮಠದಲ್ಲಿ ಭಕ್ತರಿಗೆ ದಾಸೋಹ: ಭಕ್ತರಿಗೆ ಹಳೇ ಮಠದಲ್ಲಿ 5 ದಿನಗಳ ಜಾತ್ರೆಯಲ್ಲಿ ಬೆಳಗ್ಗೆ, ಮಧ್ಯಾಹ್ನ ಮತ್ತು ರಾತ್ರಿ ದಾಸೋಹ ವ್ಯವಸ್ಥೆ ಮಾಡಲಾಗಿದೆ. ಪೂಜಾ ಕಾರ್ಯಗಳನ್ನು ಪೂರ್ಣ ಗೊಳಿಸಿದ ಬಳಿಕ ಭಕ್ತರು ಪ್ರಸಾದ ಸೇವೆನೆ ಮಾಡುತ್ತಿದ್ದಾರೆ.
ಬಿಡಾರದಲ್ಲಿ ತಂಗಿರುವ ಜನರು: ಶ್ರೀ ಮಂಟೇಸ್ವಾಮಿ ಒಕ್ಕಲಿನ ಭಕ್ತರು ರಾಜ್ಯದ ನಾನಾ ಕಡೆಗಳಲ್ಲಿ ಇದ್ದಾರೆ. ಐದು ದಿನದ ಜಾತ್ರೆಗೆ ಚಾಮರಾಜನಗರ, ಮೈಸೂರು, ಮಂಡ್ಯ, ರಾಮನಗರ, ಬೆಂಗಳೂರು, ಚನ್ನಪಟ್ಟಣ, ಹಾಸನ, ಚಿಕ್ಕಮಂಗಳೂರು, ಗುಲ್ಬರ್ಗ, ಯಾದಗಿರಿ, ಕೊಡೆಕಲ್ಲು ಇನ್ನಿತರ ಕಡೆಗಳಿಂದ ಆಗಮಿಸಿದ್ದು ದೇವಾಲಯ ಸುತ್ತಮುತ್ತಲು ಇರುವ ಬಿಡಾರಗಳಲ್ಲಿ ಟೆಂಟ್ ನಿರ್ಮಿಸಿ ಅಲ್ಲೇ ಉಳಿದುಕೊಂಡು ಸ್ವಾಮಿಗೆ ಪೂಜಾ ಕೈಂಕರ್ಯ ನೆರವೇರಿಸುತ್ತಿದ್ದಾರೆ.
