ಸರಣಿ ಕಳ್ಳರ ಹಾವಳಿಗೆ ಬೆಚ್ಚಿ ಬಿದ್ದ ಜನತೆ

ಇಂಡಿ: ತಾಲೂಕಿನ ಬರಗುಡಿ ಹಾಗೂ ಪಡನೂರ ಗ್ರಾಮದ ತೋಟದ ವಸತಿಗಳಲ್ಲಿ ಸರಣಿ ಕಳ್ಳತನ ನಡೆದಿರುವ ಬಗ್ಗೆ ತಡವಾಗಿ ಬೆಳಕಿಗೆ ಬಂದಿದೆ.

ಬರಗುಡಿ ಗ್ರಾಮದ ಸಂಜೀವ ಶರಣಪ್ಪ ಕೆಳಗಿನಮನಿ ಇವರ ತೋಟದ ವಸತಿಯಲ್ಲಿ 20 ಗ್ರಾಂ. ಬಂಗಾರ, 60 ಸಾವಿರ ರೂ. ಅದೇ ಗ್ರಾಮದ ಸುಭಾಸ ಕ್ಷತ್ರಿ ಅವರ ಮನೆಯಲ್ಲಿ 30 ಗ್ರಾಂ.ಚಿನ್ನ ದೋಚಿ ಪರಾರಿಯಾಗಿದ್ದಾರೆ. ಪಡನೂರ ರಸ್ತೆಯಲ್ಲಿರುವ ತೋಟದ ವಸ್ತಿಗಳಲ್ಲಿರುವ ಬಿಳೇನಿಸಿದ್ಧ ಕೊಣುರೆ ಅವರ ಮನೆ ಬೀಗ ಮುರಿದು 30 ಗ್ರಾಂ. ಹಾಗೂ ಮೇತ್ರಿ ಅವರ ಮನೆ ಬೀಗ ಮುರಿದು 5 ಗ್ರಾ. ಚಿನ್ನ ಕದ್ದು ಕಳ್ಳರು ಪರಾರಿಯಾಗಿದ್ದಾರೆ.

ಈ ಘಟನೆ ಮೇ 3ರ ಮಧ್ಯಾಹ್ನದ ಅವಧಿಯಲ್ಲಿ ನಡೆದ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಮದುವೆ ಮುಹೂರ್ತಕ್ಕೆ ತಂದಿದ್ದ ಬಂಗಾರ ಕಳೆದುಕೊಂಡ ರೈತರು ಈಗ ಕಂಗಾಲಾಗಿದ್ದಾರೆ. ಈ ಕಳ್ಳತನ ಹಗಲಿನಲ್ಲಿ ನಡೆದಿದ್ದು ಜೀವಕ್ಕೆ ತೊಂದರೆ ಆದರೆ ಹೇಗೆ ಎಂಬ ಭಯ ರೈತಾಪಿ ವರ್ಗದವರನ್ನು ಕಾಡುತ್ತಿದೆ. ತಿಂಗಳ ಹಿಂದೆಯೇ ಅಮಸಿದ್ದ ಓಗೆಪ್ಪ ಒಡೆಯರ ಅವರಿಗೆ ಸೇರಿದ್ದ 1 ಎಮ್ಮೆ 3 ಹಸುಗಳನ್ನು ಕಳ್ಳರು ರಾತ್ರೋರಾತ್ರಿ ಹೊತ್ತೊಯ್ದಿದ್ದರು. ಆದರೆ ಆಗ ಪೊಲೀಸರು ಮುತುವರ್ಜಿ ವಹಿಸಿ ಕಳ್ಳರ ಹೆಡೆಮುರಿ ಕಟ್ಟಿದ್ದರೆ ಈಗ ಈ ಪರಿಸ್ಥಿತಿ ಬರುತ್ತಿರಲಿಲ್ಲ ಎಂದು ರೈತರು ಬೇಸರ ವ್ಯಕ್ತಪಡಿಸಿದ್ದಾರೆ. ಗ್ರಾಮೀಣ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.