ವಿಂಡ್​ ಪವರ್​ ಯೋಜನೆಗಳಲ್ಲಿ ಭೂಮಾಲೀಕರಿಗೆ ಆದ್ಯತೆ: ಕೆ.ಜೆ. ಜಾರ್ಜ್​

ನಗರದ ಕಾಟನ್​ ಸೇಲ್​ ಸೊಸೈಟಿ ಆವರಣದಲ್ಲಿ ಸೋಮವಾರ ಏರ್ಪಡಿಸಿದ್ದ ಕೆ. ಎಚ್​. ಪಾಟೀಲ ಅವರ 101ನೇ ಜಯಂತಿ ಅಂಗವಾಗಿ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಮಾತನಾಡಿದರು. ರಾಜ್ಯದಲ್ಲಿಯೇ ಗದಗ ಜಿಲ್ಲೆಯಲ್ಲಿ ವಿಂಡ್​ ಪವರ್​ ಅತ್ಯಧಿಕ ಉತ್ಪಾದನೆ ಆಗುತ್ತಿದ್ದು, ಉತ್ಪಾದನೆಯಲ್ಲಿ ಭೂಮಾಲೀಕರಾದ ರೈತರಿಗೂ ಪಾಲು ಸಿಗಬೇಕು ಎಂದು ಸಚಿವ ಎಚ್​.ಕೆ. ಪಾಟೀಲ ಅವರು ಇಂದನ ಸಚಿವ ಕೆ. ಜೆ. ಜಾರ್ಜ್​ ಅವರಿಗೆ ವೇದಿಕೆಯಲ್ಲಿ ಮನವಿ ಮಾಡಿದ್ದರು. ಎಚ್​.ಕೆ. ಪಾಟೀಲ ಮನವಿಗೆ ವೇದಿಕೆಯಲ್ಲೇ ಸ್ಪಂಧಿಸಿದ ಜಾರ್ಜ್​ ಅವರು ವಿಂಡ್​ ಮಿಲ್​ ಸ್ಥಾಪನೆಗೆ ಸಂಬಂಧಿಸಿದಂತೆ ಸ್ಥಳಿಯ ರೈತರು ಮತ್ತು ಭೂಮಾಲೀಕರು ಪಾಲುದಾರರಾಗುವಂತೆ ನೀತಿ ರೂಪಿಸುವ ಬಗ್ಗೆ ಮುಖ್ಯಮಂತ್ರಿ ಅವರೊಂದಿಗೆ ಚರ್ಚೆ ನಡೆಸಲಾಗುತ್ತದೆ ಎಂದು ತಿಳಿಸಿದರು.

ವಿಂಡ್​ ಪವರ್​ ಅಗತ್ಯತೆ ಅಧಿಕವಿದೆ. ರೈತರು ತಮ್ಮ ಜೀಮಿನನ್ನು ಗಾಳಿ ವಿದ್ಯುತ್​ ಯಂತ್ರ ಸ್ಥಾಪಿಸುವ ಕಂಪನಿಗಳೆ ನೀಡುತ್ತಿದ್ದಾರೆ. ಗಾಳಿ ವಿದ್ಯುತ್​ ಕಂಪನಿ ಉತ್ಪಾಧಿಸುವ ವಿದ್ಯುತ್​ ಅಥವಾ ಲಾಭದಲ್ಲಿ ರೈತರಿಗೂ ಪಾಲಿ ನೀಡಿ ರೈತರನ್ನು ಆಥಿರ್ಕ ಸ್ವಾವಲಂಭಿ ಆಗಿಸುವಲು ಸರ್ಕಾರ ಬದ್ಧವಿದೆ. ರಾಜ್ಯದಲ್ಲಿ ನವೀಕರಿಸಬಹುದಾದ ಇಂಧನ ಕ್ಷೇತ್ರಕ್ಕೆ ಹೆಚ್ಚಿನ ಒತ್ತು ನೀಡಲಾಗುತ್ತಿದೆ. ಈಗಾಗಲೇ 2500 ಮೆಗಾವಾಟ್​ ವಿಂಡ್​ ಪವರ್​ ಉತ್ಪಾದನೆಗಾಗಿ ಟೆಂಡರ್​ ನೀಡಲಾಗಿದೆ. ಇದರಿಂದ ಅಂದಾಜು 10 ಸಾವಿರ ಕೋಟಿ ರೂಪಾಯಿ ಹೂಡಿಕೆ ರಾಜ್ಯಕ್ಕೆ ಬರಲಿದ್ದು, ವಿದ್ಯುತ್​ ಉತ್ಪಾದನೆ ಹೆಚ್ಚುವ ಜೊತೆಗೆ ರೈತರಿಗೆ ಸಹ ಲಾಭವಾಗಲಿದೆ ಎಂದು ಹೇಳಿದರು.

ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ರೈತರಿಗೆ ವಿದ್ಯುತ್​ ಸಬ್ಸಿಡಿ ಸೇರಿದಂತೆ ವಿವಿಧ ಯೋಜನೆಗಳ ಮೂಲಕ ನೆರವು ನೀಡುತ್ತಿವೆ. ಗೃಹಜ್ಯೋತಿ ಸೇರಿದಂತೆ ಉಚಿತ ವಿದ್ಯುತ್​ ಯೋಜನೆಗಳಿಗೆ ವರ್ಷಕ್ಕೆ ಅಂದಾಜು 33 ಸಾವಿರ ಕೋಟಿ ರೂಪಾಯಿ ವೆಚ್ಚವಾಗುತ್ತಿದೆ ಎಂದು ವಿವರಿಸಿದರು. ರೈತರಿಗೆ ನಿರಂತರ ವಿದ್ಯುತ್​ ಪೂರೈಕೆ ಮಾಡುವ ಮೂಲಕ ಕೃಷಿ ಉತ್ಪಾದನೆ ಹೆಚ್ಚಿಸುವುದು ಸರ್ಕಾರದ ಉದ್ದೇಶವಾಗಿದೆ. ರೈತರು ಉತ್ಪಾದನೆ ಹೆಚ್ಚಿಸಿದಷ್ಟು ರಾಜ್ಯದ ಆಥಿರ್ಕತೆಗೂ ಬಲ ಸಿಗುತ್ತದೆ ಎಂದು ಜಾರ್ಜ್​ ಹೇಳಿದರು.

ಇದೇ ವೇಳೆ ದಿವಂಗತ ಕೆ.ಎಚ್​. ಪಾಟೀಲ್​ ಅವರ ಸೇವೆಯನ್ನು ಸ್ಮರಿಸಿದ ಅವರು, ಅವರ ತತ್ವಗಳು ಹಾಗೂ ಜನಪರ ರಾಜಕೀಯ ಎಲ್ಲರಿಗೂ ಮಾದರಿಯಾಗಿದೆ ಎಂದು ಹೇಳಿದರು. ಕಾರ್ಯಕ್ರಮದಲ್ಲಿ ಸಚಿವರಾದ ಎಚ್​.ಕೆ. ಪಾಟೀಲ, ದಿನೇಶ ಗುಂಡೂರಾವ, ಈಶ್ವರ ಖಂಡ್ರೆ, ಶಾಸಕ ಜಿ.ಎಸ್​. ಪಾಟೀಲ, ಡಿ.ಆರ್​. ಪಾಟೀಲ ಇತರರು ಇದ್ದರು.