ಕೆಂಡದಂಥ ಬಿಸಿಲಿಗೆ ಜನ-ಜಾನುವಾರು ಹೈರಾಣ

ಯಾದಗಿರಿ: ಇದು ಮಳೆಗಾಲವೋ ಇಲ್ಲವೇ ಬೇಸಿಗೆಯೋ ಎಂಬ ಮಿಲಿಯನ್ ಡಾಲರ್ ಪ್ರಶ್ನೆ ಗಿರಿ ಜಿಲ್ಲೆ ಜನರನ್ನು ಕಾಡುತ್ತಿದೆ. ಕಾರಣ ಮಳೆಗಾಲ ಆರಂಭವಾಗಿ ಮೂರೂವರೆ ತಿಂಗಳಾದರೂ ವರಣದೇವ ಧರೆಗೆ ಇಳಿಯದ್ದರಿಂದ ಜನ-ಜಾನುವಾರುಗಳು ಸಂಕಟಕ್ಕೆ ಸಿಲುಕಿದರೆ, ರೈತರು ಬೆಳೆ ಒಣಗುತ್ತಿರುವುದನ್ನು ನೋಡಿ ತೀವ್ರ ಆತಂಕಕ್ಕೆ ಒಳಗಾಗಿದ್ದಾರೆ. ಜೂ.೭ಕ್ಕೆ ಪುನರ್ವಸು ಮಳೆಯಿಂದ (ಮಿರಗ್) ಆರಂಭವಾಗಿ ಈಗ ಉತ್ತರೆ ಮಳೆ ಸುರಿಯಬೇಕಿತ್ತು. ಆದರೆ ಮೃಗಶಿರ, ಆರಿದ್ರ, ಪುಷ್ಯ ನಕ್ಷತ್ರದ ಒಂದಿಷ್ಟು ಮಳೆಯಾಗಿದ್ದು ಬಿಟ್ಟರೆ ಆಶ್ಲೇಷಾ, ಮಾಘ, ಹುಬ್ಬೆ, ಹಸ್ತ ನಕ್ಷತ್ರಗಳ ಮಳೆ ಆಗಲೇ ಇಲ್ಲ. ಹೀಗಾಗಿ ಮೇ ಕೊನೆಗೆ ಮುಗಿಯಬೇಕಿದ್ದ ಬೇಸಿಗೆ ನಿರಂತರ ಮುಂದುವರಿದಿದ್ದಾ, ನಾಲ್ಕು ತಿಂಗಳ ಬದಲು ಭರ್ತಿ ಏಳು ತಿಂಗಳವರೆಗೆ ಭಯಂಕರ ಝಳ, ಧಗೆಮಿಶ್ರತ ಬಿಸಿಲ ಹೊಡೆತ ಮಿತಿಮೀರಿದೆ.

