ರಾಜ್ಯ

ಮುದಗಲ್ ಮೊಹರಂಗೆ ಭಕ್ತರ ದಂಡು

ಮೊಹರಂ ಹಬ್ಬದ ಅಂಗವಾಗಿ ಮುದಗಲ್‌ನ ಹುಸೇನಿ ಆಲಂ ದರ್ಗಾಕ್ಕೆ ಹರಿದುಬಂದ ಭಕ್ತಸಾಗರ.
ಮೊಹರಂ ಹಬ್ಬದ ಅಂಗವಾಗಿ ಮುದಗಲ್‌ನ ಹುಸೇನಿ ಆಲಂ ದರ್ಗಾಕ್ಕೆ ಹರಿದುಬಂದ ಭಕ್ತಸಾಗರ.
JAGADEESH KUMBAR
Published on: 

ಪ್ರಮುಖ ಮುಖ್ಯಾಂಶಗಳು

  • ವಿವಿಧ ಊರುಗಳಿಂದ ಆಗಮನ
  • ಕಲ್ಯಾಣಿಯಲ್ಲಿ ಆಲಂಗಳ ಶುದ್ಧೀಕರಣ
ಮುದಗಲ್: ಐತಿಹಾಸಿಕ ಮುದಗಲ್ ಮೊಹರಂ ಹಬ್ಬ ನಿಮಿತ್ತ ಕಿಲ್ಲಾದ ಹುಸೇನಿ ಆಲಂ ದರ್ಗಾಕ್ಕೆ ಜಿಲ್ಲೆ ಹಾಗೂ ನೆರೆ ರಾಜ್ಯಗಳ ಸಹಸ್ರಾರು ಭಕ್ತರು ಭೇಟಿ ನೀಡುತ್ತಿದ್ದಾರೆ.
ವಿವಿಧೆಡೆ ಆಲಂಗಳನ್ನು ಪ್ರತಿಷ್ಠಾಪಿಸುವುದಕ್ಕೂ ಮುನ್ನ ಸ್ಥಳೀಯ ಹುಸೇನಿ ಆಲಂ ದರ್ಗಾ ಹತ್ತಿರದ ಕಲ್ಯಾಣಿಯಲ್ಲಿ ಆಲಂಗಳ ಶುದ್ಧೀಕರಣ ಕಾರ್ಯ ಶನಿವಾರ ರಾತ್ರಿ ಭಕ್ತರ ಸಮ್ಮುಖದಲ್ಲಿ ನಡೆಯಿತು.
 ಬಳಿಕ ಆಲಂಗಳನ್ನು ಹುಸೇನಿ ಆಲಂ ದರ್ಗಾದಲ್ಲಿಟ್ಟು ಧಾರ್ಮಿಕ ಕಾರ್ಯಕ್ರಮಗಳನ್ನು ನೆರವೇರಿಸಲಾಯಿತು. ಆನಂತರ ನಾನಾ ಗ್ರಾಮಗಳ ದರ್ಗಾ ಸಮಿತಿ ಸದಸ್ಯರು ಊರುಗಳಿಗೆ ಆಲಂಗಳನ್ನು ತೆಗೆದುಕೊಂಡು ಹೋಗುತ್ತಿರುವ ಚಿತ್ರಣ ಕಂಡು ಬಂತು. 
ಕಿಲ್ಲಾದಲ್ಲಿನ ಹುಸೇನಿ ಆಲಂ ದರ್ಗಾ ಬಣ್ಣಬಣ್ಣದ ವಿದ್ಯುತ್ ದೀಪಗಳಿಂದ ಕಂಗೊಳಿಸುತ್ತಿದೆ. ವೆಂಕಟರಾಯನ ಪೇಟೆಯ ಕಾಸೀಂ ಪೀರ್ ದರ್ಗಾ, ಬೇಗಂಪುರ ಪೇಟೆಯ ಮೌಲಾಲಿ ದರ್ಗಾ, ಹಳೆಪೇಟೆ ಮತ್ತು ಮೇಗಳಪೇಟೆ ಸೇರಿದಂತೆ ಇತರ ದರ್ಗಾಗಳಲ್ಲಿಯೂ ಆಲಂಗಳಿಗೆ ಹೂಗಳ ಅಲಂಕಾರ, ಸಕಲ ವಾದ್ಯಮೇಳಗಳೊಂದಿಗೆ ಧಾರ್ಮಿಕ ವಿಧಿವಿಧಾನ ನೆರವೇರಿಸಲಾಯಿತು.
ಮುದಗಲ್ ಮೊಹರಂ ಹಬ್ಬ ಭಾವೈಕ್ಯಕ್ಕೆ ಹೆಸರುವಾಸಿಯಾಗಿದ್ದು, ದರ್ಗಾದಲ್ಲಿ ಜರುಗುವ ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ಸಮಸ್ತ ಸಮಾಜದವರು ಪಾಲ್ಗೊಳ್ಳುತ್ತಿರುವುದು ವಿಶೇಷ. 
"

ಹತ್ತು ದಿನಗಳ ಕಾಲ ನಡೆಯುವ ಮುದಗಲ್ ಮೊಹರಂ ರಾಜ್ಯದಲ್ಲಿಯೇ ಖ್ಯಾತಿ ಹೊಂದಿದೆ. ರಾಜ್ಯದ ಮೂಲೆ ಮೂಲೆಗಳಿಂದ ಆಗಮಿಸುವ ಭಕ್ತರ ಹಿತದೃಷ್ಟಿಯಿಂದ ಇಲಾಖೆ ಅಧಿಕಾರಿಗಳ ನೇತೃತ್ವದಲ್ಲಿ ಸೂಕ್ತ ಬಂದೋಬಸ್ತ್ ವ್ಯವಸ್ಥೆ ಕಲ್ಪಿಸಲಾಗಿದೆ.

— ಅರುಣಾಂಗ್ಷು ಗಿರಿ ಎಸ್ಪಿ, ರಾಯಚೂರು

ವರ್ಷದಿಂದ ವರ್ಷಕ್ಕೆ ಮುದಗಲ್ ಮೊಹರಂ ಹಬ್ಬಕ್ಕೆ ಭಕ್ತರ ಸಂಖ್ಯೆ ಹೆಚ್ಚಾಗುತ್ತಿದೆ. ದರ್ಗಾ ಸಮಿತಿಯಿಂದ ಸಕಲ ಸಿದ್ಧತೆಗಳನ್ನು ಪುರಸಭೆಯೊಂದಿಗೆ ಕೈಗೊಳ್ಳಲಾಗಿದೆ. ಭಕ್ತರು ಸಹಕರಿಸಿ ಶಾಂತಿಯುತವಾಗಿ ಹಬ್ಬದ ಆಚರಣೆಯಲ್ಲಿ ಭಾಗವಹಿಸಬೇಕು.

— ಅಮೀರಬೇಗ್ ಉಸ್ತಾದ್ ಅಧ್ಯಕ್ಷ, ಹುಸೇನಿ ಆಲಂ ದರ್ಗಾ ಸಮಿತಿ, ಮುದಗಲ್
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net