ಡಿ.17ರಿಂದ ಫೆ.23! ಬಲೆಗೆ ಬಿದ್ದ ಸಂಶೋಧಕನಿಗೆ ಕೋಟಿಗಟ್ಟಲೇ ರೂಪಾಯಿ ಉಂಡೇನಾಮ ಹಾಕಿದ ಸೈಬರ್ ವಂಚಕರು

ಬೆಂಗಳೂರು: ಇತ್ತೀಚಿನ ದಿನಗಳಲ್ಲಿ ಅದರಲ್ಲೂ ಸ್ಮಾರ್ಟ್​ಫೋನ್ ಬಳಕೆ ಹೆಚ್ಚಾದ ಮೇಲಂತೂ ಬಳಕೆದಾರರಲ್ಲಿ ಕಾಡುತ್ತಿರುವ ಅತಿದೊಡ್ಡ ಭಯವೆಂದರೆ, ಯಾರಾದರೂ ನಮ್ಮ ಫೋನ್​ ಹ್ಯಾಕ್ ಮಾಡ್ತಾರೋ, ಎಲ್ಲಿ ಲಕ್ಷಾಂತರ ರೂ. ಹಣ ಕಳೆದುಕೊಂಡು ಬಿಡ್ತೀವೋ ಅಥವಾ ಫೋಟೋಗಳನ್ನು ಮುಂದಿಟ್ಟು ಬ್ಲ್ಯಾಕ್​ಮೇಲ್​ ಮಾಡ್ತಾರೋ ಅನ್ನೋ ಚಿಂತೆ ಬೆನ್ನತ್ತಿರುತ್ತೆ. ಕೆಲವರು ಸಾಕಷ್ಟು ಎಚ್ಚರ ವಹಿಸಿದರೂ ಏನಾದರೂ ಒಂದು ಎಡವಟ್ಟು ಮಾಡಿಕೊಂಡಿರುತ್ತಾರೆ. ಅದು ನಿಜಕ್ಕೂ ದುರಂತ.

ಪ್ರಸ್ತುತ, ಕೇಂದ್ರ ಮತ್ತು ಆಯಾ ರಾಜ್ಯ ಸರ್ಕಾರಗಳು ಜನರಲ್ಲಿ ಡಿಜಿಟಲ್​ ಅರೆಸ್ಟ್ ಬಗ್ಗೆ ಜಾಗೃತಿ ಮೂಡಿಸುತ್ತಲೇ ಬಂದಿದೆ. ಆದರೂ, ನಡೆಯುತ್ತಿರುವ ಡಿಜಿಟಲ್​ ಅರೆಸ್ಟ್​ಗೆ ಜನರು ಸಿಲುಕುತ್ತಿರುವುದು ಬೇಸರ. ಸೈಬರ್​ ಫ್ರಾಡ್​ಗಳ ಜಾಲಗಳ ಬಗ್ಗೆ ದಿನಕ್ಕೆ ನೂರಾರು ಘಟನೆಗಳು ಕಣ್ಣಿಗೆ, ಕಿವಿಗೆ ಬೀಳುತ್ತಿದ್ದರೂ ಜನಸಾಮಾನ್ಯರು ಅಲರ್ಟ್​ ಆಗದಿರುವುದು ಮತ್ತೊಂದು ದುರಂತ. ಆಶ್ಚರ್ಯ ಅನಿಸೋದು, ಇಂತಹ ಮೋಸದ ಜಾಲಕ್ಕೆ ಬೀಳುತ್ತಿರುವುದು ನಿವೃತ್ತಿ ಪಡೆದ ವೈದ್ಯರು, ವಕೀಲರು, ಶಿಕ್ಷಕರು ಸೇರಿದಂತೆ ವಿದ್ಯಾವಂತರೇ. ಇದಕ್ಕೆ ಮತ್ತೊಂದು ಸಾಕ್ಷಿ ಈ ಪ್ರಕರಣ.

94 ವರ್ಷ ವಯಸ್ಸಿನ ಸಂಶೋಧಕ ಮಂಜುನಾಥ್ (ಹೆಸರು ಬದಲಿಸಲಾಗಿದೆ) ಎಂಬ ಬೆಂಗಳೂರಿನ ನಿವಾಸಿ, ಮಾರ್ಚ್​ 08ರಂದು ಸೈಬರ್​ ಕ್ರೈಂ ಪೊಲೀಸ್​ ಠಾಣೆಯಲ್ಲಿ ತಾನು ಡಿಜಿಟಲ್​ ಅರೆಸ್ಟ್​ಗೆ ಸಿಲುಕಿರುವ ಬಗ್ಗೆ ದೂರು ದಾಖಲಿಸಿದ ಬಳಿಕವೇ ಈ ಪ್ರಕರಣ ಬೆಳಕಿಗೆ ಬಂದಿದೆ. ಪತ್ನಿಯನ್ನು ಆಸ್ಪತ್ರೆಗೆ ಸೇರಿಸಿದ್ದ ಸಂದರ್ಭದಲ್ಲಿ, ಡಿ.02ರಂದು ಒಂದು ಅನಾಮಧೇಯ ವ್ಯಕ್ತಿಯಿಂದ ದೂರವಾಣಿ ಕರೆ ಬಂದಿತ್ತು. ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ ಅಧಿಕಾರಿ ಎಂದು ಪರಿಚಯಿಸಿಕೊಂಡ ಕಿರಾತಕ, ನೀವು ಮಾನವ ಕಳ್ಳಸಾಗಣೆ ಕೇಸ್​ನಲ್ಲಿ ಪ್ರಮುಖ ಆರೋಪಿಯಾಗಿದ್ದೀರಿ ಎಂದು ಬೆದರಿಸಿದ್ದಾನೆ.