ಪ್ರಥಮ ಪೂಜಿತ ವಿನಾಯಕ ದೇವರ ಹಬ್ಬ ಆಚರಣೆ ವೇಳೆ ಭರ್ಜರಿ ಮಳೆ ಬರಬೇಕಾಗಿತ್ತು. ಆದರೆ ಕೆಂಡದಂತಹ ಬಿಸಿಲು ಬೆಳಗಾಗುತ್ತಲೇ ಹೊರಹೊಮ್ಮುವ ಮೂಲಕ ಇಡೀ ಜೀವಸಂಕುಲಕ್ಕೆ ಭಾರಿ ಹೈರಾಣ ಮಾಡುತ್ತಿದೆ. ಬೆಳಗ್ಗೆ ೮ರ ಸುಮಾರಿಗೆ ಬಿಸಿಲು ತನ್ನ ಪ್ರಖರತೆ ಹೊರಸೂಸಲು ಆರಂಭಿಸಿದರೆ ೧೦ಕ್ಕೆ ಝಳ ಮತ್ತು ಧಗೆಯೊಂದಿಗೆ ಸಂಜೆವರೆಗೆ ಕೆಂಡಕಾರುವ ಬಿಸಿಲು ರುದ್ರನರ್ತನ ಮಾಡುತ್ತಿದೆ. ಗಿಡ-ಮರಗಳು ಒಣಗುತ್ತಿದ್ದು, ಹಳ್ಳ-ಕೊಳ್ಳ, ಕೆರೆ-ಕಟ್ಟೆಗಳು ಬತ್ತುತ್ತಿವೆ. ಜನರಿಗೆ ಶುದ್ಧ ಕುಡಿಯುವ ನೀರಿಗೆ ಬರವಿದ್ದರೆ, ಜಾನುವಾರುಗಳು ಮನೆ ಬಿಟ್ಟು ಹೊರಬಂದು ಮರಳಿ ಮನೆಗೆ ತೆರಳುವ ದಾರಿಯಲ್ಲಿ ಕೊಡ ನೀರು ಸಹ ಸಿಗುತ್ತಿಲ್ಲ. ಮೇವಿನ ಕೊರತೆಯೂ ಕಾಡುತ್ತಿದೆ. ಇನ್ನು ಪಕ್ಷಿ ಸಂಕುಲಕ್ಕೆ ಕುಡಿಯಲು ತೊಟ್ಟು ನೀರು ಸಿಗದಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ಜನರು ಬೆಳಗ್ಗೆ ೧೧ರಿಂದ ಸಂಜೆವರೆಗೆ ಮನೆ ಬಿಟ್ಟು ಹೊರಗೆ ಬರದಂತಾಗಿದೆ. ಕಟ್ಟಡಗಳು ಕಾಯ್ದು ಬೆಂಕಿಯಂತಾಗುತ್ತಿವೆ. ಝಳ, ಧಗೆಯಿಂದ ಜನ ಬೆವರ ಸ್ನಾನ ಮಾಡುತ್ತಿದ್ದಾರೆ. ರಸ್ತೆ ಬದಿ ವ್ಯಾಪಾರಿಗಳ ಸ್ಥಿತಿಯಂತೂ ದೇವರೇ ಬಲ್ಲ.

ಕಟ್ಟಡಗಳ ನಿರ್ಮಾಣ, ಹೊಲಗಳಲ್ಲಿ ಕಸ ಕೀಳುತ್ತಿರುವ ಕೂಲಿ ಕಾರ್ಮಿಕರು ಇಂಥ ನೆತ್ತಿಸುಡುವ ಬಿಸಿಲಿನಿಂದ ಅನಾರೋಗ್ಯಕ್ಕೆ ಒಳಗಾಗುತ್ತಿದ್ದಾರೆ. ಹಳ್ಳಿಗಳಲ್ಲಿ ನಿಂತ ನೀರು, ಚರಂಡಿ ಮಿಶ್ರಿತ ಹೊಲಸಿನಿಂದ ಸೊಳ್ಳೆಸಹಿತ ಇತರ ವೈರಸ್‌ಗಳು ಹುಟ್ಟಿಕೊಂಡು ಮಲೇರಿಯಾ, ಡೆಂಘೆ, ಚಿಕೂನ್‌ಗುನ್ಯಾದಂಥ ರೋಗಗಳು ಹರಡುತ್ತಿವೆ. ಒಟ್ಟಾರೆ ಜಿಲ್ಲೆಯಲ್ಲಿ ಮಳೆ ಮಾಯವಾಗಿ ಬಿಸಿಲು ಮುಂದುವರಿದು ಸಕಲ ಜೀವರಾಶಿಗಳನ್ನು ಸಂಕಟಕ್ಕೆ ತಳ್ಳಿದೆ.

