ಆಕೆ ಅಷ್ಟು ಚೆನ್ನಾಗಿ ಭಾಷಣ ಮಾಡುತ್ತಾಳೆಂದು ಯಾರೂ ಊಹಿಸಿರಲಿಲ್ಲ. ಯಾಕೆಂದರೆ ಭಾಷಣ ಮಾಡಲು ಆಕೆ ಎದ್ದು ವೇದಿಕೆಯತ್ತ ಹೋಗುವಾಗ ಕೆಲವು ತುಂಟ ಹುಡುಗರು ಹೋ... ಕುಳ್ಳಿ, ಡುಮ್ಮಿ ಎಂದೆಲ್ಲ ಹೇಳಿ ಛೇಡಿಸಲು ಶುರು ಮಾಡಿದ್ದರು. ಆದರೆ ಹುಡುಗಿಯ ಭಾಷಣಕ್ಕೆ ಬಂದ ಚಪ್ಪಾಳೆಗಳ ಸುರಿಮಳೆ ನೋಡಿ ಆಕೆಯನ್ನು ಛೇಡಿಸಿದವರ ಮೊಗದಲ್ಲಿ ಪಶ್ಚಾತ್ತಾಪದ ಭಾವನೆ ಮೂಡಿತ್ತು. ಅಯ್ಯೋ ಈಕೆಯನ್ನು ಛೇಡಿಸಬಾರದಿತ್ತು ಎಂದೆನಿಸಿತ್ತು ಅವರಿಗೆ. ಇದೊಂದು ಉದಾಹರಣೆಯಷ್ಟೇ. ಇಂದಿನ ದಿನಗಳಲ್ಲಿ ಬಾಡಿ ಶೇಮಿಂಗ್, ಅಂದರೆ ವ್ಯಕ್ತಿಯ ದೇಹದ ರೂಪ, ಗಾತ್ರ, ಬಣ್ಣ, ಎತ್ತರ, ತೂಕ, ಅಂಗವೈಕಲ್ಯ, ಕೂದಲು, ಚರ್ಮ ಇತ್ಯಾದಿಗಳ ಬಗ್ಗೆ ಹಾಸ್ಯ, ಟೀಕೆ ಅಥವಾ ಅವಮಾನ ಮಾಡುವ ವರ್ತನೆ ಅಲ್ಲಲ್ಲಿ ಬೆಳಕಿಗೆ ಬರುತ್ತಿರುತ್ತಿವೆ. ಇಂತಹ ವರ್ತನೆಗಳಿಂದ ಮನ ನೊಂದು ಅನೇಕರು ಆತ್ಮಹತ್ಯೆ ಮಾಡಿಕೊಳ್ಳುವ, ಖಿನ್ನತೆಗೆ ಜಾರುವ ಘಟನೆಗಳೂ ನಡೆಯುತ್ತಿರುತ್ತವೆ.