ಬಳ್ಳಾರಿಯಲ್ಲಿ ಪ್ರಕರಣ ದಾಖಲಾಗಿದೆ. ಈ ಕೇಸ್​ನಲ್ಲಿ ನೀವು ಭಾಗಿಯಾಗಿದ್ದೀರಿ ಎಂಬ ಆರೋಪಗಳು ಕೇಳಿಬಂದಿವೆ. ಈ ಬಗ್ಗೆ ನಿಮ್ಮ ಬಳಿ ಇನ್ನಷ್ಟು ಮಾಹಿತಿ ಪಡೆದುಕೊಳ್ಳಲು ಪೊಲೀಸ್​ ಅಧಿಕಾರಿಯೊಬ್ಬರು ನಿಮ್ಮನ್ನು ಸಂಪರ್ಕಿಸುತ್ತಾರೆ ಎಂದು ಹೇಳಿ ಕಾಲ್ ಕಟ್ ಮಾಡಿದ್ದಾನೆ. ಅವನ ನಂತರದಲ್ಲಿ, ಹಲವರು ಫೋನ್ ಮಾಡಿ, ಮಂಜುನಾಥ್​ಗೆ ಮಾನಸಿಕ ಹಿಂಸೆ ನೀಡಿದ್ದಾರೆ. ವಿಡಿಯೋ ಕಾಲ್​ಗಳ ಮೂಲಕ ಕೇಸ್​ ಸೆಟ್ಲಮೆಂಟ್​ಗೆ ಸೈಬರ್​ ಫ್ರಾಡ್​ಗಳು ಒತ್ತಾಯಿಸಿದ್ದಾರೆ. ಇದಕ್ಕೆ ಒಪ್ಪಿದ ಮಂಜುನಾಥ್, ಬರೋಬ್ಬರಿ 5 ಕೋಟಿಯನ್ನು ಹಂತ ಹಂತವಾಗಿ ನೀಡಿದ್ದಾರೆ.

2025ರ ಡಿ.​​17ರಿಂದ ಫೆಬ್ರವರಿ 23ವರೆಗೆ 4.9 ಕೋಟಿ ರೂಪಾಯಿಯನ್ನು ವಂಚಕರ ಖಾತೆಗೆ ಮಂಜುನಾಥ್ ವರ್ಗಾಯಿಸಿದ್ದಾರೆ. ಇದು ಅವರ ಪತ್ನಿಯ ಜಂಟಿ ಖಾತೆಯಿಂದ ತೆಗೆದ ಹಣವಾಗಿದೆ. 92 ಲಕ್ಷ ರೂ, 76 ಲಕ್ಷ ರೂ., 1 ಕೋಟಿ ರೂ., 57 ಲಕ್ಷ ರೂ ಮತ್ತು 1.3 ಕೋಟಿ ರೂ. ಹಣವನ್ನು ಆರ್​ಟಿಜಿಎಸ್ ಮೂಲಕ ಸೈಬರ್​ ವಂಚಕರಿಗೆ ಕಳುಹಿಸಿದ್ದಾರೆ. ಇಲ್ಲಿಗೆ ನಿಲ್ಲದ ಅವರ ಹಣದ ದಾಹ ಇನ್ನಷ್ಟು ಹೆಚ್ಚುತ್ತಿದ್ದಂತೆ ಮಂಜುನಾಥ್​ ಅಕೌಂಟ್​ ಖಾಲಿಯಾಗಿದೆ. ಯಾವಾಗ ತಮ್ಮ ಸ್ನೇಹಿತನ ಬಳಿ ಹೆಚ್ಚುವರಿ ಹಣ ಪಡೆಯಲು ಸಹಾಯ ಕೋರಿದರು, ಆಗ ಅವರು ಇದೊಂದು ಡಿಜಿಟಲ್​ ಅರೆಸ್ಟ್​ ಎಂದು ಎಚ್ಚರಿಸಿ, ಬೆಂಗಳೂರು ಸೈಬರ್​ ಕ್ರೈಂ ಪೊಲೀಸರಿಗೆ ದೂರು ನೀಡುವಂತೆ ತಿಳಿಸಿದರು. ಸದ್ಯ ಕೇಸ್​ ದಾಖಲಾಗಿದ್ದು, ಖಾಕಿ ಪಡೆ ತನಿಖೆ ಕೈಗೊಂಡಿದೆ,(ಏಜೆನ್ಸೀಸ್).