ಮಳೆ ಆಗದಿರಲು ಅಥವಾ ಕೊರತೆಗೆ ಹಲವು ನೈಸರ್ಗಿಕ ಮತ್ತು ಮಾನವ ನಿರ್ಮಿತ ಕಾರಣಗಳಿವೆ. ಮರಗಳು ವಾತಾವರಣಕ್ಕೆ ತೇವಾಂಶ ಬಿಡುಗಡೆ ಮಾಡುತ್ತವೆ. ಇದು ಮೋಡಗಳ ಸೃಷ್ಟಿಗೆ ಸಹಾಯ ಮಾಡುತ್ತದೆ. ಕಾಡುಗಳನ್ನು ನಾಶಪಡಿಸುವುದರಿಂದ ಈ ಪ್ರಕ್ರಿಯೆಗೆ ಧಕ್ಕೆಯಾಗಿ ಮಳೆ ಕಡಿಮೆಯಾಗುತ್ತದೆ. ಭೂಮಿ ತಾಪಮಾನ ಹೆಚ್ಚುತ್ತಿರುವುದರಿಂದ ಮಳೆ ಚಕ್ರದಲ್ಲಿ ಏರುಪೇರು ಆಗುತ್ತದೆ. ಎಲ್ಲಾ ನಿನೋ, ಪೆಸಿಫಿಕ್ ಸಾಗರದಲ್ಲಿ ಉಂಟಾಗುವ ಸಮುದ್ರದ ಮೇಲ್ಮೈ ತಾಪಮಾನದ ಬದಲಾವಣೆ ಆಗಿದೆ. ಎಲ್ಲಾ ನಿನೋ ಸಕ್ರಿಯವಾದಾಗ ಭಾರತ ಸೇರಿ ಅನೇಕ ರಾಷ್ಟçಗಳಲ್ಲಿ ಮುಂಗಾರು ಮಳೆ ದುರ್ಬಲಗೊಳ್ಳುತ್ತದೆ. ಹಳ್ಳಿ ಮತ್ತು ಕಾಡುಗಳು ಕಾಂಕ್ರೀಟ್ ನಗರಗಳಾಗಿ ಬದಲಾಗುತ್ತಿವೆ. ಇದರಿಂದ ಭೂಮಿ ಮೇಲ್ಮೈ ತಾಪಮಾನ ಹೆಚ್ಚಾಗಿ ಮೋಡಗಳು ಮಳೆಯಾಗಿ ಪರಿವರ್ತನೆಗೊಳ್ಳಲು ಅಡ್ಡಿಯಾಗುತ್ತದೆ. ವಾಯು ಮಾಲಿನ್ಯದಿಂದಲೂ ವಾತಾವರಣದಲ್ಲಿ ಹಾನಿಕಾರಕ ಕಣಗಳು ಹೆಚ್ಚಾಗುತ್ತವೆ. ಇವು ಮೋಡಗಳಲ್ಲಿನ ನೀರಿನ ಹನಿಗಳು ಒಂದಾಗಿ ದೊಡ್ಡದಾಗುವುದನ್ನು ತಡೆಯುತ್ತವೆ. ಮೋಡಗಳ ದಿಕ್ಕು ಬದಲಾವಣೆ ಮಾರುತಗಳ (ಗಾಳಿ) ದಿಕ್ಕಿನಲ್ಲಿ ಬದಲಾದರೆ, ತೇವಾಂಶಭರಿತ ಮೋಡಗಳು ಮಳೆ ತರಬೇಕಾದ ಪ್ರದೇಶಕ್ಕೆ ಬಾರದೆ ಬೇರೆಡೆ ಹೋಗುತ್ತವೆ. ಭೂಮಿಯಲ್ಲಿನ ತೇವಾಂಶ ಕಡಿಮೆಯಾದಾಗ ಸಹ ಸ್ಥಳೀಯ ಪರಿಸರ ವ್ಯವಸ್ಥೆ ಮೇಲೆ ಪರಿಣಾಮ ಬೀರಲಿದ್ದು, ಮಳೆ ಪ್ರಮಾಣ ಕುಂಠಿತಗೊಳ್ಳಲಿದೆ.